ការគេចផុតពីពួកវិញ្ញាណអាក្រក់

ខណៈពេលដែលខ្ញុំកំពុងចេញដំណើរទៅឯផ្សារ នាព្រឹកដ៏ក្តៅមួយនៅក្នុងភាគអាស៊ីអាគ្នេយ៍នោះ អ្នកជិតខាងរបស់ខ្ញុំម្នាក់បានស្ទុះចេញពីអគារស្នាក់នៅរបស់នាង ហើយបានរត់តម្រង់មករកខ្ញុំ ព្រមទាំងលើកកាំបិតធំពីរគ្រវីចុះឡើងនៅក្នុងដៃរបស់នាងផងដែរ។ ភ្នែករបស់នាងបានបង្ហាញនូវការភ័យខ្លាច ដែលធ្វើអោយខ្ញុំមានអារម្មណ៍ថា មានវិញ្ញាណអាក្រក់មួយនៅទីនោះ។ ដោយសារតែខ្ញុំជាគ្រីស្ទាន ខ្ញុំបានចាប់ផ្តើមអធិដ្ឋានទូលសូមការការពារយ៉ាងស្ងៀមស្ងាត់។ ខណៈពេលដែលខ្ញុំកំពុងតែអធិដ្ឋាននោះ វិញ្ញាណអាក្រក់បានខ្សោយអំណាចទៅ ហើយមិត្តរបស់ខ្ញុំម្នាក់នោះក៏បានស្ងប់ឡើងវិញ។ បន្ទាប់មក នាងក៏បានអនុញ្ញាតឱ្យខ្ញុំយកកាំបិតចេញពីដៃរបស់នាង។ 

អំណាចរបស់ព្រះយេស៊ូវ 

មនុស្សរាប់ពាន់នាក់បានជួបប្រទះនឹងអំណាចរបស់ព្រះយេស៊ូវដូចនេះ។ ពួកគេត្រូវបានរំដោះចេញពីអំណាចនៃវិញ្ញាណអាក្រក់ ពីជំងឺ ពីបណ្តាសា ព្រមទាំងបានទទួលការការពារឲ្យរួចផុតពីគ្រោះថ្នាក់ខាងឯរូបកាយផងដែរ។ ប៉ុន្តែ តើព្រះយេស៊ូវជាអ្នកណាទៅ? តើអំណាចរបស់ទ្រង់មានប្រភពមកពីណាដែរ? រឿងរបស់ព្រះយេស៊ូវត្រូវបានរកឃើញនៅក្នុងព្រះគម្ពីរ ដែលជាសំណេរដ៏បរិសុទ្ធរបស់គ្រីស្ទាន។ នេះគឺជារឿងមួយស្តីអំពីអំណាចរបស់ព្រះអង្គដែលបានយកឈ្នះលើពួកវិញ្ញាណអាក្រក់។

ថ្ងៃមួយ ឪពុកម្នាក់បាននាំយកកូនប្រុសរបស់គាត់ទៅឯព្រះយេស៊ូវ។ គាត់បានទូលទ្រង់ថា «លោក​គ្រូ​អើយ សូម​អាណិត​កូន​ខ្ញុំ​ផង ដ្បិត​ជា​កូន​តែ​១​របស់​ខ្ញុំ។ ហើយ​មើល មាន​វិញ្ញាណ​អារក្ស​ចេះ​តែ​ជាន់​វា ហើយ​លោ​តែ​វា​ស្រែក​ឡើង ធ្វើ​ឲ្យ​ប្រកាច់​បែក​ពពុះ​មាត់ និង​ហើម​ជាំ​អស់​ទាំង​ខ្លួន រួច​ចេញ​ពី​វា​ទៅ​ដោយ​ពិបាក... ហើយចេះ​តែ​ដួល​ទៅ​ក្នុង​ភ្លើង និង​ក្នុង​ទឹក​ជា​ញយៗ»។ ព្រះយេស៊ូវបានហៅក្មេងប្រុសនោះឱ្យចូលមក ប៉ុន្តែ វិញ្ញាណអារក្ស​បាន​ផ្តួល​គាត់ទៅនឹងដី និងបានធ្វើឱ្យគាត់ប្រកាច់ប្រកិន​ជា​ខ្លាំង។

ព្រះយេស៊ូវទ្រង់មានព្រះទ័យឈឺចាប់ជំនួសឪពុក និងកូនប្រុសនេះណាស់។ ទ្រង់បានមានបន្ទូលថា «បើ​អាច​នឹង​ជឿ​បាន នោះ​ការ​ទាំង​អស់​នឹង​សំរេច​បាន ដល់​អ្នក​ណា​ដែល​ជឿ»។

ឪពុករូបនោះក៏បានស្រែកឡើងថា «ខ្ញុំ​ជឿ​ហើយ លោក​ម្ចាស់​អើយ សូម​ជួយ​ចំពោះ​សេចក្តី​ណា​ដែល​ខ្ញុំ​មិន​ជឿ​ផង!» 

​ព្រះយេស៊ូវ​ទ្រង់​បានបង្គាប់ទៅ​កាន់វិញ្ញាណ​អារក្សថា «អញ​បង្គាប់​ឲ្យ​ឯង​ចេញ​ពី​វា​ទៅ កុំ​ឱ្យ​ចូល​វា​ទៀត​ឡើយ វា​ក៏​ស្រែក​ឡើង ទាំង​ជាន់​ក្មេង​នោះ​ឱ្យប្រកាច់​ជា​ខ្លាំង រួច​ក៏​ចេញ​ទៅ» (លូកា ៩៖៣៧–៤២, ម៉ាកុស ៩៖១៧–២៧)។

មានមនុស្សជាច្រើនរងទុក្ខដូចជាឪពុកម្នាក់នេះដែរ ពីព្រោះវិញ្ញាណអាក្រក់កំពុងតែយាយីដល់សមាជិកគ្រួសាររបស់ពួកគេ។ អ្នកខ្លះគេងមិនបាន។ អ្នកខ្លះឈឺ។ ហើយអ្នកខ្លះទៀតក៏ឮសំឡេងចំឡែកៗផងដែរ។ អ្នកខ្លះមានបារមីចំឡែកៗមកសណ្ឋិត ព្រមទាំងបានបំភ័យអ្នកភូមិទាំងអស់ផងដែរ។ ប៉ុន្តែ ពួកគេទាំងអស់នោះសុទ្ធតែចង់បានជំនួយជាទីបំផុត! 

នេះជាដំណឹងល្អសម្រាប់អ្នករាល់គ្នា គឺថា៖ លោកអ្នកអាចអធិដ្ឋានទៅកាន់ព្រះយេស៊ូវ ហើយទូលសូមការការពារអោយរួចផុតពីអំណាចនៃពួកវិញ្ញាណអាក្រក់ទាំងនេះបាន។

ការជួយដោយមិនគិតថ្លៃ

គ្រូខ្មោច និងគ្រូដេញអារក្សជាច្រើនបានទារបង់ប្រាក់យ៉ាងច្រើនមុននឹងពួកគេជួយដោះស្រាយបញ្ហាទាំងនេះ។ 

នេះគឺជាដំណឹងល្អបន្ថែមទៀត គឺថា៖ ព្រះយេស៊ូវនឹងជួយដោយមិនគិតថ្លៃ។ 

នៅក្នុងរឿងនៃព្រះគម្ពីរអម្បាញ់មិញនេះ ព្រះយេស៊ូវមិនចង់បានលុយកាក់ពីគ្រួសារដែលកំពុងតែរងទុក្ខនោះឡើយ។ ទ្រង់គ្រាន់តែចង់ឱ្យពួកគេជឿទុកចិត្តចំពោះទ្រង់ប៉ុណ្ណោះ។ ព្រះយេស៊ូវស្រឡាញ់មនុស្សលោក និងប្រាថ្នាចង់ដោះស្រាយបញ្ហារបស់ពួកគេ ប្រៀបដូចជាឪពុកម្តាយដ៏ល្អ ដែលចង់មើលថែកូនៗរបស់ខ្លួនយ៉ាងដូច្នោះដែរ។ 

ព្រះគម្ពីរបានបង្រៀនថា ព្រះយេស៊ូវគឺជាព្រះអាទិករនៃសកលលោកនេះ។ ទ្រង់បានយាងមកជួយមនុស្សលោកឱ្យជឿទុកចិត្តទៅលើទ្រង់ម្តងទៀត។ ក្នុងនាមជាព្រះអាទិករ ទ្រង់មានអំណាចអាចនឹងសង្គ្រោះមនុស្សលោកឱ្យរួចពីសេចក្តីអាក្រក់ ទុក្ខវេទនា និងសេចក្តីស្លាប់បាន។ តើដោយរបៀបណាទៅ? 

ព្រះគម្ពីរបានចែងថា មានគ្រាមួយ នៅពេលដែលសកលលោកគ្មានសេចក្តីអាក្រក់ ទុក្ខវេទនា ឬសេចក្តីស្លាប់ទាល់តែសោះ។ អ្វីៗទាំងអស់សុទ្ធតែសមប្រកបនឹងគ្នាយ៉ាងល្អឥតខ្ចោះ។ ប៉ុន្តែ អ្វីៗទាំងអស់បានផ្លាស់ប្តូរ នៅពេលដែលពួកទេវតាដែលទ្រង់បានបង្កើតបានបះបោរឡើង។ ទេវតាមួយអង្គបានច្រណែននឹងព្រះអាទិកររបស់ខ្លួន។ ទេវតានោះបានចាប់ផ្តើមផ្សព្វផ្សាយពាក្យកុហកប្រាប់ដល់ពួកទេវតាដទៃទៀត រហូតដល់បានចំនួនមួយភាគបីនៃទេវតាទាំងអស់។ ពួកគេបានរួមគ្នាចោទប្រកាន់ព្រះអម្ចាស់ថា ទ្រង់អាត្មានិយម និងចង់បានអំណាច។

ព្រះអាទិករក៏មានការពិបាកក្នុងការសម្រេចព្រះទ័យផងដែរ។ ប្រសិនបើទ្រង់បង្ខំពួកគេឱ្យឈប់ ឬក៏បំផ្លាញពួកគេនោះ ពួកទេវតាដទៃទៀត និងពួកទេពនិករនៅពាសពេញសកលលោកអាចនឹងគិតថា ការចោទប្រកាន់ដែលខុសឆ្គងនោះគឺជាការពិត។ ជម្រើសមួយទៀតគឺត្រូវរក្សាជីវិតរបស់ពួកទេវតាបះបោរទាំងនេះ ដើម្បីទុកឱ្យសេចក្តីអាក្រក់របស់ពួកគេបានក្លាយជាភស្តុតាងទាស់នឹងការចោទប្រកាន់របស់ពួកគេវិញ។ បន្ទាប់មក កាលណាពេលវេលាត្រឹមត្រូវមកដល់ ព្រះអាទិករនឹងបញ្ចប់ការបះបោរនោះ។ 

បន្ទាប់ពីការបះបោរបានចាប់ផ្តើមរួច ឪពុកម្តាយដើមរបស់យើងមិនបានគោរពតាមការដាស់តឿនរបស់ព្រះអម្ចាស់នោះឡើយ បានជាបណ្តោយឱ្យពួកទេវតាអាក្រក់ចូលមកទន្ទ្រានពិភពលោកនេះ។ ឥឡូវនេះ ពួកទេវតាទាំងនេះបានបោកបញ្ឆោត និងធ្វើបាបមនុស្សលោកទាំងឡាយ។ ទោះជាយ៉ាងនេះក្តី ព្រះអាទិករនៅតែមានអំណាចខ្លាំងជាងពួកទេវតាអាក្រក់ទាំងនេះដដែល នៅពេលណាយើងទូលសូមដល់ទ្រង់នោះ ទ្រង់នឹងសព្វព្រះទ័យជួយដល់យើងជានិច្ច។ 

សូមលោកអ្នកចូលមកកាន់កន្លែងដ៏មានសុវត្ថិភាពរបស់លោកអ្នកចុះ

តើលោកអ្នកនៅចាំពីអ្នកជិតខាងរបស់ខ្ញុំម្នាក់ ដែលបានព្យាយាមវាយប្រហារខ្ញុំដែរឬទេ? បន្ទាប់ពីនាងបានទម្លាក់កាំបិតចុះ សំឡេងដ៏គួរឱ្យខ្លាចមួយបានបន្លឺឡើងតាមមាត់របស់នាង ដោយបានអះអាងថា វាគឺជាវិញ្ញាណម្តាយរបស់នាងដែលបានស្លាប់ទៅហើយ។ ទេវតាអាក្រក់បានទារឱ្យសែនសំណែនដល់វា។ ខ្ញុំបានអធិដ្ឋានជាមួយនឹងអ្នកដទៃទៀត ដែលនៅជាមួយនឹងខ្ញុំ ទូលសូមឱ្យព្រះអម្ចាស់បណ្តេញវិញ្ញាណអាក្រក់នេះចេញ។ នៅទីបំផុត វិញ្ញាណនេះក៏ចេញពីនាងទៅ ហើយអ្នកជិតខាងរបស់ខ្ញុំម្នាក់នេះក៏បានដឹងខ្លួនវិញដែរ។

នាងបានអះអាងថា «ខ្ញុំមិនចង់ឱ្យរឿងនេះកើតឡើងម្តងទៀតទេ!» នាងបានឆ្លងកាត់បទពិសោធន៍នៃសង្គ្រាម ដែលមើលមិនឃើញរវាងសេចក្តីល្អ និងសេចក្តីអាក្រក់ ហើយនាងក៏ចង់ដឹងអំពីរបៀបការពារ ដើម្បីឱ្យនាងរួចផុតពីខាងងងឹតនេះផងដែរ។ ដូច្នេះ ខ្ញុំក៏បានបង្រៀននាងអំពីព្រះយេស៊ូវ និងព្រះគម្ពីរ។ នាងបានអធិដ្ឋានសូមឱ្យព្រះយេស៊ូវជួយដល់នាង ឱ្យលះបង់កំហឹង និងការចងគំនុំទៅកាន់មនុស្សដែលបានធ្វើបាបនាងកាលពីមុន។ នាងក៏បានទូលសូមឱ្យព្រះអាទិករប្រទានចិត្តដ៏ល្អមួយដល់នាង ព្រមទាំងការពារនាងឱ្យរួចផុតពីវិញ្ញាណអាក្រក់ផងដែរ។ នាងបានធ្វើបែបនេះ ហើយពួកវិញ្ញាណអាក្រក់ក៏លែងមកធ្វើបាបនាងតទៅទៀតដែរ។

តើលោកអ្នកចង់បានអំណាចការពាររបស់ព្រះយេស៊ូវដែរឬទេ? លោកអ្នកអាចអធិដ្ឋានយ៉ាងដូច្នេះថា៖ 

ឱព្រះជាម្ចាស់អើយ ទូលបង្គំត្រូវការជំនួយរបស់ទ្រង់។ សូមទ្រង់ជួយបណ្តេញពួកវិញ្ញាណអាក្រក់ទាំងឡាយចេញពីជីវិតរបស់ទូលបង្គំផង។ សូមទ្រង់ប្រទាននូវចិត្តថ្មីមួយដល់ទូលបង្គំ ព្រមទាំងចាត់ទេវតាដ៏បរិសុទ្ធមកការពារទូលបង្គំផង។ ទូលបង្គំសូមអធិដ្ឋានទូលសូម ដោយនូវព្រះនាមព្រះយេស៊ូវ។ អាម៉ែន។

ប្រសិនបើលោកអ្នកចង់ឱ្យព្រះយេស៊ូវជួយលោកអ្នក ឬជួយដល់មនុស្សជាទីស្រឡាញ់របស់លោកអ្នកឱ្យមានសេរីភាពពីពួកវិញ្ញាណអាក្រក់នោះ សូមទំនាក់ទំនងមកយើងតាមព័ត៌មាននៅលើខ្នងក្រដាសនេះ។