Angni Saknaanina Kakketgipa Bichalko On·ani

Vimla palango asonge ka·tong rongchu su·engachim. Minggipin kenbegnigipa jumangko niktaiaha! An·tangko saksa me·asa—je·an uko uni bilsi 12 ong·o kal·akahachim, uko ua jumang niksimsimaiengahachim.

Ua salko Vimla gualna man·jaha. Ua kratcha·aha aro an·tangni jrime ra·bitenggipani bojako darangnaba aganjaha. Vimla universityo napaha, indiba uni gisiko kengokanian uoni talkujachim. Ua, ua me·asako mitchiaha aro uko sao on·ahachim.

Rakgipa Sing·anirang

Vimlani gisiko sing·anirangan gapaiaha. Uko drae til·ekgipara kragipa bichalko man·genma? Ua mandeara uni dongenggipa sonjinmaoni saksa toromi mande ong·achim. Ua bang·a manderangna namako dakaha aro isolrangko okumu chakpile olakkigipa aro kakket dake nikgipa mande ong·achim. Uni namgijagipa kamna uni nama kamrangchi donnuako man·genchimma? Uni namgijanian uko dingtangatenganiko uanikengachim. Saknaaniko Vimla gualna man·jaengachim. 

Kakket Bichalko Am·ani

Vimlani saksa porairimska me·chik, Saira, nangenggipa me·chikrangna dakchakgipa ong·achim. Salsao, Saira uko segrirangni, aro duko ga·ake dongenggiparangni nokko nieanio uko an·tang baksa re·pachina aganahachim. Saoba an·tangni obostani gimin u·iahama ine Vimla jajrengaha. Sairani namani gimin Vimla re·pana ku·rachakaha. Re·angmitingo uni u·igipa mandeni duko ga·akdaldalgipa obostani gimin Saira aganangengachim.

“Toromni dilgiparangni jakchi namgija dake man·ako na·a knaahama?” Kratcha·a gnang Vimla indine sing·ahachim.

“Oe, basakoba basakoba knaaha,” ine Saira aganchakaha. “Ian namen dukni katta ong·a. Toromigipa mande ine inana ua Isol baksa nangrimgipa ong·a inede ong·ja.”

“Ian bebe ong·a. . . .”

“Angni skigipa, dal·batgipa skigipa, indine aganaha je, an·chingni somoiode a·gilsakni toromo janggi tangani namen namjawa. An·chingni ua namgijagipa manderangoni ong·kate Isol baksa nangrimna nangchongmota. Ua an·chingni ka·tongrangko rongtalate an·chingni namgija kamrangko kema ka·gen. Unosa an·chinga Isolni gital ong·atgimin a·gilsako dongpana man·gen jeon denggugipa manderang dongjawa.”

“Nang·ni agana namen nama. Nang·ni skigipara sawa?”

“Angade Gitel Jisuko ja·rika. Uan dal·gipa skigipa ong·a, indiba Uan Isol ong·eba mandeni bimango atchigipa ong·a. Uni gimin na·a u·iama?”

“Banoba antidamo Uni noksarangkode anga nikaha, iana agrede uni gimin bang·e u·ija. Mai gipinko Ua agankua?”

Unon bus sokbaahachim. “Hai, gario napbo,” ine Saira aganaha, “anga aroba agangen.”

Gisikni Cha·chipilani

Vimla aro Saira gario gadoaha, aro damsan asongna asongchakaniko man·aha.

“Gisiko cha·chipilarangni namgija ong·aniko Jisu bang·en aganaha,” ine Saira aganaha. An·tangni jolonggao ra·bitgipa chongipa Gitel Jisuni ki·tapko ua bikotaha. “Nibo, iano mai sea donga,” ine Vimla mesoke on·e poraiaha,

Aiao na·simangna, Sastro skigipa aro Pharisirang, cha·chipilgiparang! Na·simang segrirangko cha·minoka aro ru·ute bi·aniko dakmika. Na·simang namjabate sastiko man·gen (Mati 23:14).

“Sastro skigipa aro Pharisiranga sawarang?” ine ua sing·aha.

“Iamanga Jisuni somoio donggipa toromni dilgiparang ong·a, indiba uamangara denggurang ong·a,” ine Saira talataha. Vimla gakguaha aro poraiangkuaha.

Aiao na·simangna, Sastro skigipa aro Pharisirang! Na·simang ringchakani a·palnikode name su·sranga, indiba ning·achide mitchian gapa. Mikgrigipa Pharisirang, ringchakanini ning·achiko name su·srangchengbo, unon uarangni a·paloba rongtalgen (Mati 23:25-26).

Jringjrotni Bichal

“Gisikni cha·chipilani an·chingni gisepo da·aloba dongkuengani gimin Ong·atgipa Isol an·chingko mikrake dongchina aganenga,” ine Saira aganaha. “Ong·gijagipa toromrangba an·chingni chasongo donggen ine ia Jisuni ki·tapo mikrakataha. Indiba a·gilsakko gital daktaio Isol namgijagipa manderangko bichal ka·gen.”

“Maidake Uara bichal ka·gen ine na·a chanchia?” ine Vimla sing·aha. 

“Pilak namgipa aro namgijagipa kamrangko Isolni serikani ki·tap serikaha ine Isolni ki·tapo aganani donga,” ine Saira talataha. “Somoi bon·ahaon, Jisu Kristo aramrango re·bapilgen. Pilak manderang uko nikgen. Sakantian kamni kri dormahako man·gen.” 

Vimla gisiko nangbeaha. “An·chingni namgijani gimin an·chinga maiko dakna man·a?” ine ua sing·aha.

Biapona sokon uamang busoni ong·onaha, aro Saira ka·dingsmitaha. “Uan nambatsranggipa bak ong·a. An·chingni namgijanirangna Gitel Jisu an·chingna sichakaha, aro tangchapiltaiaha. An·chingni paprangko ku·rachakode aro uni sichakanio bebera·ode Ua an·chingni pilak namgijarangko kimitna ia ki·tapo ku·rachaka.” 

Bichalni Nambatgipa Nama Katta

Watgalako man·gipa me·chikrangni nanganirangna simsakgipa nokona uamang sokbaaha. Vimla kangalgipa, ram·gipa segrirangni cha·anina a·palo sengenganiko niataha. Ua saksa chukalgipa gadango janggi tanggipa me·chikni napbaako nikataha jean an·tangni gisimgipa mikronko gisimgipa chosmachi pindapna jotton ka·engachim. Vimlani ka·tong ka·sachakan gapaha. Ua saksan mangmang dukko man·gipa me·chik ong·jaengachim!

“Nang·na maiba ong·ama?” ine Saira sing·aha.

“Mamungba ong·ja,” ine Vimla aganchakaha. “Indiba Gitel Jisuni ta·rakkale bichal ka·aniko anga nangnikenga. Angni knaa bebe ong·ode, denggu manderangko Ua gimaatgen, aro ua namgipa a·songona namgipa manderangko jringjrotna dongchina rimanggen. Ian knagiminonide nambatsranggipa bichal ong·a!”

Gitel Jisuni ki·tapni gimin na·a u·ibatna skode, ia lekkani janggilo mesokatgipaona seatbo.