Faddoore daliila Ruuhuuji Kalluɗi

Ginnaaji ɗon koo haa toy fuu. Koo to a ewnan ɗi ruuhuuji, mbeeluuji, kuuŋga, malla ginnaaji, ɗi mbaawan hulnugo. Buude’en, nyawndooɓe mistiraaku, e layaaji ɗon ɗuuɗi, ammaa ɗe mbawan faddugo en bee gooŋga naa?

Mi yiɗi senndugo bee maaɗa yaaɓorɗe koyɗe tati ngam heɓugo fadduye diga ruuhuuji kalluuɗi ngam taa on kultora. 

Fadduye diga Ruuhuuji Kalluɗi

Goɗɗo ɗonno tembo, e o ɗon wooka. O keewɗo bee ginnaaji ɗuɗɗi, e waala baawɗo wallugo mo. Yimɓe wuro kaɓdi haɓɓugo mo bee callalluuji, ammaa o yewdi ɗi fuu bee semmbe ɓurnde nde neɗɗo e o doggi ngam yeɗugo caka geenaale. O saalini nyalɗe maako nder gookaali jey yurmeende e ɗonno ta’aa ɓandu maako bee ka’e.

Haa dukki garki goɗɗo ewneteeɗo Yeesu Almasiihu, mo bi’eteeɗo boo Isa al-Masih.

Goɗɗo oo yarino bone haa yaake o maɓɓiti hunduko maako ngam ƴamugo walliinde, ginnaaji mbookani Yeesu Almasiihu ngam acca mo feere maako. Ammaa Yeesu dillaay sam. O anndi ko ɗonno saala. Bilaa kulol, o umrani ginnaaji acca goɗɗo oo.

“Taa yahru en haa nder luggere!” ginnaaji ndooki. Ɗi ƴami nastugo nder sefre jey gaduuji ɓadiinde. Yeesu umrani ɗi accugo goɗɗo oo e nasta nder dabbaaji coɓɗi. Law, goɗɗo oo heɓti njamu maako, e sefre gaduuji fuu doggi diga towndiire nasti haa nder weendu.

Nden, goɗɗo oo hisnaama. O yetti masin! Ammaa taariiha ka’a haaɗaay nii. Yeesu Almasiihu mari baawɗe ɗuɗɗe dow ruuhuuji kalluuɗi. Koo toy o yehi fuu, o hisni yimɓe ɓillaaɓe gal ginnaaji. O hokki boo tokkiiɓe mo baawɗe dow ibliisa:

Ndaa, mi hokki on baawɗe dammugo boɗɗe e jahe e jaalaago baawɗe konneejo fuu. Koo ɗume naawnataa on. Ammaa taa ceye ngam ruuhuuji ɗowtanake on, ceye ngam inɗe mooɗon binndaaɗe haa asamanji (Linjiilaaji, Luka 10: 19-20).

To en ɗon tokko Yeesu Almasiihu, en waawan heɓugo jam nder yoŋki ki’i e hoolaare ngam yoŋki garanki! Ndaaren-ma haa yaaɓorɗe tati ngam heɓgo ndimu diga ruuhuuji kalluɗi.

Yaaɓorde 1: Ƴamu Baawɗe Innde Yeesu Almasiihu

Yaaɓorde arande laati tefugo aynol Allah nder innde jey Yeesu Almasiihu. Gal ko’e meeɗen, en ngalaa baawɗe. Ammaa to en ewni innde Yeesu Almasiihu dow yonkiiji meeɗen, ruuhuuji kalluɗi marataa semmbe! Yeesu wolwi dow tokkiiɓe mum: “Ɓe ndiiwan ginnaaji bee innde am” (Linjiilaaji, Markus 16:17).

To a nuɗɗini bee ɓernde ma fuu yo’o Yeesu Almasiihu rimɗinte, o waɗan ɗum fakat! 

Bee koyɗum waɗan Allah tornde nde’e: “Jawmiraawo, useni hisnam diga ruuhuuji kalluɗi nder innde mo A neli, Yeesu Almasiihu!” 

Yaɓorde 2: Tefu Laɓɓinki Nder bee Yaasi

Yeesu Almasiihu jaŋgini yo’o taa en ndokka laawol koo ngole haa Ibliisa. O wi’i, “laamiiɗo duniyaaru ɗon wara. O walaa baawɗe dow am koo seɗɗa.” (Linjiilaaji, Yuhanna 14:30). En laɓɓina yoŋkiiji meeɗen diga kala baawɗe kalluɗe boo. 

Ɗume ɗum yiɗi wi’igo yo’o Ibliisa “walaa baawɗe dow am koo seɗɗa “? Ɗum yiɗi wi’igo o walaa baawɗe nder ɓerɗe meeɗen malla ci’e jey laati maral maako. Sey en acca buude e layaaji. Sey kaatoɗen ko’e meeɗen diga su’uuji kalluɗi bana dakareeku, guykinooje, e kaɗɗam. To en nastino nder aladaaji jey ngewta bee maayɓe maala jey naaloore, sey en darna law kuuɗe ɗe’e. Nden kadi, en laɓɓina taarde meeɗen diga baawɗe ginnaaji. Fahin, en tora Allah ngam o yaafa en e laɓɓina en diga nder.

Yaaɓorde 3: Hebbin Yoŋki Ma bee Annoora

Ɓaawo nde Yeesu Almasiihu hisni ma diga baawɗe jey ginnaaji, ewnu mo ngam o sukla bee yoŋki maaɗa. Taa accu ɓernde ma cookre. Yeesu Almasiihu wi’i,

To ruuhuwol coɓŋgol wurtake goɗɗo, ngol yiiloyan haa karɗe, tefugo siwtaare, e ngol heɓaay sam. Nden kam ngol wi’an: “mi loroto nder suudu am ndu mi wurtino.” E to ngol lori, ngol tawan ndu sookru, wuuwaandu e mo’itinaandu. Nden ngol yaha e warda bee ruuhuuji goɗɗi joweeɗiɗi, ɓuranɗi ngol hallugo, e ɗi nastan suudu man, ɗi njooɗoto nder maaru. Joonde goɗɗo oo hallan ko ɓuri naane (Linjiilaaji, Matta 12:43-45).

To a laaɓake diga ginnaaji, hebbin yoŋki ma bee annoora jey Deftere Yeesu, Deftere Allah. Yeesu Almasiihu wari bana “annoora... nder duniyaaru, ngam taa nuɗɗinɗo fuu jooɗo nder nyiɓre” (Linjiilaaji, Yuhanna 12:46). Heɓa Deftere Yeesu woore e jaŋgu nde nyalaade fuu ngam haa annoora Maako farta nyiɓre.

Hayru ngam Garanɗum

En ɗon ngeɗa ɓadiiɗum bee timmoode jey wakkati yaake ruuhuuji kalluɗi kuuwan ɓuri foroy. Yeesu Almasiihu maatini yo hiddeko o warta, baawɗe jey halleende kiɓɓinan kayeefiiji pewe ɗuɗɗi ngam foondugo jimjugo nuɗɗinɓe. Haa woɗɓe, ginnaaji mbaŋgan nder noone kulniiɗe bana mbeelu; haa woɗɓe feere, ɗi mbaŋgan bana mala’iika’en malla saaro’en maayɓe. Ibliisa bee hoore mum hoo’an nandu Yeesu Almasiihu!

Ammaa a walaa haaje ɓe esta ma bee pewe. To a tokki Yeesu Almasiihu, o hokkete semmbe dartanaago Sayɗaanu. Ya soobaajo, no haɓre ma wa’i hannde fuu, accu Yeesu rimɗina ma!

To a yiɗi tokkiiɗo Yeesu Almasiihu waɗa do’a ngam hisnugo ma diga ruuhuuji kalluɗi, useni winndan min haa anndinki jey woni haa ɓaawo dereewol ngo’ol.