Ka Jingpylliat Bakhatduh Eh

Harud ka wah Ganga, ha ka por ka jinglehniam Antyesti, u lyngdoh u dang batai shaphang ka mynsiem jong kiba ïap kumno ba ka ïaid na kawei ka met sha kawei pat ban poi sha ka jingïaid lynti kaba khatduh jong ka, ka moksha. Hapdeng jong kita ki paidbah, uwei u khynnah rit uba la sngewphylla, bad u la kylli kynsan ïa uwei uba ïeng hajan, “Lano kane (ka moksha) kan kut?” 

U la kylli ïa ka jingkylli kaba bun hi ki briew ki ju ïalyngngoh. Katno sien un donkam ban kha ha shuwa ban ngin lait na ka jylli kaba shitom? La bunsien la kylli ïa kane ka jingkylli naduh ki por barim, hynrei um lah satia ban ai ïa ka jubab kaba biang bad bapura.

Ka jylli jong ka jingkha, ka jingïap, bad ka jingjynjar ka long hi ka rukom, ha kane ka pyrthei. Hynrei sha lyndet jong kane ka pyrthei, ha ka jaka ba don U Blei, hangta kan ym don ka jylli kaba shitom—hynrei tang ka jingsuk kabym kut shuh bad kaba neh sha bymjukut. Ngi ainguh ba kam long kaba donkam ban ïaid lyngba da ki phewspah sien ïa ka jingïap bad ka jingkha pat ban ïoh ïa ka jingpynlait na ki jingpang bad ki jingeh. Shah ba ngan ïathuh ïa phi shaphang kaei re kaei kaba sngewtynnad bha. 

Ka Jingpynlait na ki Jingshitom Junom la Junom!

Ar hajar snem mynshuwa, U Trai Jisu U la wan sha kane ka pyrthei ha ka dur lane jinglong jong u briew. U la pynkhiah ïa kiba pang bad U la leh shibun kiwei de ki kam phylla. U la hikai ruh shaphang ka jaka kaba kyrpang kaba la khot ka “Hima jong ka Bneng”. U la ong ba ka bneng ka dei ka jaka kabym don shuh ki jingpang, ki jingeh, bad ym donkam shuh ïa ka jingkha biang. Baroh ki ban sa don ha kata ka jaka kaba itynnad kin im junom la junom. 

U Trai Jisu U la hikai shaphang kane ka hima kaba sngewphylla, bad hadien kata U la aiti ïa la ka jingim kum ka jingkñia ban pynlait ïa ngi na ka bainong ka jingleh sniew jong ngi khnang ba ngin lah ban leit shata lada ngi mon.

Lai sngi hadien ka jingïap jong U, U la mih pat na ka jingtep bad U la kiew sha ka Hima ka Bneng. U la kular ïa ki nongbud jong U ba un sa wanphai biang ha kaba kut jong ka por bad un ïalam ïa ki sha bneng.

Hato phim sngew ba kane ka long ka lawei kaba sngewtynnad? U Jisu u kwah ba baroh na ngi ban ïoh ïa ka jingpynlait—bad ban lait na ka jingjynjar junom la junom duh. Hynrei kumba la kylli u khynnah rit, “Lano kane kan kut,” ngi ruh ngi ju ïaipyrkhat, haduh katno kan shim por shuwa ban pyllait im ïa ngi. 

Ka Jingwan Phai jong U Trai Jisu Khrist

Kaba phylla ka long ba ki synran jong U Trai Jisu ruh ki kylli ïa kajuh ka jingkylli—lano kaba kut kan jia? U Trai Jisu U la batai shaphang ki sngi bakhatduh kum ka por jong ki jumai bajur, ki thma bashyrkhei, ki jingshah thngan, ki khlam, bad ki jingpang kiba bun jait. Yn pyndap ïa ka mynsiem ki briew da ka jingtieng bad jingsyier haba ki ïohi ba ki jingeh ki dang jur dang jur. Kine kin long ki dak jong ka jingwan pat U Trai Jisu. Mynta ngi ïohi ba ngi im ha ka ïa kaba kut namar kine ki dak ki shin ki la jia ha kine ki por jong ngi.

Shen, U Trai Jisu un wanphai kumba U kular. Kiba ïap kin mih pat na ka khyndew bad yn sa ai ïa ki ka met bajanai bad bathymmai kumba ka Baibl ka ong. “Naba U Trai hi un wan hiar na bneng bad ka jingrisa, da ka ktien sawa u angel rangbah, bad da ka turoi U Blei. Bad kita kiba ïap ha U Khrist kin ïamihpat shuwa” (ka Baibl, 1 Thessaloni 4:16). 

Ha kata ka por, ïa kane ka pyrthei yn sa pynjot pynpra bad ïa ki bymman yn rat dyngkhong bad pynduh noh. Ngin sa ïa leit bad don ha bneng shi hajar snem ha ka jingkmen. Nangta, U Trai Jisu un thaw thymmai ïa kane ka pyrthei ha ka jingitynnad bad jingpynjanai—Ba la lait na ka jingïap, ki jingpang, ki jingsngewsih bad ka jingsngew marwei. Bad U la kular ba baroh ki nongbud ïa ki lynti jong U kin don lang hangta. Kane dei ka Lynti U Jisu.

Ka Jingpylliat Bakhatduh Eh

U Jisu U khlem pynpaw ïa ka sngi lane ka kynta ba tikna jong ka jingwan phai jong U, hynrei U la batai ha ki nongbud ïa shibun ki dak ki shin. Ka dei lyngba kine ki dak ba lah ban ithuh shai ba ka jingwan ka jong U ka la jan bha—lehse ha ki por jong phi bad jong nga. Ka long ka khubor kaba sngewtynnad eh! Ha ka jingwan jong U Trai Jisu, yn pylliat ïa ngi na ki kuna jong ki kam sniew jong ngi!

Lada phi kwah ban long uwei na kito kiban rung sha ka Hima ka Bneng, ki don lai tylli ki kyndon ban bud ïa ka Lynti U Jisu:

1. Ngeit ha U Trai Jisu. Mynba U Jisu U aiti ïa la ka jingim kum ka jingkñia, U la bah lut ïa baroh ki kuna jong ki kam sniew jong ngi. U la leh ïa kane da ka mon sngewbha khnang ba U lah ban pylliat ïa ngi na ki. Phi lah ban pdiang ïa kane ka jingaiei sngewbha da kaba ngeit ha U da la ka dohnud, ka mynsiem bad ka jingmut jingpyrkhat baroh. 

2. Pynlong ka jingïadei ba shimet bad U Trai Jisu. U Trai Jisu um kwah ïa ngi ban bud ïa U tang dep rukom kum ki jingleh hok jong ngi, hynrei U kwah ïa ngi ba ngin ithuh ïa U shimet shimet. Ngi lah ban duwai sha U kumba ngi ïa kren bad u paralok uba jan eh, plie ïa la ki dohnud bad ïasam lut ïa kiei kiei ki barieh bad U. U Trai Jisu U la kular ba Un don lang bad ngi manla ka sngi lyngba U Mynsiem Bakhuid. Ngi lah ban ïakren bad U ha kano kano ka por ruh.

3. Bud ïa ki jinghikai jong U Trai Jisu. U Jisu U ong ba ngi dei ban long kiba apkhmih bad ba pynkhreh ïa ka jingwan ka jong U. Ban im ïa ka jingim jong ka jingaiti lut ha U Trai Jisu ka mut ba ngi dei ban bud ïa ki hukum jong U, ban ieit ïa U da ka dohnud baroh, bad ban long kiba la pynkhreh ïa ka jingwanpaw jong U ha ki sahit bneng. Ha ka Baibl, ngin shem ïa baroh ki jingdonkam ban tip kumno ban long ki nongbud U Trai Jisu. 

Lada phi kwah ban tip shuh shuh shaphang ka Lynti U Jisu bad ruh ban pynkhreh ïa ka jingwan arsien jong U, sngewbha phone ne thoh sha ngi lyngba ka jingtip ba la ai hadien jong kane ka kot.