Kaba Ïoh ïa ka Jingmap

U Pratap u long u khun jong u jamindar bariewspah. Ki sah ha ka iing kaba heh bad ki don bun ki shakri. U Pratap u ju don ki jaiñ kiba bha tam, ka jingbam bapahuh, bad ruh ka jingnang jingstad—u tip ba ki kmie ki kpa jong u ki ieid eh ïa u, khamtam u kpa jong u. 

Hynrei katba u Pratap u dang heh dang san, u la sdang ban kylla. Ïa ki jinglong barim baroh um sngewtynnad shuh. Ka ïing u kpa bad ki rukom long u kpa ki la sdang ban sngewpyrkhing ïa u. U Pratap u thrang ban ïoh laitluid. 

Ha kawei ka sngi, u Pratap u la kyrpad ïa la ka kmie ban leit rah kawei ka jingkyrpad ba kyrpang sha u kpa jong u. Haba u la ïathuh ha ka, ïa kaei kaba u kwah, ka la kynran dien da ka jingsngewtriem. Hynrei u la ïai kyrpad ïa ka haduh ba kan da kular ban kylli. Ka la shim por katto katne sngi, hynrei ha kaba kut ka la wan phai, da ka jingïam bad jingsngewsih. 

“Un sa leh ïa kane,” ka la ong, khlem da lah shah shuh ban peit ïa la u khun. “Un sa die shiteng na ka jingdon jingem jong ngi baroh bad un ai noh ïa ka jingïoh pateng jong phi. Hynrei balei, ko khun? Balei?”

U Pratap u sngewbabe khyndiat, hynrei u sngewtynnad ruh kumjuh. Ki jingthmu jong u ki la treikam. Un sa ïoh ïa ka bhah jong u na ka pisa u kpa khnang ba un lah ban im katba u mon.

Ka jingim phathar awria

U Pratap u la leit noh sha ka nongbah kaba kham heh. U la wai ka ïingsah ba rem dor bad u la sdang ban ïoh bun ki paralok thymmai. Shen u la pynlong ki jingkhawai kiba pynshoh bieit bad khring ïa ki riewspah bad ki riewpawnam. U la thied ki kali, thiah bad ki kynthei bhabriew, bad bam ki jingbam rem dor. U la ïoh baroh kat kaba u kwah.

Hynrei ha kawei ka sngi, ki pisa jong u Pratap ki la sdang lut. Da ka jinglehraiñ, u la pan pisa kylliang na ki paralok thymmai jong u, hynrei kyndit kynsan ki khlem jubab ne kren shuh ia u. Um lah shuh ban siew ïa ki ram ki shah. Ha kaba khatduh, u trai ïing u la pynmih noh ïa u na ka ing sah. Khlem pisa bad khlem paralok, shano un leit?

U Pratap u la shu ïaid lamwir hapoh ka nongbah, klumar bad khuslai ki jingmut jingpyrkhat. Haba ka sngi ka sep bad la sdang ban dum, la wan ka jingsheptieng. Hangno un thiah? Kaei un bam? Ha ka sien banyngkong ka jingim jong u, u Pratap u la hap ban thiah ha surok, ka kpoh jong u ka kynruh da ka jingthngan.

La wan ka Jingbabe

Ha ki khyndiat sngi kiba bud, u Pratap u la pyrshang wad kam hapoh kata ka nongbah. U la ijot bad jaboh rathai namar ba u thiah ha surok, te kumta ym don uwei ruh u ban ai kam ïa u, lait noh tang uwei u nongpeit ïa kawei ka jaka bam ba tad dor. U Pratap u la trei da ki kynta hangta, ban rah jingbam sha ki nongbam bad ñiad pynkhuid ïa ki miej. U la sngewthngan eh bad thait haduh katta katta. U la pyrkhat kumno ka lah ban long ba ma u, u khun jong u riewspah un hap ban sam jingbam! Haba u nongbam uba khatduh u la mih noh na ka jaka bam, u la leit sha ka jaka shet ban ïarap sait ki tiar. U la ïohi ïa ki pliang hajan ka jaka bret jingbam lem bad u atta ba la iehnoh noh shiteng. U la sngewthngan haduh katta katta ba u la jan shim ïa uta u jingbam ba la bret.

Kaei kaba jia ïa nga? U la kren bitar ïa lade. Wat ki shakri ha ïing u kpa jong nga ki don shibun ki atta ban bam pura, bad dang tam ruh. Bad ma nga hangne, nga kwah bam ïa kine ki jingbam basah tam jong kiwei!

U la peit seh hajuh ïa kita ki tiar ban sait bad u la pyrkhat shi slem bha.

Nga tip kumno ngan leh, u la pyrkhat. Ngan leit phai pat sha i pa bad ngan ong ha u, “Ko pa, nga la leh pop pyrshah ïa phi bad pyrshah ïa U Blei. Ngam don hok shuh ban long u khun jong me. Sngewbha pynlong ïa nga tang kum uwei na ki shakri jong me.”

Khlem da pyndep sait wat tang kawei ruh ka tiar, u Pratap u la ieh ïa kata ka jaka bam bad u la sdang ïa ka lynti iaid sha la ïing.

Ka Jingwanphai sha la ïing

U Pratap u la don shibun ki jingpyrkhat katba u dang ïaid sha ïing. Kumno u kpa jong u un leh ne ong haba un da ïohi ïa u? U la ïai ban biang bun sien ïa kaei kaba un ong ynda la poi ïing, hynrei kata kam wanrah jingsuk ha ki jingmut jingpyrkhat jong u. Ha kaba khatduh, hadien ka jingïaid lynti kaba jngai, u la ïohi ïa ka ïing u kpa jong u naduh na jngai. U la ïaid kham suki ha ka lynti.

Kyndit kynsan, u la ïohsngew ïa ka jingpyrta. U kpa jong u, uba ju long uba jai jai bad don burom eh, u la mareh shabar na la ka ïing. U la wan mareh sha u Pratap bad kdup sbak ïa u. U Pratap u sngew kumba ka dohnud jong u kan pait. 

“Ko pa,” u la ong hapdeng ki ummat, “nga la leh pop pyrshah ïa phi bad pyrshah ïa U Blei. Ngam don hok shuh ban long u khun jong phi. . .”

U kpa pat ikumba u khlem ïohsngew wat tang shikyntien ruh. Ki ummat ki tuid na ki khmat jong u. Kï shakri shakor ha ka ïing ki la ïohsngew ïa kaba la jia bad ki la wan shata. 

“Pynkloi!” U kpa u la hukum ïa ki. “Khreh ka kamra jong u! Wanlam ki jaiñ bathymmai na ka bynta jong u! To pynkhreh ka jingkhawai, namar ngin leh kmen lang baroh! Une u long u khun jong nga—u la ïap bad u la im pat; u la jah bad mynta la shem pat ïa u!”

Kaba Ïoh ïa ka Jingmap

Kane ka long ka jingïathuhkhana kaba la shim na ka pharshi ïa kaba la ïathuh da U Trai Jisu Khrist ban batai kumno ngi lah ban ïoh jingmap na U Blei Nongthaw jong ngi. Haba ngi la leh bakla ha ka jingim—wat ki jingbakla ba khraw ruh—ngi lah ban phai sha U Blei kumba u Pratap u la phai sha la u kpa jong u. Ngim donkam ban ai jingkñia ba har rukom ne leh ki kam thamula. U Blei U ap ïa ngi da ki kti ba la kner jong u. Ka long ka jingkylla jong ka dohnud ïa kaba U kheiñ kor tam. Ngi dei ban phla da ka jingsngewrit ïa ki pop jong ngi bad ruh ban sngewsih shisha namar kita ki pop, bad pan ruh ïa ka jingmab. Hato phi kwah ban ïoh mad ïa ka kambah jong ka jingmab ei U Blei? Phi lah ban long uba khuid mynta, mynta hi, na baroh kita ki kam sniew kiba phi la ju leh. Phi lah ban duwai kumne:

A Blei, nga sngewsih shisha ïa baroh ki pop jong nga. Sngewbha mab ïa nga bad pynkhuid ïa nga na baroh ki jinglong bymkhuid namar ka jingkheiñduh bakhraw jong U Trai Jisu Uba long U Khrist. Pynlong ïa nga u briew uba thymmai. Amen.

Lada phi kwah ban tip kham bniah shaphang ki jinghikai U Trai Jisu, sngewbha peit ia ki phone number sha dien jong kane ka kot bad sa phone sha ngi.