ဘၣ်ဃးလၢပဂ့ၢ်

ခရံာ်ဖိအလံာ်စီဆှံကတိၤတၢ်ဒီးပှၤဘၣ်ဃးဒီးတၢ်စံၣ်စိၤတဲစိၤဒီးဝံအကလုၢ်ကထါခံခါလၢာ်န့ၣ်လီၤ. တၢ်အံၤတဲဘၣ်ပှၤလၢညါတၢ်မနုၤမၤတ့ၢ်အသးဒီးဆူမဲာ်ညါတၢ်မနုၤကမၤအသးန့ၣ်လီၤ. လၢတၢ်တဲပာ်စၢၤစးထီၣ်သးအခါ, ပကဖးဘၣ်လၢတၢ်ဟ့ၣ်ပလီၢ်အတၢ်ကစီၣ်လၢခံကတၢၢ်တချူးလၢဟီၣ်ခိၣ်တုၤလၢတၢ်ဟးဂီၤအခါန့ၣ်လီၤ.

တၢ်ဟ့ၣ်ပလီၢ်အတၢ်ကစီၣ်ကတိၤဖျါထီၣ်ဘၣ်ဃးမူခိၣ်ကလူးသၢဂၤအတၢ်ကစီၣ်ဖဲတၢ်လီၣ်ဖျါ ၁၄, ဟဲကဲထီၣ်အသးသၢကူာ်န့ၣ်လီၤ. တၢ်ဟ့ၣ်ပလီၢ်တခါစုာ်စုာ်မ့ၢ်တၢ်လၢအကါဒိၣ်သပှၢ်ကတၢၢ်လၢဟီၣ်ခိၣ်ဒီတဘ့ၣ်ကနၢ်ဟူဘၣ်ဝဲန့ၣ်လီၤ.

• ကလူးတၢတဂၤတဲဘၣ်ပှၤလၢပကဘၣ်ဘူၣ်ထီၣ်ဘါထီၣ်တၢ်ဘၣ်တ့ကစၢ်ယွၤ, မ့ၢ်ပှၤလၢအတ့လီၤမူခိၣ်,ဟီၣ်ခိၣ်ဒီးပီၣ်လဲၣ်န့ၣ်လီၤ. ပကဘၣ်ဘူၣ်ထီၣ်ဘါထီၣ်တၢ်ဘၣ်တ့ကစၢ်မ့ၢ်လၢအဝဲစံၣ်ညီၣ်တၢ်အနၣ်ရံၣ်ဘၣ်လံန့ၣ်လီၤ. ကလူးတၢတဂၤတဲဘၣ်ပှၤလၢပကသ့ၣ်ညါကစၢ်ယွၤတဂၤအံၤကသ့ဒ်လဲၣ်ဒီးကဘၣ်အိၣ်ကတီၤသးလၢတၢ်လဲၤခီဖျိတၢ်စံၣ်ညီၣ်န့ၣ်လီၤ.

• ကလူးခံဂၤတဂၤဟ့ၣ်ပလီၢ်ပှၤဘၣ်ဃးတၢ်စူးကွံာ်တၢ်ဘူၣ်တၢ်ဘါကအိၣ်ထီၣ်လၢမုၢ်နံၤခံကတၢၢ်န့ၣ်လီၤ. တၢ်စံးဘၣ်ပှၤလၢပကဘၣ်"ဟးထီၣ်ကွံာ်"လၢတၢ်ဘူၣ်တၢ်ဘါကရၢလၢတမၤလၤကပီၤတၢ်ဘၣ်တ့ကစၢ်ယွၤဒီးအကလုၢ်ကထါလၢအိၣ်ဖျါန့ၣ်လီၤ.

• ကလူးသၢဂၤတဂၤဟ့ၣ်ပလီၢ်ပှၤလၢတၢ်အၢတဂၤကမၤတၢ်ခီဖျိလၢတၢ်ဘူၣ်တၢ်ဘါကရၢလၢညိကွံာ်တၢ်စူၢ်တၢ်နာ်လၢကဒုးအိၣ်ထီၣ်ဝဲတၢ်ဒုးလၢခံကတၢၢ်လၢတၢ်ထီဒါတၢ်ဘၣ်တ့ကစၢ်ဒီးအပှၤဂီၢ်မုၢ်န့ၣ်လီၤ. တၢ်ကမၤအသးလၢ "တၢ်ပနီၣ်" ဘၣ်တၢ်ပာ်လီၤဝဲလၢပှၤလၢအပိာ်တၢ်အၢတဂၤအခံအလိၤ, ဒီးပှၤလၢအိၣ်တီအိၣ်လိၤဒီးကစၢ်ယွၤတဖၣ်ကဘၣ်တၢ်မၤအၢမၤနးအဝဲသ့ၣ်န့ၣ်လီၤ. ဘၣ်ဆၣ်ကစၢ်ယွၤကဂၢ်လီၤအတၢ်စံၣ်ညီၣ်လၢပှၤလၢအိၣ်ဒီးတၢ်ပနီၣ်လၢအလီၤပျံၤလီၤဖုးအံၤန့ၣ်လီၤ. ယွၤပှၤဂီၢ်မုၢ်, ပှၤလၢအိၣ်ဒီးတၢ်နာ်ဒီးတၢ်ဒိကနၣ်တဖၣ်ကပူၤဖျဲးထီၣ်ကွံာ်လၢတၢ်သယုၢ်သညိဘၣ်ဃးဒီးဟီၣ်ခိၣ်လၢအသံအပှၢ်တဖျၢၣ်အံၤန့ၣ်လီၤ. အဝဲသ့ၣ်ကလဲၤဆူမူခိၣ်ဒီးကစၢ်ယွၤဒီးကထံၣ်ဘၣ်ကစၢ်ယွၤက့ၤတ့လီၤက့ၤဟီၣ်ခိၣ်လၢအလၢအပှဲၤဒ်လၢညါအသိးန့ၣ်လီၤ.