Ka Tawrhna atana Rorelna Dik

Vimla-i chu khumah a mu a, a lung chu a phu dut dut a, mangchhe dang a nei leh ta! A ni telin, a mumangah chuan, a hun kal tawha a thil tawn rapthlak tak mai, kum 12 lek a nih laia lo khuaikhemtu mipa pakhat chungchang chu a mangphan thin a.

Vimla-i chuan kha ni kha a theihngilh thei lo. Zahna lian tak leh bawlhhlawh ngawih ngawiha inhriatna neiin, a tawrhna nasa tak mai chu tumah a hrilh ngai lo a ni. Vimla-i chu university te a lut chho ve a, mahse a mangchhia chuan a la tibuai chhunzawm fo a. Amah khawih chhetu pa chu a haw em em a, chu pa chuan a phu tawk chu hmu se a duh em em thin a ni.

Zawhna Harsate

Vimla-i rilru chu zawhna harsa hlirin a khat a. Amah pawngsualtu chu Karma kaltlangin rorelsak a ni ang em? An khawpuiah chuan chu pa chu mi thianghlim tak angin a thang chhuak si a. Mite tan thil tha tam tak tiin, chaw a nghei fo a, tin, pathiante tan pawh a inserh hrang hle a ni. A thil sual tak tih pakhat chu a thil tha tih dang zawng zawng nen buk ta ila, a inhen zo ang em? Karma dan anga hna an thawh dan a hre lo nain, a chunga pawi khawihna chuan amahah danglamna nasa tak a thlen tih erawh a hre chiang hle a. Chuvang chuan Vimla-i chuan a tawrhna chu a theihnghilh thei lo a ni. 

Rorelna Dik Zawngin

Vimla-i classmate pakhat, Saira-i chu, hmeichhiate tanpuitu pawl pakhatah hna a thawk ve tan a. Ni khat chu, Vimla-i chu Saira-i chuan, a hnathawhna, pasal sunte, pasalte vuak hlawh thinte leh pawngsual tawkte an tanpuina thin hmunpui chu rawn tlawh ve turin a sawm a. Vimla-i chuan midangten a thuruk chu an hria ang tih a hlauh avangin a tim hle a. Mahse, Saira-i chu a ngilneih em avangin Vimla-i chuan kal chu a duh ta a ni. Chumi hmun pana an kal lai chuan, Saira-i chuan ni kal taa, hliama awm hmeichhia an hmuh thenkhatte chungchang chu a hrilh a.

“Gurus tena an khuaikhem hmeichhiate i hmu tawh ngai em?” tiin Vimla-i chuan inthlahrung deuh tak hian zawhna a zawt a.

“A chang chuan, hmu thin e,” tiin Saira-i chuan a chhang a. “A zia lo hle mai. Miin sakhaw miah a inchhal avang ringawtin Pathian nen inzawmna an nei tihna a ni lo.”

“A dik alawm...”

“Ka guru, zirtirtu lu ber chuan, tunlaiah hian sakhuana khawvel chu a chhe tawh hle dawn a ni tih a lo sawi a ni. Sakhuana chhe tawh chu kan kal bosan tur a ni a, Siamtu Pathian nen chuan inzawmna kan nei tur a ni. Thinlung thianghlim min pe ang a, kan thil tih sual tam tak te chu min ngaidam dawn a ni. Tichuan, misualte awm tawh lohna hmun famkim tak Pathianin a siamthar khawvel thar hmutute zingah kan tel ve dawn a ni,” a ti a.

“Chutiang chu a va nawm hmel em. Tunge i guru chu?”

“Lalpa Isua Krista ka zui a ni. Ani chu zirtirtu ropui tak a ni a, mihringa lo chang Pathian a ni bawk a. Ani chanchin hi i hria em?”

“Bazarah a chuanna thlalak thenkhatte chu ka hmu fo tawhin ka hria, mahse a chanchin hi ka hre lutuk lo a ni. Eng dang nge a sawi?”

Kawngsirah chuan bus chu a rawn ding a. Saira-i chuan, “Lut ila, tichuan ka hrilh belh zel dawn che nia,” a ti a.

Thlarau Lama Vervekna

Vimla-i leh Saira-i chu bus-ah chuangin bus chhungah chuan an thu tlang a.

Saira-i chuan, “Sakhuana lama vervekna avanga a nghawng tha lo tak takte chu Isua chuan a sawi thin a ni,” a ti a. Lalpa Isua lehkhabu te tak te chu a ipte atang chuan la chhuakin a keu ta a. “Heta a sawi hi en teh,” tiin lehkhabu chu a han kawk a. Vimla-i chuan a chhiar a,

Nangni lehkhaziaktu leh Pharisai vervekte u, in chung a pik e! Hmeithaite sum in ei a, tlang bum nan rei tak tak in tawngtai thin. Chuvangin thiam loh in chang lehzual ang.
(Mathaia 23:14).

“Tute nge ni lehkhaziaktute leh Farisaite chu,” tiin a zawt a.

Saira-i chuan, “Lalpa Isua hunlaia guru-te an ni a, mahse an chhungril a bawlhhlawh hle a ni,” a ti a. Vimla-i chu a bu nghut nghut a, an chhiar ta zel a.

Lehkhaziaktu leh Pharisai vervekte u in chung a pik e! No leh thleng pawn lam in silfai a, a chhung erawh chu hleprukna leh insum lohnain in khat si a. Nang Pharisai mitdel, no leh thleng chhung lam chu silfai hmasa rawh, a pawn lam pawh a lo fai theihna turin. (Mathaia 23:25-26)

Chatuan Rorelna

“Vawiinah hian thlarau lama lem channa hi kan zingah a la awm reng avangin Siamtu Pathian chuan fimkhur turin min hrilh a ni,” tiin Saira-i chuan a sawi a. “Lalpa Isua lehkhabu chuan khawvel leh sakhuana thilte hi tun hunah hian a bawlhhlawh zo tawh dawn tih min lo hrilh a. Mahse Pathianin khawvel a siam thar hunah thil tisualtute chu ro a relsak dawn a ni.”

Vimla-i chuan, “Eng tin tak nge ro a relsak dawn?” tiin zawhna a siam a. 

“Lalpa Isua lehkhabu chuan mitinte thiltih tha leh tha lo chu Pathianin lehkhabuah a chhinchhiah vek tih a sawi a ni,” tiin Saira-i chuan a hrilhfiah a. “Hun tawpah chuan, Lalpa Isua Krista chu chhum zingah a lo kal leh dawn a. Mit tinin ani chu an hmu dawn a. Lehkhabu-a a inziah dan ang zelin mitinte chu rorelsak kan ni dawn a ni.” 

Vimla-i chuan mak a ti hle a. “Mahse, engtin nge kan thil sual tihte hi ni ta ang?” tiin zawhna a siam a.

An tumna hmun an thlena bus atanga an chhuk rual chuan Saira-i chu a nui seih a. “Chu chu a tha ber lai chu a ni. Lalpa Isua Krista chu sual inthawina angin a thi a, tichuan thihna atanga kaihthawh leh a ni a. Kan sualte kan puana amah kan rin chuan, a nun min pek avanga a thiltha tih ropui tak chuan thiltihtheihna nasa tak nei in, lehkhabua kan thilsual tih zawng zawngte pawh a nawt reh vek dawn tih min tiam a ni.” 

Rorelna Thuchah Tha Ber

Hmeichhe vanduai leh chanhaite chhawm-dawlna hmunpui chu an thleng ta a. Vimla-i chuan hmeithai pakhat, cher leh retheih hmel tak mai, nitina a chaw dawn thin nghaka pawna ding hi a hmu a. Chutih lai vek chuan, nu pangai hmel ve tak mai chu rang takin a rawn lut a, a tarmit dum phena a mit dum vung cher chur hliah khuhna tih hriat tak nen cuan a rawn lut a. Vimla-i thinlung chu khawngaihnain a lo khat a. Amah chauh chu tihnata awm hmeichhia a ni lo!

Saira-i chuan Vimla-i awm dan chu hrethiam in, “I tha em?” tiin a zawt a.

Vimla-i chuan, “Aw, ka tha alawm,” tiin a chhang a. “Mahse Lalpa Isua chu ro min relsak tura a lo kal a tul a ni tiin ka ngaihtuah tan ta a ni. Misualte tiboralin mi thate chu chatuana chenna tur hmun mawi takah a hruai dawn tih hi a dik a nih chuan, rorelna chungchang thu ka hriat tawh zawng zawnga thu tha ber a ni ang!”

Lalpa Isua lehkhabu chungchang hi i zir belh duh a nih chuan, he lehkhabu kawm hnung lama address-ah hian khawngaihin min rawn be dawn nia.