Deeƴre ko fayti e Ruuhuuji Tunwuɗi

Jinneeji ina baŋ yoo baŋ. No mbaawɗaaɗi noddirde fof, woni ruuhuuji, walla seyɗaneeji, walla jinneeji, ko ɗi kulɓaniiɗi tan. Seernaaɓe, wileeɓe, lohi e talki fof ina kuutoree hannde no feewi, kono mbela ɗum fof ina waawi en reende tigirigi?

Mbeɗa yiɗi haalande on geɗe tate beeɓɗe faamde ballooje en e ndeenka ko fayti e ruuhuuji tunwuɗi mbela hoɗon mbaasa wondude e kulol.

Ndeenka ko fayti e Ruuhuuji Tunwuɗi

Gorko o ko foppoldu mehru wonnoo homo wulla. Ko seyɗaneeji keewɗi o wondunoo, tee alaa fof baawnooɗo mo wallude. Yimɓe wuro makko etinooma toŋngirde mo callalle, kono o taƴa ɗum’en e semmbe kaawniiɗo o doga o faya genaale o hoɗoya toon. Heddii homo wulla ko tiiɗi homo ŋaaccira hoore makko keltine kaaƴe.

Haa nde gorko gooto arnoo biyeteeɗo Yeesu Almasiihu, ganndiraaɗo Iisaa Almasiihu.

Hakke no gorko o leeptiranoo, nde o ŋaaɓi hunuko makko ngam ɲaagaade ballal, jinne o wulli wi’i Yeesu yoo ummo ɗoon acca mo. Kono Yeesu salii yahde. Homo anndunoo ko kewnoo. E cuusal, o furii jinne o yo yaltu e gorko o.

“Woto weddoyo min e niɓɓere kunuus!” jinneeji ɗi ɲaagii mo. Ɗi mbi’i mo yo o rokku ɗi naatde e nder bamɗi-tuge gonnooɗi sara ɗoon. Yeesu yamiri ɗi yoo ɗi njaltu e gorko o ɗi naatoya e bamɗi-tuge karmuɗi ɗi. Ɗoon e ɗoon, gorko o heɓti cellal mum, oornde bamɗi-tuge nde fof ɓaɓɓitii to dow fooŋngo to yortoyii e nder weendu he.

Caggal ɗuum, gorko o hepti hoore mum. O heewi njaarooru! Kono wonaa e ngolɗoo ciimtol tan haaɗi. Yeesu Almasiihu ina joginoo semmbe mawɗo e dow ruuhuuji tunwuɗi. Kala ɗo o yahno, o toŋngita ɓe ruuhuuji tunwuɗi toŋngunoo. O rokki almuɓɓe makko ɓee ne baawɗe e dow ruuhuuji tunwuɗi:

Ƴeewee, Mi rokkii on baawɗe... e dow kala semmbe gaɲo o, hay huunde waawaa bonnande on. Kono noon, woto mbelto-ɗee e ko ruuhuuji ɗooftii on ko, mbelto-ɗee e ko inɗe mon mbinndaa dow asamaan ko (Aadi Keso, ganndiraaɗo Linjiila, Luka 10: 19-20).

So en ndewii e Yeesu Almasiihu, maa en ndaɲ jam e oo aduna, keɓen hoolaare e nguurndam ngarojam! Ƴeewen geɗe tate ballooje en haa mbaawen toŋngiteede e kulol ruuhuuji tunwuɗi.

Geɗel 1: Eewno Semmbe Innde Yeesu Almasiihu

Geɗel gadanel ngel woni mooltaade e Geno o e dow innde Yeesu Almasiihu. Enen ɓolɓe, en ngalaa semmbe. Kono so en noddii innde Yeesu Almasiihu e nguurndam men, ruuhuuji tunwuɗi ɗi nattat jogo semmbe! Yeesu wi’i ɗum ɗo ko fayti e almuɓɓe makko: “E innde am maa ɓe ndiiw seyɗaneeji” (Aadi Keso, Marka 16:17).

Tawi a gooŋɗinii e ɓernde maa fof Yeesu Almasiihu ina waawi toŋngitde ma, maa o waɗ ɗum! Waɗ ooɗoo duwaawu ɲaagoɗaa Geno, “Joomiraaɗo, mbeɗa ɲaagi maa yo a hakkit am e ruuhuuji tunwuɗi e dow innde mo nelɗaa o, Yeesu Almasiihu!”

Geɗel 2: Yiilo Laaɓal Nder e Boowal

Yeesu Almasiihu jaŋnginii wonde en potaani haɓɓondirde e ibiliisa. O wi’i, “Gardiiɗo oo ɗoo aduna nana ara, tee o alaa geɗal e Am” (Aadi Keso, Yuhanna 14: 30). Heɗen poti laɓɓinde koye men e geɗe ibiliisa fof no potiri.

E ko firti ibiliisa “alaa geɗal e men”? Ɗuum firti ko o alaa jey e ɓerɗe men walla e galleeji men. Mbeddoɗen lohi e talki ɗi nafataa hay huunde ɗi. Ndeentoɗen geɗe bakkaat hono filmuuji bonɗi, walla simmeeji kaaŋɗinooji, walla njaram tuurnojam hakkillaaji. Tawi en meeɗii jeyeede e haaldooɓe e maayɓe walla e wilooɓe, heɗen poti accude ɗeen geɗe ko yaawi. So en mbaɗirii hono noon, en laɓɓinat nokku men tawa seyɗaneeji mbaawataa wonde heen. Caggal ɗuum, heɗen poti ɲaagaade Geno yaafoo en, o laɓɓina ɓerɗe men nder.

Geɗel 3: Hebbin Nguurndam Maa Annoore

Caggal nde Yeesu Almasiihu toŋngit-maa e semmbe jinneeji, accu o wona ɗowoowo nguurndam maa. Woto woppu ɓernde maa mehre. Yeesu Almasiihu wi’i,

So tawii ruuhu tunwuɗo yaltii e neɗɗo, wonata ko e waɗde yah-ngartaa e nokkuuji joorɗi ina yiiloo ɗo fooftii, kono daɲataa. Ndeen o wiya, “Mboɗoni ruttoo galle am mo eggunoo-mi o.” O ruttoo tan, o tawa galle o ko meho ina fittaa, ina ɲaantaa haa yooɗi. E oon sahaa, o ruttoo, o addoya ruuhuuji jeeɗiɗi goɗɗi ɓurɗi mo bonde, ɗi naata e neɗɗo he, ɗi koɗa e mum. Hono noon, baɗtande oon neɗɗo ɓura gadane mum hittude (Aadi Keso, Macca 12: 43-45).

So tawii a laɓɓinaama toŋngita ɗaa e jinneeji, hebbin nguurndam maa e annoore deftere Yeesu nde, Deftere Seniinde nde. Yeesu Almasiihu ari hono “annoore e aduna, mbela kala gooŋɗinɗo [mo] ina waasa heddaade e niɓɓere” (Aadi Keso, Yuhanna 12: 46). Heɓ deftere Yeesu nde njaŋngaa nde ɲande fof mbela annoore Makko ina riiwa niɓɓere nde.

Ndeenka e ko Aroyta

Ngonɗen ko e laaci aduna ɗo seyɗaneeji ɓuri ɓeydude golle mum’en e semmbe. Yeesu Almasiihu loŋnginiino wonde hade makko artude, semmbeeji seyɗaneeji maa mbaɗ kaawisaaji ngam hoomtude gooŋɗinɓe ɓe. E won heen, jinneeji ngarat e mum’en hono mbaadiiji kulɓiniiɗi; e woɗɓe ɓe, ɗi peeɲa e mum’en hono no maleykaaji walla no maayɓe maɓɓe nih. Ibiliisa e hoore mum maa ƴettu mbaadi Yeesu Almasiihu!

Kono woto ɗee penaale koomtu on. So a ɗooftiima Yeesu Almasiihu, maa o rokku ma semmbe haa mbaawaa dartaade ibiliisa. Giɗo korsuɗo, kala ko cippirtaa e mum hannde, accu Yeesu Almasiihu toŋngit-maa heen!

So tawii haɗa yiɗi almuudo Yeesu Almasiihu ɲaagono-maa ngam toŋngite-ɗaa e ruuhuuji tunwuɗi, haɗa waawi jokkondirde e amen e ko winndaa koo caggal ooɗoo kaayit.