တၢ်ပူၤဖျဲးဒီးတၢ်ဝံတၢ်ကလၤ

ဘၣ်တဂီၤလၢအ့ရှၢၣ်မုၣ်ထီၣ်ကလံၤထံးန့ၣ်, ဖဲယဟးထီၣ်လၢယကလဲၤဆူကျးပူၤအဆၢကတီၢ်, ပှၤအိၣ်လၢယဟံၣ်ဃၢၤတဂၤဃ့ၢ်ထီၣ်လၢအဟံၣ်ပူၤ, ဒီးဟဲဃ့ၢ်ဝဲလိၤလိၤဆူယအိၣ်ကိးပသူလၢအကလုၢ်ဖးဒိၣ်, ဒီးဝံၢ်ဝၢ်ဝဲဒီဖးဒိၣ်ခံဘ့ၣ်လၢအစုခံခီလိၤန့ၣ်လီၤ. အမဲာ်ဖျါလီၤပျံၤလီၤဖုးဒီးယပလၢၢ်ဘၣ်တၢ်ခံးဒီးတၢ်အၢအိၣ်ဝးတရံးန့ၣ်လီၤ. မ့ၢ်လၢယကဲခရံာ်ဖိတဂၤအဃိ, ယစးထီၣ်ဃ့ထုကဖၣ်တၢ်ကစုဒုလၢတၢ်ကဒီသဒၢယၤအဂီၢ်န့ၣ်လီၤ. ဖဲယဃ့ဘါထုကဖၣ်တၢ်အခါ, တၢ်ဝံတၢ်နါဘၣ်တၢ်မၤနၢၤအီၤဒီးယတံၤသကိးအသးဂၢၢ်ထီၣ်က့ၤဝဲန့ၣ်လီၤ. တဘျီန့ၣ်အဝဲပျဲယၤလၢယကဟံးထီၣ်ကွံာ်ဒီလၢအစုပူၤန့ၣ်လီၤ. 

ယ့ၣ်ရှူးအတၢ်စိတၢ်ကမီၤ 

ပှၤလၢအကထိတဖၣ်လဲၤခီဖျိဘၣ်ဝဲယ့ၣ်ရှူးအတၢ်စိတၢ်ကမီၤအဝဲအံၤန့ၣ်လီၤ. အဝဲသ့ၣ်ထူၣ်ဖျဲးထီၣ်လၢတၢ်ဝံတၢ်နါအတၢ်ဒိးအီၤအပူၤ, ဘျါက့ၤလၢတၢ်ဆူးတၢ်ဆါ, တၢ်ဒီသဒၢလၢတၢ်ဆိၣ်အၢတဖၣ်အပူၤ, ဒီးဘၣ်တၢ်မၤပူၤဖျဲးလၢနီၢ်ခိတၢ်ဘၣ်ဒိဘၣ်ထံးန့ၣ်လီၤ. ဘၣ်ဆၣ်, ယ့ၣ်ရှူးမ့ၢ်မတၤလဲၣ်. ယ့ၣ်ရှူးအတၢ်စိတၢ်ကမီၤမၤအသးဒ်လဲၣ်. ယ့ၣ်ရှူးအပူန့ၣ်ဘၣ်တၢ်ထံၣ်န့ၢ်အီၤလၢခရံာ်ဖိအတၢ်ကွဲးစီဆှံ, လံာ်စီဆှံအပူၤန့ၣ်လီၤ. ဖဲအံၤ, မ့ၢ်ပူတယုၢ်လၢယ့ၣ်ရှူးအစိကမီၤမၤနၢၤကွံာ်တၢ်ဝံတၢ်နါအဂ့ၢ်န့ၣ်လီၤ.

ဘၣ်တနံၤန့ၣ်, ပၢ်တဂၤဟဲစိာ်အဖိခွါဆူယ့ၣ်ရှူးအိၣ်န့ၣ်လီၤ. အဝဲစံးဝဲဒၣ် “သရၣ်ဧၢ, ယဃ့ကညးနၤလၢနကကွၢ်စာ်ယဖိခွါတက့ၢ်. အဂ့ၢ်ဒ်အံၤ, မ့ၢ်ယဖိတဂၤဃီလီၤ. ဒီးကွၢ်ကွၢ်တၢ်နါဟံးန့ၢ်အီၤ, ဒီးအဝဲကိးပသူထီၣ်လၢသတူၢ်ကလာ်, ဒီးပျူၢ်ထိးထီၣ်ဝဲ, ဒီးအထးခိၣ်သဘှဲထီၣ်, ဒီးမၤသဘှံးအီၤ, ဒီးဟးထီၣ်ကီမးလီၤ..., ဒီးအဝဲလီၤဃံၤဝဲလၢမ့ၣ်အူပူၤ, ဒီးဆူထံကျါတလီၢ်လီၢ်တလီၢ်လီၢ်လီၤ.” ယ့ၣ်ရှူးကိးဖိသၣ်ပိာ်ခွါလၢကဟဲဆူအအိၣ်န့ၣ်လီၤ.ဘၣ်ဆၣ်, တၢ်နါဆီၣ်လီၤဃံၤအီၤလၢဟီၣ်ခိၣ်ဒီးမၤပျူၢ်ထိးထီၣ်အီၤလီၤ.

ယ့ၣ်ရှူးတူၢ်ဘၣ်တၢ်လၢပၢ်ဒီးဖိခွါခံဂၤလၢာ်အဂီၢ်န့ၣ်လီၤ. အဝဲစံးဝဲဒၣ်, “နနာ်တၢ်မ့ၢ်သ့ဒီးတၢ်သ့တၢ်လၢာ်လၢပှၤလၢအနာ်တၢ်အဂီၢ်န့ၣ်လီၤ.”

ဖိသၣ်ပါန့ၣ်ဟီၣ်ကိးပသူထီၣ်ဝဲ “ယနာ်လီၤ.ယတၢ်တနာ်ဘၣ်အံၤမၤစၢၤလၢ်တက့ၢ်.” 

ယ့ၣ်ရှူးမၤလိာ်တၢ်နါလၢ “‘ဟးထီၣ်ကွံာ်လၢအလိၤတက့ၢ်, ဒီးနုာ်လီၤလၢအပူၤနီတဘျီလၢၢတဂ့ၤ.’ တုၤနုၤတစုတၢ်နါကိးပသူထီၣ်, ဒီးမၤပျူၢ်ထိးထီၣ်အီၤနးမး, ဒီးဟးထီၣ်ကွံာ်ဝဲလၢအအိၣ်န့ၣ်လီၤ” (လူၤကၣ် ၉း၃၇-၄၂, မၢ်ကူး ၉း၁၇-၂၇).

ပှၤအိၣ်ဒီးတၢ်ကိၢ်တၢ်ဂီၤလၢအတူၢ်ဘၣ်တၢ်ဒ်ပၢ်တဂၤအံၤအသိးအိၣ်ဝဲအါမး, မ့ၢ်လၢတၢ်ဝံတၢ်နါတဖၣ်မၤအၢမၤနးအပှၤဟံၣ်ဖိဃီဖိအဃိန့ၣ်လီၤ. ပှၤတနီၤနီၤန့ၣ်မံဝဲတန့ၢ်ဘၣ်. ပှၤတနီၤနီၤအိၣ်ဝဲဒီးတၢ်ဆိးက့မံနီၤန့ၣ်လီၤ. ပှၤတနီၤနီၤနၢ်ဟူဝဲတၢ်ကလုၢ်လၢအလီၤတိၢ်လီၤဆီန့ၣ်လီၤ. ပှၤတနီၤနီၤဘၣ်တၢ်ဒိးအီၤတၢ်ဝံတၢ်နါလၢအဂံၢ်ဆူၣ်ဘါဆူၣ်ဒီးမၤပျံၤမၤဖုးပှၤကညီဒီသဝီန့ၣ်လီၤ. ဘၣ်ဆၣ်, အဝဲသ့ၣ်လိၣ်ဘၣ်ဝဲတၢ်မၤစၢၤဒိၣ်မးလီၤ. 

အဝဲအံၤ, မ့ၢ်တၢ်ကစီၣ်လၢအမုာ် - နဃ့တၢ်လၢယ့ၣ်ရှူးအိၣ်သ့ဒီးဃ့အီၤလၢကဒီသဒၢနၤလၢတၢ်ဝံတၢ်နါအစိကမီၤအိၣ်တက့ၢ်.

တၢ်မၤစၢၤလၢတလၢာ်ကျိၣ်စ့

ပှၤကူစါတၢ်လၢနီၢ်သးတဖၣ်ဒီးတၢ်ဝံတၢ်နါသရၣ်တဖၣ်ဃ့ဝဲကျိၣ်စ့အါမး, တချူးလၢအဝဲသ့ၣ်ကမၤစၢၤဝဲပှၤလၢတၢ်ကီတၢ်ခဲသ့ၣ်တဖၣ်အံၤဒံးဘၣ်န့ၣ်လီၤ. 

ဖဲအံၤမ့ၢ်တၢ်ကစီၣ်လၢအမုာ်ဒိၣ်မး - ယ့ၣ်ရှူးအတၢ်မၤစၢၤတလၢာ်ကျိၣ်စ့ဘၣ်. 

တၢ်မၤဆိအသးလၢလံာ်စီဆှံပူအပူၤန့ၣ်, ယ့ၣ်ရှူးတသးလီကျိၣ်စ့လၢဟံၣ်ဖိဃီဖိလၢအဘၣ်နးဘၣ်ဖှီၣ်တဖၣ်အအိၣ်န့ၣ်ဘၣ်. ယ့ၣ်ရှူးလိၣ်ဘၣ်ထဲလၢအဝဲသ့ၣ်ကနာ်အီၤန့ၣ်လီၤ. ယ့ၣ်ရှူးအဲၣ်ပှၤကညီဒီးသးအိၣ်မၤဖှံလီၤဝဲအဝဲသ့ၣ်အတၢ်ကီတၢ်ခဲတဖၣ်ဒ်လၢမိၢ်ပၢ်လၢအဂ့ၤသးအိၣ်ကဟုကယာ်အဖိအသိးန့ၣ်လီၤ. 

လံာ်စီဆှံသိၣ်လိပှၤလၢယ့ၣ်ရှူးမ့ၢ်တၢ်ဘၣ်တ့ခဲလၢာ်အကစၢ်န့ၣ်လီၤ. အဝဲဟဲလီၤမၤစၢၤပှၤဟီၣ်ခိၣ်ဖိလၢကစူၢ်က့ၤနာ်က့ၤအီၤအဂီၢ်လီၤ. ဒ်တၢ်ဘၣ်တ့ကစၢ်အသိး, အဝဲအိၣ်ဒီးတၢ်စိတၢ်ကမီၤလၢကမၤထူၣ်ဖျဲးထီၣ်က့ၤဟီၣ်ခိၣ်အံၤလၢတၢ်အၢတၢ်သီ, တၢ်နးတၢ်ဖှီၣ်ဒီးတၢ်သံတၢ်ပှၢ်အပူၤန့ၣ်လီၤ. ဒ်လဲၣ်. 

လံာ်စီဆှံစံးဝဲဒၣ်တဘျီအခါလၢဟီၣ်ခိၣ်အံၤတၢ်အၢတၢ်သီ, တၢ်နးတၢ်ဖှီၣ်, မ့တမ့ၢ်တၢ်သံတၢ်ပှၢ်တဖၣ်တအိၣ်ဘၣ်န့ၣ်လီၤ. တၢ်ခဲလၢာ်အိၣ်ပှဲၤဝဲဒီးတၢ်ဃူတၢ်ဖိးန့ၣ်လီၤ. ဘၣ်ဆၣ်တၢ်ခဲလၢာ်ဆီတလဲအသးဖဲလၢမူခိၣ်ကလူးလၢယွၤတ့လီၤဝဲတဂၤစးထီၣ်ပူထီၣ်တၢ်အခါန့ၣ်လီၤ. မူခိၣ်ကလူးတဂၤအံၤသးကါဝဲကစၢ်လၢတ့လီၤအီၤတဂၤန့ၣ်လီၤ. အဝဲစးထီၣ်ရၤလီၤတၢ်လီတၢ်ဝ့ၤတဖၣ်ဆူမူခိၣ်ကလူးအဂၤတဖၣ်အကျါဒီးမၤန့ၢ်ဝဲကလူးသၢပူတပူန့ၣ်လီၤ. တပူၤဃီပာ်တၢ်ကမၣ်လၢကစၢ်ယွၤလၢအမ့ၢ်ပှၤလၢအလီၤဒိဒီးတၢ်စိတၢ်ကမီၤဒီးအဲၣ်လီၤထဲဒၣ်အသးန့ၣ်လီၤ.

တၢ်ဘၣ်တ့ကစၢ်ကဘၣ်မၤဝဲတၢ်ဃုထၢလၢကီမးတခါန့ၣ်လီၤ. မ့မ့ၢ်အဝဲမ့ၢ်တြီဆူၣ်အဝဲသ့ၣ်လၢကပတုာ်—မ့တမ့ၢ်တုၤဒၣ်လဲာ်မၤဟးဂီၤအဝဲသ့ၣ်ဒီး—မူခိၣ်ကလူးအဂၤတဖၣ်ဒီးမူဟီၣ်ကယၢဖိခဲလၢာ်ကထံၣ်ဝဲလၢတၢ်ပာ်တၢ်ကမၣ်လၢတတီတလိၤဘၣ်အံၤန့ၣ်တီဝဲဘၣ်ဝဲန့ၣ်လီၤ. တၢ်ဃုထၢအဂၤတမံၤကမ့ၢ်ဝဲလၢကပာ်မူဒံးမူခိၣ်ကလူးလၢအပူထီၣ်တၢ်တဖၣ်လၢတၢ်ပျဲအဝဲသ့ၣ်အတၢ်မၤအၢသီကကဲထီၣ်က့ၤတၢ်အုၣ်ကီၤလၢအထီဒါအဝဲသ့ၣ်အတၢ်ပာ်ဒ့ၣ်ပာ်ကမၢ်ယွၤန့ၣ်လီၤ. တဘျီန့ၣ်, တုၤမ့ၢ်တၢ်အဆၢအကတီၢ်ဘၣ်ဒီး, တၢ်ဘၣ်တ့ကစၢ်ကမၤကတၢၢ်ကွံာ်တၢ်ပူထီၣ်တၢ်န့ၣ်လီၤ. 

ဖဲလၢတၢ်ပူထီၣ်ဝံၤအလီၢ်ခံ, ပမိၢ်ဒိၣ်ပၢ်ဒိၣ်တဒိကနၣ်ကစၢ်ယွၤအတၢ်ဟ့ၣ်ပလီၢ်ဘၣ်အဃိ, တၢ်ပျဲဝဲကလူးအၢသီတဖၣ်ပၢဘၣ်ဟီၣ်ခိၣ်န့ၣ်လီၤ. ကလူးတဖၣ်အံၤ, အခဲအံၤကွဲန့ၢ်လွဲန့ၢ်ဒီးမၤဆူးမၤဆါဝဲပှၤကညီတဖၣ်န့ၣ်လီၤ. သနာ်က့ တၢ်ဘၣ်တ့ကစၢ်အစိကမီၤဒိၣ်န့ၢ်ဒံးကလူးအၢသီတဖၣ်တက့ၢ်လီၤ. ဒီးဖဲပဃ့တၢ်လၢအီၤအခါန့ၣ်အဝဲကမၤစၢၤပှၤလၢတၢ်သးခုအပူၤန့ၣ်လီၤ. 

ဟဲဆူနတၢ်ပူၤဖျဲးအလီၢ်

နသ့ၣ်နီၣ်ယတံၤသကိးလၢယဟံၣ်ဃၢၤလၢဂုာ်ကျဲးစၢးထီဒါယၤတဂၤန့ၣ်ဒံးဧါ. ဖဲအဝဲပာ်လီၤဒီလၢအစုပူၤဝံၤအလီၢ်ခံ, တၢ်ကလုၢ်လၢလီၤပျံၤလီၤဖုးဟဲသီၣ်ထီၣ်လၢအထးခိၣ်ဒီးစံးလီၤအသးလၢအမ့ၢ်ဝဲအမိၢ်လၢအသံတ့ၢ်တဂၤန့ၣ်အဝံအကလၤန့ၣ်လီၤ. တၢ်လၢကလူးအၢသီတဖၣ်အံၤဃ့တၢ်လၢပှၤကလုၢ်ထီၣ်တၢ်အီၣ်တၢ်အီဆူအဝဲသ့ၣ်အိၣ်န့ၣ်လီၤ. ယဃ့ဘါထုကဖၣ်တၢ်ဒီးပှၤလၢအိၣ်ဒီးယၤတဖၣ်, ဃ့လၢယွၤကနီဟးထီၣ်တၢ်ဝံတၢ်နါအံၤန့ၣ်လီၤ. လၢခံကတၢၢ်န့ၣ်, တၢ်ဝံတၢ်နါဟးထီၣ်ကွံာ်လၢအပူၤဒီးယသကိးလၢယဟံၣ်ဃၢၤတဂၤအံၤအသးက့ၤဘၣ်လိာ်က့ၤဒ်လၢညါအသိးန့ၣ်လီၤ.

အဝဲတဲထီၣ်ဖျဲးဝဲလၢ, “ယတအဲၣ်ဒိးလၢတၢ်အဝဲအံၤကမၤအသးဒီးယၤနီတဘျီလၢၤဘၣ်.” အဝဲလဲၤခီဖျိဘၣ်တၢ်ဂ့ၤဒီးတၢ်အၢအတၢ်ဒုးလၢပထံၣ်အီၤတသ့ဘၣ်, ဒီးအဝဲသးအိၣ်သ့ၣ်ညါဝဲဒ်သိးလၢကဘၣ်ဒီသဒၢလီၤအသးလၢတၢ်အၢတၢ်သီအစုပူၤဒ်လဲၣ်န့ၣ်လီၤ. အဃိန့ၣ်, ယသိၣ်လိအီၤလၢယ့ၣ်ရှူးအဂ့ၢ်ဒီးလံာ်စီဆှံန့ၣ်လီၤ. အဝဲဃ့ဘါထုကဖၣ်တၢ်လၢကစၢ်ယ့ၣ်ရှူးအိၣ်, ဒ်သိးလၢကမၤစၢၤအီၤလၢအတၢ်သူၣ်ဒိၣ်သးဖျိးတဖၣ်ကလီၤမၢ်ကွံာ်အဂီၢ်ဒီးအတၢ်သးဆါဘၣ်ပှၤလၢအမၤဆါဘၣ်အီၤတဖၣ်ကဟါမၢ်ကွံာ်ဝဲအဂီၢ်န့ၣ်လီၤ. အဝဲဃ့စ့ၢ်ကီးတၢ်ဘၣ်တ့ကစၢ်လၢကဟ့ၣ်အီၤသးလၢအဂ့ၤတဖျၢၣ်ဒီးကဒီသဒၢအီၤလၢတၢ်အၢတၢ်သီအအိၣ်န့ၣ်လီၤ. အဝဲမၤဝဲတၢ်အံၤ, ဒီးတၢ်ဝံတၢ်နါတဖၣ်တဟဲက့ၤမၤနၢၤအီၤနီတဘျီလၢၤဘၣ်.

မ့ၢ်နအဲၣ်ဒိးလဲၤခီဖျိဘၣ်ယ့ၣ်ရှူးအတၢ်စိတၢ်ကမီၤလၢဒီသဒၢတၢ်န့ၣ်ဧါ. နဃ့ဘါထုကဖၣ်တၢ်ဒ်အံၤသ့ဝဲလီၤ - 

တၢ်အဲၣ်ပၢ်သးဘိယွၤဧၢ, ယလိၣ်ဘၣ်နတၢ်မၤစၢၤလီၤ. ဝံသးစူၤထုးထီၣ်ကွံာ်န့ၢ်ယၤတၢ်သူၣ်အၢသးသီလၢယတၢ်အိၣ်မူအပူၤတက့ၢ်. ဟ့ၣ်က့ၤယၤသးလၢအသီဒီးဆှၢလီၤမူခိၣ်ကလူးတဖၣ်လၢကဒီသဒၢယၤန့ၣ်တက့ၢ်. ယဃ့တၢ်အံၤလၢယ့ၣ်ရှူးအမံၤလီၤ. အၤမ့ၣ်.

နမ့ၢ်သးအိၣ်လၢယ့ၣ်ရှူးကမၤစၢၤနၤမ့တမ့ၢ်ပှၤလၢနအဲၣ်အီၤတဂၤကထူၣ်ဖျဲးထီၣ်လၢတၢ်အၢတၢ်သီအပူၤဒီး, ဝံသးစူၤဆဲးကျိးပှၤလၢတၢ်ဂ့ၢ်တၢ်ကျိၤအိၣ်လၢလံာ်ကဘျံးပၤလၢအလီၢ်ခံတကပၤအံၤန့ၣ်တက့ၢ်.

လံာ်စီဆှံဆၢတဖၣ်ဘၣ်တၢ်ဟံးန့ၢ်အီၤလၢကညီလံာ်စီဆှံအပူၤလၢဘၣ်တၢ်ကျိာ်ထံအီၤလၢသရၣ်မ့ၤစံၣ်လၢတၢ်စဲကျံးရၤလီၤဖဲ (၁၈၅၃) နံၣ်န့ၣ်လီၤ. တၢ်စူးကါအီၤခီဖျိတၢ်ဟ့ၣ်တၢ်ပျဲန့ၣ်လီၤ. တၢ်ပျဲခဲလၢာ်ဘၣ်တၢ်ဒိးန့ၢ်အီၤလၢတၢ်ကွဲးဒိတၢ်ပျဲဝံၤလံ.