Bon·kamao Jokatani

Ganga chibimani chirikamo, Antyesti ingipa manianio kamalara sigimin mandeni janggiara bimang gipino nape atchitaiani gimin aganengachim jedakode mokshako man·gen. Bi·sa saksaba gisiko nange knatimaha. Sambao chadenggipachiko nie ua indine sing·aha, “Uara basako bon·egen?” 

Uni sing·anina bang·a manderangan aganchakna u·ijachim. Mande jokataniko man·na gita badita chang atchitaitaina nanga? Ia sing·aniko chasongrangna manderang sing·aha, indiba name aganchakani dongkuja.

Atchitaitaiani, sitaitaiani ia a·gilsako dongangkuaia. Ia a·gilsakni nalsachi, Isolni dongramo —saknaani dongja, indiba bon·changgijagipa kusini gapanisan dongaia. Rasong gnange jokataniko man·na gita changni chang atchitaitaina aro sitaitaina nangani dongja. Namgipa kattani gimin anga aganna.

Pangnajolnan Saknaaoni Jokani!

Ru·uta somoirang re·angaha, Gitel Jisu mande ong·e a·gilsako atchiaha. Ua sagipa manderangko an·sengataha aro bang·a aiao inmananirangko dakaha. “Salgini Songnok” ni giminba Ua skiaha. Salgiode saa, saknaa aro atchitaitaiani dongja ine Ua aganaha. Uano donggipa pilakan jringjrotna tange dongtoka.

Ia aiao inmangipa songnokni gimin agane ua biapona re·na sikgiparangna uamangko sokatna gita Ua An·tangni janggiko on·chakaha.

On·kange siani sal gittamni ja·mano Ua gopramoni chakate Salgini Songnokona doangaha. Bon·kaman salo Ua re·bapiltaigen ine An·tangko ja·rikgiparangna Ua aganaha.

Uan mikkangchina namgipa ka·dongani ong·jama? Sakantini jokaniko Jisu nangnika — jringjrotna saknaaoni jokaniko Ua nangnika. “Basako bon·egen,” ine ua b·isani sing·ani gita an·chingba ua jokatania basako ong·gen ine sing·ani donga.

Gitel Jisu Kristoni Re·bapilani

Gitel Jisuni sninggiparangba apsan sing·aniko sing·aha — basako bon·gen? Bon·kamani salrango banggria bilonggen, dakgrikani donggen, karap ong·gen aro sabisirang ong·katgen ine Gitel Jisu talatmanahachim. Golmalrang batrorobaahaon manderangni ka·tongrang kenbegenchim. Iarangan Jisuni re·bapilani chinrang ong·toka. Ia obostarang ong·enganiko niken an·chinga somoini bon·nasiahani gimin u·isona man·a.

Ru·utgijan, ku·rachakgimin gita Gitel Jisu re·bapilgnok. Sastroo aganani gita, sigiminrang chakatpilgen, “Maina Gitel An·tangan inchroa, aro pamong sa·greni ku·rang, aro Isolni singga gnang salgioni ong·onbagen. Unon Kristoo sigiparang skang chakatgen” (Sastro, 1 Thessalonikarangna 4:16).

An·chingni u·ia gita, ua somoio a·gilsak gimaatako man·gen aro namgijaniko bon·atgnok. Bilsi hajalsa katchaaniona an·ching salgiona re·anggnok. Unon Gitel Jisu nitogipa aro chu·sokgipa a·gilsakko dakgnok — jeon saani, siani, saknaani, duk aro sikdikdik dakani dongjawajok. Jerangan Uni ramako re·a, uamangnade uano dongpana on·na Ua ku·rachakaha. Ian Jisuni Rama ong·a.

Bon·kamao Jokatani

An·tangni re·bapilani salko Jisu agansoja, indiba re·bapilani sepangaha ine u·isona Uko ja·rikgiparangna chinko on·soani donga — haida nang·ni aro angni janggi tangani somoion ong·naba donga. Aiao inmangipa kobor ong·a! Gitel Jisuni re·baaon, pilak namgija dakgiminrangoniko an·ching jakgitelataniko man·gen!

Salgini Songnoko na·aba dongpana skode, Jisuni Rama ko re·na minggittam dakgnirangsan dongaia:

1. Gitel Jisuo bebera·bo. Boli ong·e Jisu An·tangko on·ahaon, Ua sakantini sastiko An·tango ra·aha. Uarangoniko an·chingko jakgitelatna gita Ua An·tangkon bolina on·aha. Ia on·aniko na·a nang·ni ka·tong, gisik, gimikchi bebera·e ra·chakna man·a. 

2. Paltang Nangrimani Dongbo. Dakna nanggniko dakmangmangaianikode Jisu nangnikja; An·tangko u·ie ra·aniko Ua nangnika. Ripengtang baksa agangrika gita an·ching Uo bi·na man·a, ka·tongni chanchianirangko Una parakna man·a. Uni Gisikchi Ua an·ching baksa dongrimna ku·rachaka, uni gimin je somoioba an·ching Un baksa agangrikna man·a.

3. Gitel Jisuni Skianirangko Manibo. An·chingko mikrake Uni re·baanina nichaksochina Jisu agana. Gitel Jisuna on·kange janggi tangani ortoa, Uni ge·etanirangko manie ka·tong gimikchi Una ka·sana aro Uni re·bapilanina pangnan tarie dongkamna nanganian ong·a. Gitel Jisuko ja·rikgiparangna u·ina nangani gimikkon Sastroo nikna man·a. 

Jisuni Re·bapilanina tarisoanio Jisuni Ramani gimin na·a u·ibatna skode, ka·sapa·e ia lekkani janggilo mesokatgipaona seatbo.