Chhanchhuahna Tawp Ber

Ganga lui kamah chuan, Antyesti serh leh sang an hman dan, moksha tia an sawi mihring zinkawng tawp ber anga an ngaih, mithi tawh thlarau chu taksa pakhat atangin taksa dangah a insawn kual thin tih chu puithiam chuan a hrilhfiah a. Mipui zinga naupang te pakhat chuan ngun takin a lo ngaithla a. A kianga mi pakhat hnenah chuan tihian zawtin, “Hei hi eng tikah nge a tawp ang?” a ti a. 

Mi tam takin an ngaihtuah fo thin zawhna chu a zawt a ni. Taksa hrang hranga awm kualna hrehawm tak kan kalsan theih hma hian vawi engzat nge pian a ngaih a, vawi eng zat nge pian nawn leh a ngaih ang? Hun kal tawhah khan vawi tam tak he zawhna hi zawh a lo ni fo tawh a, chuti chung chuan chhanna fum fe tak pek theih a ni ngai lo a ni.

Pianna te, thihna leh hrehawm tawrhna te hi he leiah chuan thil pangai a ni a. Mahse, he khawvel piah lam, Pathian awmna hmunah chuan, hetianga piannawnna hrehawm tak hi a awm ve thei lova—kum khuaa hlimna tawp thei lo a awm zawk a ni. Vanneihthlak takin, harsatna leh hrehawmna atanga chhanchhuahna chang turin thihna leh piannawnna vawi tam paltlang a ngai lem lo a ni. Thil phurawm tak mai ka’n hrilh ang che.

Chatuana Tuarna Pumpelhin!

Hmanah khan, Lalpa Isua Krista chu mihring anga changin he khawvelah a lo kal a. Mite tidamin thil mak leh ropui tak tak a ti a. “Van Lalram,” tiha an koh hmun danglam bik chungchang pawh a zirtir a. Vanram chu damlohna te, tawrhna te, piannawnna te awm tawh lohna hmun tih a sawi a ni. Chumi hmun mawia awm apiangte chu chatuanin an nung a. 

Lalpa Isua chuan he lalram ropui tak chungchang hi a zirtir a, tichuan, a duh apiangte tan chu hmuna kan kal ve theih nan, kan thiltih tha lovin nghawng a neihte lak atanga min tizalen turin, a nun chu kan tan a pe a ni.

Kan tana inhlana a thih hnu ni thumna niah, thlan atanga tho lehin Van Lalramah chuan a chho ta a ni. Hun tawpah amah zuitute chu vanrama hruai turin a lo let leh dawn tih a tiam a ni.

Hei hi hma lam hun ropui tak a ni dawn lawm ni? Isua chuan mimal tinte hi chhanchhuahna chang turin min duh a—chatuanin sual vanga tawrhna chu pumpelh turin min duh a ni. Mahse, mipa naupang tein “Eng tikah nge hei hi a tawp ang,” tia a zawh ang khan, keini pawhin chhanchhuahna kan chan hma hian eng tia rei nge ni ang tih hi kan ngaihtuah fo thin a. 

Lalpa Isua Krista lo Kir Lehna

Chhinchhiah tlak deuh mai chu, Lalpa Isua zirtirte pawh khan, “Eng tikah nge a tawp ang?” tih zawhna ngai tho hi an zawt ve a. Lalpa Isua chuan hun hnuhnungte chu lirnghing nasa tak te, indona nasa tak te, tam nasa tak te, hri leng nasa tak te, hri chhia te thlenna hun niin a sawi a ni. Buaina lo thleng zut zut an hmuh chuan hlauhna avangin mipuite thinlung chu a beidawng dawn a. Hengte hi Lalpa Isua Krista lo kalna tur chhinchhiahnate an ni ang. Heng chhinchhiahna zawng zawngte hi a thlen mek avangin hun tawpah kan cheng tawh tih kan hre thei a.

Lalpa Isua chu a thutiam angin a lo kir leh thuai dawn si a. Mitthite chu lei atangin kaihthawh an ni ang a, taksa tharte pek an ni ang, Bible-in a sawi angin, “Lalpa ngei chu au thawm nen, vantirhkoh chungnung ber aw nen, Pathian tawtawrawt ri nen, van atangin a lo chhuk dawn si a. Tin, Kristaa thi tawhte chu an tho hmasa ang a” (1 Thessalonika 4:16). 

Chumi hunah chuan, he khawvel hi tihchhiat a ni ang a, sual chu paih bo a ni ang. Hlim taka kum sangkhat cheng turin vanramah kan kal dawn a ni. Tichuan, Lalpa Iusa chuan khawvel chu a mawina leh famkimna nen a siam thar leh ang a, thihna te, natna te, damlohna te, rilru hahna te leh khawharna a awm tawh dawn lo a ni. Tin, A kawng zawhtu apiangte hnenah, chumi hmun chu a tiam a ni. Hei hi Isua Zuina Kawng chu a ni.

Chhanchhuahna Tawp Ber

Isua khan a lo let leh hun tur darkar min hrilh lo naa, Amah zuitute chu chhinchhiahna fumfe takte a pe a, chu chu a lo kal leh hun a hnaih tawhzia kan hriat theihna tur a ni a, nang leh kei damchhung pawh hian a ni thei mai thei a ni. Chanchin lawmawm a va ni em! Lalpa Isua lo kal hunah chuan, kan thiltih tha lo avanga tuarna kan chante atanga tihzalen kan ni dawn a ni!

Van Lalram lutte zingah i tel ve duh chuan, Isua hniakhnung zuina rahbi pathum awlsam te a awm a:

1. Lalpa Isua chu ring la. Isua kha thilhlan anga a nun a hlan khan, mitinte thil tihsualte avanga nghawng tha lote chu a phur a. Heng sual phurrit atangte hian min chhanchhuah theihna turin a duhthlanna ngeiin kan sualte a phur a ni. He thilthlawnpek hi i thinlung, i thlarau leh i rilru zawng zawnga i lo rinna kaltlangin i dawng thei a ni. 

2. Pathian nen mimal inlaichinna siam ang che. Lalpa Isua chuan sakhuanaa mawhphurhna awmte chu hlen chhuak satliah mai turin min duh lo a; Amah chu mimal taka hre turin min duh a ni. Kan thian hnai kan bia ang thovin A hnenah kan tawngtai thei a, kan thinlungte chu hawngin kan thurukte chu kan hrilh thei a ni. Amah chu eng tik lai pawha kan biak theih nan, Lalpa Isua chuan nitinin a Thlarau kaltlanga awmpui min tiam a ni.

3. Isua Krista zirtirnate chu zawm ang che. Isua chuan a lo kal lehna tur nghakin inralringin kan inbuatsaih tur a ni a ti a. Lalpa Isua tana inserhhrang nun awmzia chu a thupek zawm te, kan thinlung zawng zawnga amah hmangaih te leh, chhum zinga a lo lan lehna tur nghaka lo inpeih reng te hi a ni. Bible-ah hian Lalpa Isua zuitute ni tura kan mamawh engkim chu kan hmu thei ang. 

A lo kal lehna atana inbuatsaihna kawngah Isua hniakhnung zui dan i hriatbelh duh chuan, he lehkhabu hnung lama address-ah hian min be dawn nia.