Eeraango Tumaraŋke

Abdul-Maalik ko gorko nayeejo tampuɗo wonnoo. Caggal nde o saŋkoraa jom suudu makko e sukaaɓe makko, o dogi o yalti leydi Irak mbela homo daɗa e bone ISIS. Jooni ko leydi Yurdan o woni hono cuuɗiiɗo nih.

Kono ina woodnoo hoolaare ɗo o waawnoo jaggitaade. Homo joginoo denɗiiko gooto gonɗo leydi Kanadaa biiɗo maa wallu mo o heɓa toon liggeewi. E nder weltaare makko, o fuɗɗii feewndude kaayitaaji, homo miijoo nguurndam toon mbelɗam ɗam. Caggal nde o fadnoo duuɓi duuɓi, o heɓi ɗiin kaayitaaji o naati leydi Kanadaa. Abdul-Maalik heɓi weltaare mawnde!

Kono weltaare makko juutaani. Caggal nde o yottinoo leydi Kanadaa, o tawi nguurndam tumaraŋke ko nguurndam cattuɗam. O ɲallata ko daraade homo liggoo haa hiira. Hoɗdiiɓe makko ɓee ne ko lemsuɓe. Yah ngartaa o e mobelaaji ɗii no njaarata weeɓaani faamde—kay ɗemngal Aŋngele ngal!

Abdul-Maalik ɓooyiino jogo miijo yahde nokku ɓural, kono nde o yottinoo, ɓernde makko heewi mette. O fuɗɗii naamnaade hoore makko homo wiya mbela won ɗo o waawata heɓde welamma ɓernde makko e nder oo aduna—walla o fadat haa Aljanna tan!

Ɗanngal fayde Aljanna

Mbela a meeɗii durnu miijo no Abdul-Maalik nih? Yiɗde nokku ɓural ko huunde tiiɗnde e nder ɓernde innam aadee kala tee ɗuum waawata tabitde tan ko so joomum naatii Aljanna, galle men tigirigi o. Tee ko yiɗde tabatinteende ɓooyataa! Maandooje Tuma ɗe ina timma e jeese men, tee oo aduna men jooni gasa.

E duuɓi teemedde teemedde, defte ceniiɗe Yahuudayaŋkooɓe, Masiyaŋkooɓe, kay Lislaamuyaŋkooɓe kaalanii en ko fayti e timmoode aduna—tuma nde “eggaten” oo aduna naatanen garoowo o. Ɗii diineeji tati fof ina njoopoo Almasiihu garoyoowo kalfinaaɗo timminde ɗeeɗoo geɗe cakkitorɗe aduna.

E kaawisa, to diine Masiyaŋkooɓe kay Lislaamuyaŋkooɓe, oon Almasiihu woni Yeesu Almasiihu ganndiraaɗo Iisaa Almasiihu. Kaŋko wonnoo Almasiihu o nde o wuurnoo nde e leydi Palestiin, kono a mboni Aljanna ndeen e jooni wonii hedde duuɓi 2.000. Maa o artoy ɲande Ɲalawma Ɲaawoore.

Gartugol Yeesu Almasiihu ina jaaynaa tigirigi e nder Deftere Seniinde he, kono Lislaamuyaŋkooɓe ɓee ne ina ngooŋɗini maa o artu, tawde ina winndaa e Deftere Quraana: “Tee (Yeesu) maa won Maande (ngam gargol) Tuma (Ɲaawoore): wadde noon woto cikkitoɗee ko fayti e (Tuma o), kono ndewee e Am: ɗuum ko ɗum Laawol Portingol” (Az-Zukhruf 43:61).

Hono no gollotooɗo e laamu wallirta haa kaayitaaji ɗanngal keɓoo, Yeesu Almasiihu ina wiya en yoo en mbattu hakkille e Maande makko he mbela heɗen ngannda Laawol Portingol naatnowol en Aljanna ngol.

Holno Yeesu wi’i Aljanna way?

Aadi Keso o, ganndiraaɗo Linjiila, ina winndaa e mum wonde Yeesu wi’ino, “Mbeɗa yaha feewndonoyde on nokku, maa mi artu mi jaɓɓoo on mbela ɗo ngonmi fof, onon ne ngonon ɗoon” (Aadi Keso, Yuhanna 14: 2-3). Yeesu Almasiihu wi’i homo waawi en naatnude Aljanna!

O sifaniima en ne mbaadiiji jooɗɗi gonɗi e oon nokku. O wi’i

• Maayde woodataa toon, walla mette, walla gulaali, walla muuseeki (Peeɲɗi 21:4).

• Maa en ndaɲ galleeji jooɗɗi (Yuhanna 14:2).

• Rewɓe e worɓe fof maa teddine toon (Galatnaaɓe 3:28).

• Ko nokku keewɗo annoore, peewal, e weltaare (Peeɲɗi 21:21-25).

E goonga, ko nokku hono ooɗoo ɓerɗe men cokli!

Ko taki Yeesu Almasiihu ina arta Laawol Ɗiɗaɓol

Kono Geno neliino annabaaɓe heewɓe kay nulaaɓe seniiɓe. Ko taki Yeesu Almasiihu suɓaa arta laawol ɗiɗaɓol? Ngal naamnal ina weeɓi jaabaade so en ƴeewii e yeru ɗanniyaŋke. Sabu heɓde kaayitaaji ɗanngal weeɓaani, yimɓe heewɓe mooltotoo ko e gannduɗo sariya laawol ɗanngal. So en ndaɲii ɗowoowo en, en pawat hoolaare men e mum ngam wallude en.

Hono noon, Yeesu Almasiihu woni oon gooto gartoowo laawol ɗiɗaɓol sabu homo anndi laawol Aljanna tee homo waawi en ɗowde haa njottoyoɗen toon. Kaŋko e hoore makko o wi’i, “Miin woni laawol ngol, goonga o, e nguurndam ɗam” (Yuhanna 14:6).

Kala annabi e kala nelaaɗo mo Geno meeɗi nel meeɗii juum tee ɲaaginooma yaafuya. So wonaa Yeesu Almasiihu. O meeɗaa bakkodin e duuɓi 33 ɗi o wuurnoo e aduna ɗi. Ko ɗuum waɗi o nawaa Aljanna.

Heɗen poti ekkaade e Yeesu Almasiihu, bajjo mo meeɗaa bakkodin o, hol no mbaawaten timminde jamirooje naatnooje en Aljanna. Hono nih tan mbaawaten heɓde no naatirɗen toon. E njettooru, heɗen mbaawi jaŋngude e deftere makko he, Deftere Seniinde nde.

Heblanaade Gartugol Yeesu Almasiihu

Mbela wonaa summbeende mawnde so a yenanaama haɗa ɗannoo koɗoyaa e nokku ɓural? Haɗa noddaa ngaraa njeyeɗaa e laamu Geno teddungu ngu to nder Aljanna! Ɓooyataa Yeesu Almasiihu o arta nawa en e oon nokku moƴƴo.

Mbela ina waawi wonde tawa ko innam aadee en cukkuɗaa ɓe nganndaa ko heɓoyta ɗum’en e oon Ɲalawma Ɲaawoore? So a wondi e Yeesu Almasiihu, a waɗataa ɓerɗe ɗiɗe. Ɲaago Geno ɗow maa e Laawol Portingol ngol Yeesu Almasiihu ngol. Haɗa waawi waɗde ɲaagungal hono nih:

Ooy Joomiraaɗo, ɓernde am ina fooɗanoo nokku ɓural. Mbeɗa ɲaagimaa yo a hakkit amen miin e yiɗɓe am e caɗeele oo aduna. Mbeɗa gooŋɗini tuma o ina raɓɓiɗi. Mbeɗa ɲaagimaa yo a ɗow am mbela mbeɗa naata e oon nokku ɓural mo peewndanɗaa mi o. Aamiin.

So tawii haɗa yiɗi heɓde deftere Aadi Keso nde, haɗa waawi jokkondirde e amen e ko winndaa koo caggal ooɗoo kaayit.