Mbela haɗa Sokli Kaawisa?

Ɓesngu gooto jaajɗo ina joginoo ɗamaawu heɓde ɓural e nguurndam mum’en. O suɓii ɗannanaade leydi ngonndi. Kono ɗanngal ngal noon weeɓaano; ko maa ɓe tacca jeereende yaajnde ɓe taccira nde koyɗe. Goorooɗe ina ngonnoo toon, kay jahe, kay nguleeki mbonki. So tawii won e maɓɓe ɲawɓe walla leefɗuɓe keddii caggal, mbaɗ-boneeji en njanat e mum’en.

Tan ɓe ngayni ɲaamdu ɓe njooɓinoo ndu, kono hooreejo maɓɓe o ɲaagii Geno yoo waɗ kaawisa. Jaŋngo e mum, nde ɓe pini subaka, ɓe tawi taƴatine tokoose bayɗe no mburu nih ina carii baŋ yoo baŋ. Ko ɗum huunde welnde, hono no mbiskiit e njuumri nih. Ina heewno haa gooto e maɓɓe fof waawa ɲaamde haa haara! Ɓe ɓooyii taar-tarrnude e jeereende he hade maɓɓe taccude nde, tee ɲalawma fof mburu o ummoroo ɗum’en dow asamaan. Jettooɗe ngoodanii Geno, ɓe ndaɗnanooma!

Ngol ciimtol ina haawnii, kono ko huunde waɗnoonde. Ko gootol e ciimti ciimtaaɗi ɗi e Deftere Seniinde he, woni deftere Tawraat, Zabuur, kay Linjiila. Deftere Seniinde nde ina waɗi teemedde teemedde ciimti goonga e goonga, keewɗi e majji tuugnii ko e kaawisaaji ɗi Geno waɗi e nder nguurndam heewɓe. Ko deftere faayodinnde e oo jamaanu men hannde, nde yimɓe heewɓe cokli kaawisaaji e nguurndam mum’en.

Kaawisaaji Jamaanu Hannde

E ɗii duuɓi battandiiɗi, en nji’i hareeji leɲam leɲamaagu, jiiɓru, baasal, roŋkere liggeewi, ɲabbuuli daaɓooji, e maayde. Mi yenanaaka aan no ngooruɗaa ɗoo jooni. Ina waawi tawa ko a tumaraŋke, haɗa woɗɗi galle maa. Ina waawi tawa haɗa wondi e ɲawɗo gonɗo hakkunde nguurndam e maayde. Ina waawi nih tawa ko a jiilotooɗo liggeewi.

Kala heen ngonka maaɗa, Geno ina wonda maa tee homo yiɗi waɗande ma kaawisa hannde hono no o waɗiratnoo e jamanuuji ɓooyɗi. Kala nde ɓernde maa wondi e mette, haɗa waawi heɓde semmbe so a jaŋngii Deftere Seniinde nde, deftere kaawisaaji.

Koŋnguli Geno fayde e oo Jamaanu Men

Won yimɓe ina kula jaŋngude Deftere Seniinde nde sabu ɓe nanii ko nde wostaande. Ina waawi tawa jey sabaabu o ko nguurndam heewɓe wiyooɓe ko ɗooftiiɓe Deftere Seniinde nde. Heen sahaaji heɗen njiya Masiyaŋkooɓe yarooɓe saŋngara, weddotooɓe ceede, ɓoornotooɓe comci ɗi timmaani, ɲaamooɓe bamɗi-tuge, kay ɓalwuɓe ɓerɗe e yimɓe woɓɓe.

Kono noon, ɗee ɗoo geɗe kaantoriɗɗe fof ina kaɗaa e Deftere Seniinde he. So Masiyaŋkooɓe ɗooftaaki ko Geno yamiri ko, ɗuum takataa Koŋngol Makko duumingol ngol waklaade. Annabi Esaya winndiino, “Huɗo yoorat, piindi ɗaasɗat, kono koŋngol Geno men laatoto haa cay” (Esaya 40:8). Mbela hoɗon cikki innam aadee en ina cemmbolini haa ina mbaawa wostaade koŋngol Geno, walla noon tawa ko ɓe kolliraani no ngol foti wayde e nder nguurndam maɓɓe?

Deftere Seniinde nde ina siimta no annabi Daawuuda (ɓurɗo anndireede Dawud) e yimɓe mum ƴettirnoo wakannde aadi nde, wakannde kaŋŋe waɗnoonde Jamirooje Sappo nde. Jamirooje Sappo ɗe ko sariyaaji Geno tottiri ngam anndinde en no potɗen wuurdude, tee ɗi mbinndanoo ko e alluuje kaaƴe jaajɗe baɗaaɗe e nder wakannde kaŋŋe nde. E nder yahdu maɓɓe, gorko gooto bellii juŋngo mum memi wakannde nde—ɗoon e ɗoon o yani o hawri e lajal!

So tawii Geno yamiraani juuɗe mawnakiniiɗe yo mem wakannde seniinde mooftunoonde Koŋngol Makko nde, hol no o yamirirta yimɓe bonɓe yo ɓaɗtoro Koŋngol Makko binndangol ngol ko taƴata e ko momtata? Geno ko cemmbolinɗo baawɗo reende Koŋngol Mum.

E goonga e goonga, Deftere Seniinde nde woni deftere ɓurnde yuuyneede e aduna he. Ko ɓooyaani ko, aynaaɓe Beduin tato to Palestiin—Muhammad Edh-Dhib, Jum’a Muhammad, kay Khalil Musa—pergitii njani e Guri Maayo Maayngo ɗi. Ɗum ina jeyaa e jiitanɗe paayodinɗe ballooje en hannde haa mbaawen yuuynitaade ko winndaa e Deftere Seniinde he kay ko winndaa e ɗiin guri cuuɗinooɗi jiitaaɗi jaaratenooɗi e duuɓi 2.000. Nanndugol ngol ina haawnii, ina holla en tan loŋnginooje Geno mbaawataa wosteede walla wakleede. So tawii haɗa sokli kaawisa, haɗa waawi yenaneede Deftere Seniinde nde ko nokku goonga to potɗaa ƴeewde! Ɗoo mbaawɗaa tawde ciimti kaawniiɗi ko fayti e annabaaɓe hono Nuuhu, Ibraahiima, Yuusuf, Yunuus, Daɲel, Daawuuda, kay Sileymaani. Haɗa waawi nande huunde e ciimti he e nokkuuji goɗɗi, kono Deftere Seniinde nde siimtat heen ciimtol fof haa timma!

Ar Yiitu Kaawisa Maa

Kala caɗeele ɗe ngonduɗaa, Deftere Seniinde nde ina jogani maa ciimtol kaawisa:

• Mbela ko a ɲawɗo walla haɗa wondi e ɲawɗo? Jaŋngu ko fayti e cellingol Naamaan, mawɗo konu leydi Siri gondunooɗo e ɲaw baras o.

• Mbela haɗa sippiree ngam ɲamminde ɓesngu maa? Jaŋngu ko fayti e debbo caŋkoraaɗo o e ɓiŋngel mum gorel to leydi Libaŋ, o daɗiino e fatara bonɗo tawi ko nehal seeɗa kay womre wootere conndi o joginoo.

• Mbela maayde ina ɗeŋƴini nguurndam maaɗa? Jaŋngu ko fayti e Ebed-Melek, maccuɗo gooto to laamorgo Ecopi, daɗndanooɗo e maayde e tuma hare sabaabu nde fawde hoolaare makko e Geno.

• Mbela haɗa sikki ko a tumaraŋke? Jaŋngu ko fayti e Hagaar Ecopinaajo o, jiiɗo kaawisaaji Geno nde o riiwaa nde.

• Mbela haɗa muti e nder caɗeele aduna? Jaŋngu ko fayti e Yeesu Almasiihu nde o forti juŋngo makko o furii henndu mooltanaandu ndu haa o daɗndi almuɓɓe makko ɓe e joolagol laana ngol.

Jaabowuuji Kaawniiɗi

So heɗen njaŋnga Deftere Seniinde nde, en keewat hoolaare ngam waɗde duwaawu gonduɗo e ɗamaawu moƴƴo. Yeesu Almasiihu wi’i, “Kala ko ɲaagori-ɗon tornde, tawi hoɗon ngooŋɗini, on keɓat” (Macca 21: 22). So en njaŋngii ciimti woɓɓe heɓɓe kaawisaaji to Joomiraaɗo, ɓerɗe men keewat ɗamaawu haa mbaawen huccitinde ɲaagule men dow.

Mbela haɗa sokli kaawisa? Heɓ semmbe e kaawisaaji gonɗi e Deftere Seniinde he tee ɲaago Geno rokku-maa mo maaɗa. E goonga, maa o nanan ma ɲaagungal maa hannde!

So tawii haɗa yiɗi ɓeydude ganndal ko fayti e kaawisaaji e nder Deftere Seniinde he, jokkondir e amen e ko winndaa ko caggal ooɗoo kaayit.