Gorɗuɗo nder Kiita

Fajiri feere, mi wurti suudu hotel am ngam yahgo haa kawtal bee nafuda. Mi sakkiti no e nden kam mi laanyi moota law-–yawi ɓuri sarɗiwol. Reeta laawol hiddeko mi yotto, soojeejo darni yam sera e o w’i yam sey mi yaha barriki sooje’en! Ɓernde am metti masin e walaa no mi waɗa ngam mi anndi mi waɗi aybe. 

Ɓaawo nde sojeejo maɓɓiti ɗereewol wullaandu dow am, mi gerɓaaɗo haa yeeso kiita ɓadiiɗum ngam mi nootoya. Ton, mi waɗi saa›a hawrugo bee soobaajo kuuwanɗo bana cettoowo. O hayɗini laarugo yam. Nde mi faamtini mo ɓillare am, o wi’i, “Taa sinku. Mi suklan bee haala ma.” Mi seyi masin. Soobaajo am on laati cettoowo am!

Ngam dalila soobaajo am naasti settugo yam, hiitoowo hiiti mi yoɓa pamarum. Mi wurti saare kiita bee maŋtugo Allah.

Fakat ɗum kulniiɗum daraago haa yeeso hiitoowo jey duniyaaru. Ammaa walaa nandu sam bee ko tammi laatugo darago haa yeeso Allah haa nyalaade mawnde jey lisaafi. To nyalaade nde’e waran no jaŋgo kam, a laati taskiiɗo naa?

Taskugo ngam kiita

Yimɓe feere ɗon jaaba dow kiita warande bee yebaare. Ɓe ɗon njara guykinoojam, pooɗa taba, pija caca, njaha babe hiirde jemma, ndaara videyoji. Teema ɓe anndi yo kuuje ɗe’e laati binndaaɗe nder deftere kuuɗe, ammaa ɓe laati kaɓɓaaɓe gal pewe jey Sayɗaanu (anndaaɗo boo bana Shaytan). Ɓe kakkiltaa.

Yimɓe feere boo ɗon jaaba bee kulol maŋgol. Ɓe ngakkataa waɗugo do’aare . Ɓe ɗon numa dow bone jey yenaande malla yiite jahannama haa dukki ɓe ngejjiti yiide e enɗam Allah. 

Ammaa bana mi heɓi settoowo nder daldal kiita, Allah taaski settoowo mo wallan en saalugo gal kiita. A wonataa feere ma!

Moy Woni Settoowo Meeɗen?

Numo jey settoowo laataay kesum. Nduuɓu fuu, waɗooɓe jahaale ujineeje ɗon ngiilo haykaliije haa Woyla Afrika, haa Fuunaaŋge Cakaare, e Asiya. Yimɓe ɗuuɗɓe ɗon tora haa dow genaale ardiiɓe mawɓe, bee nuɗɗinki yo ɓe cettooto ngam maɓɓe. 

Ɗum booɗɗum ɗowtango ardiiɓe mawɓe ɓe›e, ammaa torugo ɓe malla ƴamugo ɓe ɓe cetto ngam amin laati haram. Ɓe maayi e mbawataa waɗgo koo ɗume ngam mooɗon. Koo annabo’en ɗon nder genaale maɓɓe, ndeena Nyalaade Ummitineeki.

Koo to ɗum laati haram ngam ƴamugo maayɗo darana en, numo settoowo laati boɗɗum. Ammaa cetta moy on Allah yerdata? Sey ɗum laata gooto mo ɗon 

1. Geeto (ngam maayɗo wawataa wolwugo ngam meeɗen). 

2. Bilaa hakke (ngam mo hiitaaɗo gal dooka wawataa settugo ngam yimɓe feere).

Moy waawan hiɓɓingo kuuje ɗe? Walaa feere ɓurɗo giɗaaɗo Yeesu Almasiihu, (Isa al-Masih), mo geeto nder asama e ceniiɗo. 

Numu dow maajum–woodi goɗɗo feere mo waawan wi’igo o waɗaay aybe naa? Aadamu nyaami ɓiɓɓe lekki kaɗaaki; Nuhuu (Nuh) wuyki bee kaɗɗam; Ibrahiima (Ibrahim) fewi; Muusa (Musa) mbaari goɗɗo; Daawuda wujji debbo goɗɗo feere. 

A heɓataa annabiijo koo gooto jey meeɗaay waɗugo aybe e meeɗaay ƴamugo yafuuye. Ammaa Yeesu Almasiihu meeɗaay waɗugo hake sam. 

Kaŋko hoore maako wi’i, “ Nelɗo yam ɗon wondi bee am,... ngam foroy mi ɗon waɗa ko fottanta mo” (diga Linjilaaji, anndaaɗi boo bana Injeel, Yuhanna 8:29). 

Tiitugo Kiita bee Salaaman

Yeesu Almasiihu ɗon geeto nder asama e o walaa hakke sam. O ɗon taaski settugo ngam am bee ma. E o ɗon loorto nii seɗɗa.

To o ɗon loorto nde ɗiɗawre, ɗum yiɗi wi’igo Yeesu Almasiihu laati annabiijo ragareejo. Ooho, o ɓuri annabiijo–o laati Settoowo meeɗen, Jagorɗo e Salaaman nder Nyalaade jey Lisaafiiji. O wi’i en, “Gooŋga... koo moy ɗowtani wolde am, maayataa sam” (Linjiilaaji, Yuhanna 8:51). 

Yeesu maayay; o geeto! E o ɗon hawta ummatoore maako dow lesdi koo joonta. Ndego o ɗon ewna yimɓe nder nasta caka ummaatoore maako gal waŋgugo nder koyɗol bana goɗɗo nder limce daneeje malla gal hokkugo en kayeefiiji to en toran Allah nder innde maako. 

A yiɗi heɓugo salaaman haa Nyalaade Lisafiiji naa? Waŋgin nuɗɗinki ma nder Yeesu Almasiihu. Ngam ɗume en ɗon ngaata holaare meeɗen dow maayiɓe jey anndaa noy ɓe tammi waɗugo haa Nyalaade Lisaafiiji? Yeesu woodi hoolaare ngam joonde maako nder asama. Bana soobaajo am settoowo nder saare kiita, o wallan en.

Teema hayɗinte to huunde kayniinde waawan laatugo gooŋga. Yeesu Almasiihu wi’i, “To on torake koo ɗume bee innde am, mi waɗan ɗum” (Linjiilaaji, Yuhanna 14:14). Foondu ngam keɓta to ko mbi’an mi ma laati gooŋga. To Yeesu mari bawɗe deydey humtugo haajeeji nder yoŋki jonta, nden fakat o kooleteeɗo ngam laatugo settoowo meeɗen. Toru Allah nder innde jey Yeesu bee ɓernde gooŋgaare e reenu ko warataa. A waawan waɗugo do’a:

Ya Jawmiraawo, mi yidi heɓtugo to Yeesu laati fakat gooto A suɓi ngam laatugo settowo meeɗen nder kiita. To ɗum laati gooŋga, useni jaaban do’a am ngam (nastin haaje ma haa ɗo). Mi ɗon ƴama ɗum nder innde Yeesu Almasiihu. Aamiina.

To a yiɗi ɓesdugo ekkitaago dow noy tokkugo Yeesu Almasiihu, winndan en haa anndinki ki woni haa ɓaawo ɗereewol ngo’ol.