
क्षमा ग्रहण
सारांश
हामी सबैले जीवनमा गल्तीहरू गर्छौं। के हामी कर्मको तीखो प्रहारको प्रतीक्षा गराैं, वा के ईश्वरीय क्षमा भन्ने कुरा छ त? सृष्टिकर्ता परमेश्वरले पापीहरूलाई कसरी खुल्ला हातले स्वागत गर्नुहुन्छ र एक क्षणमै जीवनभरको पाप क्षमा गर्न सक्नुहुन्छ भन्ने कुरा देखाउँदै यो पर्चाले येशूले भन्नुभएको उडन्ते पुत्रको दृष्टान्तको स्वदेशी संस्करण बताउँछ।
प्रकार
पर्चा
प्रकाशक
Sharing Hope Publications
उपलब्ध भाषाहरूको सङ्ख्या
8 भाषाहरू
पृष्ठ सङ्ख्या
6
प्रताप धनी जमिनदारको छोरा थियो। तिनीहरू ठूलो घरमा बस्थे र तिनीहरूका धेरै नोकरहरू थिए। प्रतापसँग सधैँ उत्तम कपडाहरू, खाना र शिक्षा थियो—उसलाई थाहा थियो कि उसका आमा-बुबाले उसलाई धेरै माया गर्थे, विशेष गरी उसको बुबाले।
तर जसै प्रताप बढ्दैगयो, ऊ परिवर्तन हुन थाल्यो। पुरानो चलनहरूमा उसको लागि अब कुनै आकर्षण रहेन। बुबाको घर र बुबाका चलनहरूप्रति प्रतिबन्धक महसुस हुन थाल्यो। प्रतापले स्वतन्त्रताको उत्कट इच्छा गरे।
एक दिन प्रतापले आफ्नी आमालाई एक विशेष अनुरोध लिएर बुबाकहाँ जाने माग राख्यो। जब प्रताप आफूले चाहेको के हो भनी उनलाई बतायो, तब उनी डरले पछि हटिन्। तर उनले सोध्न स्वीकार नगरुञ्जेल उसले आमालाई बिन्ती गरिरह्यो। त्यसको लागि केही दिन लाग्यो, तर अन्ततः उनी रुँदै फर्किन्।
उनले आफ्नो छोरालाई हेर्न सकिनन्। उनले भनिन्, “उहाँले त्यो गर्नुहुनेछ। उहाँले हाम्रो आधा सम्पत्ति बेचेर तिमीलाई आफ्नो अंश दिनुहुनेछ। तर किन, मेरो छोरा? किन?”
प्रतापले अलिकति पछुताएको महसुस गऱ्यो, तर ऊ उत्साहित पनि भयो। उसको योजनाले काम गरेको थियो। उसले आफ्नो बुबाको पैसाबाट उसको हिस्सा पाएकाे थियो ताकि उसले आफ्नो इच्छाअनुसार जीवन बिताउन सकोस्।
निरङ्कुश जीवन
प्रताप ठूलो सहरमा सऱ्यो। उसले महँगो र भव्य माथिल्लो तलाको फ्लाट भाडामा लियो र नयाँ साथीहरू बनाउन थाल्यो। चाँडै उसले धनी र प्रख्यात व्यक्तिहरूलाई आकर्षण गर्न पार्टीहरू दिँदैथियो। उसले कारहरू किन्यो, सुन्दरी स्त्रीहरूसँग सुत्यो, र महँगो होटलहरूमा खायो। उसले चाहेको सबै कुरा ऊसँग थियो।
तर एक दिन प्रतापको पैसा सकियो। लज्जित हुँदै, उसले आफ्ना केही नयाँ साथीहरूबाट केही पैसाको सापत माग्यो, तर अचानक तिनीहरूले फोन उठाउन छोडे। उसले आफ्नो तिर्नुपर्ने पैसा तिर्न सकेन। अन्ततः, घर धनीले उसलाई घरबाट निकाल्यो। पैसा र साथीहरूविना ऊ कहाँ जान सक्थ्यो र?
प्रताप अन्योल र चिन्तित भएर सहरभरि घुम्यो। जब घाम अस्ताउन थाल्यो, तब उसलाई डरको महसुस भयो। ऊ कहाँ सुत्ने होला? उसले के खाने होला? प्रतापको जीवनको पहिलो चोटी ऊ सडकमा सुत्यो; उसको पेट भोकले कराउँदैथियो।
पछुतोको सामना
पछिल्ला केही दिनहरूमा प्रतापले सहरमा काम खोज्ने प्रयास गऱ्यो। ऊ सडकमा सुतेको कारणले झुत्रे देखिन्थ्यो, त्यसैले पुरानो भइसकेको होटलको प्रबन्धकबाहेक कसैले पनि उसलाई काम दिँदैनथ्यो। प्रतापले ग्राहकहरूकहाँ खाना पुऱ्याउँदै र टेबुलहरू पुछ्दै घण्टौँ-घण्टासम्म काम गर्थ्यो। उसले धेरै भोक र थकानको महसुस गऱ्यो। उसले यसरी सोच्यो, आफू एक धनी मानिसको छोरा भएर पनि खाना बाँड्दैछु भन्ने कुरा कसरी सम्भव भयो! जब अन्तिम खाना खाने व्यक्ति होटलबाट गयो, तब ऊ भान्छामा भाँडा धुन सहयोग गर्न गयो। उसले फोहोर फ्याँक्ने टोकरीको छेऊमा एउटा थाल देख्यो जसमा आधा खाइसकेको रोटी थियो। उसलाई यति धेरै भोकको महसुस भयो कि उसले झन्डै त्यो लिन पुग्यो।
मलाई के भएको छ? उसले आफैलाई गाली गऱ्यो। मेरो बुबाको घरका नोकरहरूसँग पर्याप्त रोटी छ र उबार्छन् पनि। अनि म यहाँ बाँकी रहेको फोहोरी रोटीद्वारा लोभिएको छु!
उसले भाँडाको थुप्रोलाई हेरिरह्यो र धेरै बेरसम्म सोच्यो।
उसले सोच्यो, म के गर्नेछु सो मलाई थाहा छ। म आफ्ना बुबाकहाँ जानेछु र उहाँलाई भन्नेछु, “बुबा, मैले तपाईंको र परमेश्वरको विरुद्ध पाप गरेको छु। अब उप्रान्त म तपाईंको छोरो हुने योग्यको छैनँ। मलाई तपाईंका ज्यालादार नोकरहरूमध्ये एउटा सरह बनाउनुहोस्।”
एउटै भाँडा नमाझी प्रतापले होटल छोडेर घरतिरको यात्रा सुरु गऱ्यो।
घरतर्फको यात्रा
घरमा फर्किने क्रममा प्रतापसँग सोच्नको लागि धेरै कुराहरू थिए। उसको बुबाले उसलाई देख्दा कस्तो प्रतिक्रिया देखाउनुहुन्छ होला? उसले पुग्ने बेलामा के भन्ने होला भनी पूर्वाभ्यास गऱ्यो, तर यसले उसलाई केही राम्रो महसुस गराएन। अन्ततः, लामो यात्रापछि, उसले टाढाबाट आफ्नो बुबाको घर देख्न सक्यो। ऊ बिस्तारै बाटोमा हिँड्यो।
एक्कासी उसले एक चिच्याहट सुन्यो। प्रायः धेरै शान्त र गम्भीर हुने उसको बुबा त घरबाट बाहिर दगुरेर आए। तिनी प्रतापकहाँ आए र उसलाई कसेर अँगालो हाले। प्रतापलाई आफ्नो मुटु टुक्रन लागेको जस्तो महसुस भयो।
उसले सास निस्सासिँदै भन्यो, “बुबा, मैले तपाईं र परमेश्वरको विरुद्धमा पाप गरेको छु। म तपाईंको छोरा हुन अब योग्यको छैनँ ...”
बुबाले एक शब्द पनि सुनेका छैनन् जस्तै देखिए। तिनको अनुहारमा आँसु बगिरहेको थियो। हल्ला सुनेर घरका नोकरहरू दौडेर आए।
“छिट्टो!” बुबाले तिनीहरूलाई आज्ञा दिए। “उसको लागि कोठा तयार गर्नू! उसको लागि सफा लुगा तयार गर्नू! भोज तयार गर्नू, किनकि हामी उत्सव मनाउनेछौं! यो मेरो छोरो मरेको थियो र फेरि जीवित भएको छ; हराएको थियो र अब पाइएको छ!”
क्षमा ग्रहण
यो कथा हामीले सृष्टिकर्ता परमेश्वरबाट कसरी क्षमा पाउन सक्छौं भन्ने कुरा वर्णन गर्न प्रभु येशू ख्रीष्टले बताउनुभएको दृष्टान्तमा आधारित छ। जब हामी जीवनमा गल्तीहरू गर्छौं—चाहे जति नै ठूलो किन नहोस्—प्रताप आफ्नो बुबाकहाँ फर्केजस्तै हामी पनि परमेश्वरकहाँ फर्कन सक्छौं। हामीले कठिन विधिहरू गर्नुपर्दैन वा बलिदानहरू चढाउनुपर्दैन। परमेश्वरले आफ्ना हातहरू फिँजाएर हाम्रो प्रतीक्षा गर्दैहुनुहुन्छ। हृदयको परिवर्तन नै उहाँ सबैभन्दा महत्त्वपूर्ण मान्नुहुन्छ। हामीले नम्रतापूर्वक हाम्रा पापहरू स्वीकार गर्नुपर्छ, पाप गरेकोमा साँचो रूपमा दुःखी हुनुपर्छ र क्षमा माग्नुपर्छ। के तपाईं परमेश्वरको क्षमाको स्वर्गीय चमत्कार अनुभव गर्न चाहनुहुन्छ? आज र अहिले नै तपाईंले गर्नुभएको हरेक गल्तीबाट शुद्ध पारिन सक्नुहुन्छ। तपाईं यसरी प्रार्थना गर्न सक्नुहुन्छ:
प्रिय परमेश्वर, म हृदयदेखि नै आफ्ना पापहरूको लागि अति क्षमाप्रार्थी छु। प्रभु येशू ख्रीष्टको महान् बलिदानको कारणले कृपया मलाई क्षमा गर्नुहोस् र मलाई सबै अशुद्धताबाट शुद्ध पार्नुहोस्। मलाई भित्रदेखि नयाँ व्यक्ति बनाउनुहोस्। आमेन।
यदि तपाईं प्रभु येशू ख्रीष्टको शिक्षाको बारेमा थप जान्न चाहनुहुन्छ भने, कृपया हामीलाई यस कागजको पछाडिको जानकारीमा सम्पर्क गर्नुहोस्।
Copyright © 2023 by Sharing Hope Publications. व्यापारिक उद्देश्यको लागि बाहेक यो लेख अनुमति विना नै छाप्न र बाँड्न पाइन्छ।हाम्रो समाचार पत्र पाउनको लागि सदस्य बन्नुहोस्
नयाँ प्रकाशनहरू उपलब्ध हुँदा थाहा पाउने पहिलो व्यक्ति बन्नुहोस्!

तपाईंको श्रोता वर्ग खोज्नुहोस्
विशेष प्रकाशनहरू
© 2023 Sharing Hope Publications