Ka Jingbishar hok ïa ka Jingshitom jong nga

Ka Vimla ka khie bad shong syndet na ka jingïohthiah, u klongsnam u kyndeh. Sa kawei ka jingphohsniew kaba sngewngiew! Manla ka por, ki jingkynmaw basngew shyrkhei ki wan ha ka jingphohsniew—ka jingkynmaw ïa u briew uba la shim kabu ïa ka mynba ka dang don tang 12 snem ka rta.

Ka Vimla kam lah ban klet ïa kata ka sngi. Ka sngewlehrain bad sngewtngit ïalade bad kam shym la ïathuh hano hano ruh shaphang ka jingkit bakhia jong ka jingshitom ba ka bah. Wat hadien ba ka Vimla ka la pule ha university, ka jingsngew sheptieng bad jingruma ki dang ïai wan ha ka. Ka la isih ïa uta u briew bad kyrmen ba un ïoh pynshitom ïa kaei kaba u la leh.

Ki Jingkylli Bajwat

La pynwit ïa ki jingmut jingpyrkhat ka Vimla da ki jingkylli. Hato u nongleh beïjot ïa ka un ïoh ïa ka jingbishar hok lyngba ka karma? U long u briew uba riewblei bad ba bna nam ha ka nongbah jong ka. U la leh shibun ki kam babha na ka bynta ki briew, u shah jingit barabor, bad pynpaw ïa ka jingshakri bahok sha ki blei. Hato kawei ka kam bymman kan pynlong ka jingiapher haba thew pyrshah ïa baroh ki kam babha jong u? Kam shym la tip kumno ki ain jong ka karma ki treikam, hynrei ka tip ba ka jingbymman jong u ka la wanrah ka jingkylla ha ka. Ka Vimla kam lah ban klet ïa ka jingpang mynsiem jong ka. 

Kaba Wad ïa ka Jingbishar Hok

Kawei na ki para ba ïapule lang jong ka, ka Saira, ka trei bad kawei ka seng kaba ïarap ïa ki kynthei kiba don jingeh bad jingdonkam. Ha kawei ka sngi, ka Saira ka la khot sngewbha ïa ka Vimla ban wan sha sor bad leit jngoh ïa kane ka jaka trei jong ka, ka jaka kaba ju ïarap ïa ki riewkynthei, ki kynthei ba la shah banbeiň bad leh beïjot. Ka Vimla ka sngew khuslai bad pyrkhat kumno lada don mano mano ba la tip ïa ka barieh bashyrkhei jong ka. Hynrei ka Saira ka long kaba sbun ba ka pynlong ïa ka Vimla ban leit. Katba ki dang ïaleit, ka Saira ka la ïathuh shaphang katto katne ki kynthei kiba la mynsaw kiba ka la ïakynduh ha ki khyndiat sngi mynshwa.

“Hato phi la ju ïohi ïa ki kynthei kiba la shah banbeiñ ha ki nonghikai niam?” Ka Vimla ka kylli da kaba sngewlehraiñ.

“Hooid, teng teng,” la jubab ka Saira. “Ka long kaba sngewsih shisha. Tang namar don mano mano uba kam ba u long uba riewblei kam mut ba u don ka jingïadei bad u Blei.”

“Kata kaba dei. . . .”

“U nonghikai jong nga, u Mahaguru, u ong ba ka niam ha ka pyrthei kan long kaba pyut ha ki sngi jong ngi. Ngi dei ban mih noh na ka niam kaba pyut bad ban don ka jingïadei bad u Blei Nongthaw. Un ai ha ngi ïa ka dohnud kaba thymmai bad map ïa ngi na ki kam basniew jong ngi. Bad ngin long shibynta bad kito kiban ïohi ia U Blei ba un sa thaw thymmai ïa kane ka pyrthei kum ka jaka kaba janai bad kaba ym don shuh ki briew kiba sniew.”

“Sngewtynnad shisha ïa kata. Uei u nonghikai jong phi?”

“Nga bud ïa U Trai Jisu Khrist. U long u nonghikai bakhraw, hynrei u long ruh U Blei ba la wan ban long briew. Hato phi tip shaphang jong U?”

“Nga tharai nga la ïohi katto katne ki dur jong U ha ïew, hynrei ngam da tip bha shaphang jong U. Kiei de ba u la ong?”

Ka bos ka la wan ïeng hajan ka jaka ïaid jong ki. “Ïa ngin ïakiew ha bos,” ka Saira ka la ong, “bad ngan sa ïathuh shuh shuh ïa phi.”

Ka Jingarsap Bakynja-Mynsiem

Ka Vimla bad ka Saira ki la kiew ha ka bos bad ki la ïoh jaka shong ruh.

“U Jisu u la kren shibun shaphang ka bor ktah bapynjot jong ka jingarsap ki kynja niam,” Ka Saira ka la ong. Ka la sei ia ka kot barit jong U Trai Jisu na ka pla jong ka bad plied. “Peit aïu ka ong hangne,” ka la kdew. Ka Vimla ka la pule,

Hynrei kordit ïa phi, ki nongthoh bad ki Pharisi, kiba arsap! naba phi bam duh ïa ki ïing ki riewkynthei, te phi duwai jlan khnang ban tyllep: namar kata phin ïohdiang ka jingshitom kaba kham khraw (ka Baibl, Mathaios 23:14).

“Mano kita ki nongthoh bad ki Pharisi?” Ka la kylli.

“Ki long ki kynja nonghikai niam ha ki por U Trai Jisu,” la batai ka Saira, “hynrei ki long kiba arsap bad kiba sniew.” Ka Vimla ka la kohnguh bad bteng ban pule.

Kordit ïa phi, ki nongthoh bad ki Pharisi, kiba arsap! Naba phi pynkhuid ïa kaba shabar ïa ka khuri bad ïa ka pliang, hynrei shapoh ki dap da ka jinglute bad ka jinglalot. Me u Pharisi bamatlah! To pynkhuid shuwa ïa kaba shapoh ka khuri bad ka pliang, ba kaba shabar jong ki kan ïoh long khuid ruh (ka Baibl Mathaios 23:25-26).

Ka Jingbishar Babymjukut

“U Blei Nongthaw u ïathuh ha ngi ban long kiba husiar namar ka jingarsap bakynja-mynsiem ka dang don hapdeng jong ngi mynta ruh,” la ong ka Saira. “Ka kot jong U Trai Jisu ka ong ba ka pyrthei bad ki niam ki rukom kin long kiba pyut klop ha ki sngi jong ngi. Hynrei u Blei un sa bishar ïa ki nongleh bymman ynda haba Un thaw thymmai pat ïa ka pyrthei.”

“Ha kano ko rukom phi tharai un bishar?” Ka Vimla ka kylli. 

“Ka kitab jong U Trai Jisu ka ong ba U Blei u buh jingkynmaw ïa baroh ki kam babha bad kam basniew jong uwei pa uwei ha ka kitab,” la batai ka Saira. “Ha kaba kut jong ka por, U Trai Jisu Khrist un sa wan ha ki lyoh bneng. Baroh un ïohi ïa U. Un sa bishar ïa uwei pa uwei na ngi kat kum ba la thoh ha kata ka kitab.” 

Ka Vimla ka kwah tip shuh shuh.“Hynrei kumno ngin leh shaphang ki kam sniew jong ngi?” ka la kylli.

Ka Saira ka la phuhsamrkhie katba ki la poi sha ka jaka jong ki bad ki lah hiar noh na kata ka bos. “Kata ka long ka bynta kaba sngewtynnad tam. U Trai Jisu u la ïap kum u langkñia na ka bynta ki pop bad la pynmihpat ia U. U la kular ba lada ngi phla ïa ki pop jong ngi bad ngeit ha U, ka kam babha jong ka jingaiti ka jong U ïa la ka jingim ka long kaba donbor haduh katta katta ba ka lah ban pynkhuid bad pyndam ïa ki kam basniew jong ngi baroh na kata ka kitab.” 

Ka Khubor Jingbishar Babha Tam

Ki la poi ha kata ka jaka ba ai jingïarap ïa ki kynthei kiba la lyndet. Ka Vimla ka la khmih sha kita ki riewkynthei kiba duk barangli, kiba ap jingbam man ka sngi shabar kata ka jaka. Ka la ïohi ïa kawei ka kynthei kaba ibit ibiang kaba rung stet shapoh, katba ka dang pyrshang ban buhrieh ïa ka khmat ba la jngem ïong da ki ïïtkhmat ïong. La khñiot ïa ka dohnud ka Vimla da ka jingsngewlem. Ym dei tang maka kaba don jingmong!

Ka Saira ka peit thuh ïa ka. “Hato ka biang bad phi?”

“Hooid, nga biang,” ka Vimla ka jubab. “Hynrei nga sngew ba ngi donkam ïa U Trai Jisu ba un wan kloi noh ban long u nongbishar jong ngi. Lada ka long kaba shisha ba un pynduh ïa ki briew bymman bad ïalam ïa ki briew babha sha ka jaka kaba itynnad ban im junom, ka dei ka jingbishar kaba bha tam ba nga la ju iohsngew!” 

Lada phi kwah ban tip shuh shuh shaphang ka kitab jong U Trai Jisu, sngewbha phone ne thoh sha ngi katkum ka jingtip kaba don ha dien jong kane ka kot.