Ngaihdamna Changin

Pratap-a chu loneitu hausa tak fapa a ni a. In lian takah chengin chhiahhlawh tam tak an nei a. Pratap-a hian thuamhnaw-ah te, ei leh inah te leh, zirna thlengin a tha ber ber a nei thin a. A nu leh a pa te chuan an hmangaih tih a hria a, a bikin a pa hian a hmangaih tak zet a ni tih a hre chiang hle. 

Mahse, Pratap-a chu lo thang lian zelin, a inthlak danglam ve tial tial a. Hmana nuam a tih thinte kha nuam a ti viau tawh lo. A pa in leh a pa duhdante chu a thaw-ipik thlak a ti tan ta deuh a. Pratap-a chuan zalen taka awm a chak a ni. 

Ni khat chu, Pratap-a chuan a nu chu a pa hnena kala, a bik taka dilna thlensak turin a ngen chiam a. A thil duh chu a han hrilh chuan, a nu chuan mak a tiin a thin a thawng ngei mai. Mahse a ngen luih tlat avangin a remti ta a. Ni tam tak hnuah chuan a nu chu tap chungin a rawn kir a. 

A fapa pawh en tha ngam lo chuan, “A tih sak ngei ang che. Kan neih zawng zawng zat ve a hralh ang a, tichuan i ro chan ai chu a pe ang che. Mahse, eng nga ti nge ka fapa? Eng nge a chhan?” a ti a.

Pratap-a chuan nuam a ti chiah lo naa, mahse a phur kher mai. A tumah a hlawhtling a ni. A pa hnen atang chuan a rochan ai a hmuh dawn takah chuan a duh dan ang takin a nung thei tawh dawn a ni.

Nawmsitbawlna Nun chu

Pratap-a chu khawpui lamah a pem ta a. In ropui man to tak a luah a, thian thar a siam chho ta nghal a. Mi hausa leh mi langsar takte hipna tur party a siam ta fo a. Car nalh tak takte leiin, nula chhe lo tak takte a kawp a, restaurant changkang tak takahte a chawlhpui thin a ni. A lo duh thin zawng zawngte chu a nei ta a.

Mahse, ni khat chu, Pratap-a ro sumte chu a zo ta a. A mualpho thlak ti tak chung chuan a thian tharte hnenah chuan sum puk a dil a, mahse tumah chuan a ngenna chu an ti hlawhtling duh ta reng reng si lo a. Bill-te chu a pe thei ta lo. A tawpah chuan a inluahna atang chuan hnawhchhuah a tawk ta nghe nghe a ni. Sum leh thiante tello chuan khawiah nge a kal tak ang?

Pratap-a chu khawpui-ah chuan, hrilhhai leh mangang takin a vakvai a. Ni a tlak chuan hlauhna chuan a rawn tuam vel ta a. Khawiah nge a mut tak ang? Eng nge a ei tak ang? A hriattheih tirh ata a vawikhatna atan Pratap-a chu kawtthlerah a mut a lo ngai a, riltam avangin a pum a ri ruih ruih mai a.

Inchhirna Takin

A hnu ni eng nge maw tichhung chu, Pratap-a chuan khawpuiah hnathawh tur a zawng thin a. Mahse kawtthlera tal ta mai mai chu a hmel pawh a pawr tawh hle a, tuman hnathawh tur pawh an pe duh lo a ni. Mahse kawtthlera thingpui dawr neitu pakhat chuan lo khawngaih hlauhin, thingpui dawrah chuan a chhawr ta a. Pratap-a chu darkar tam tak hna thawkin, dawhkan seng fel te, ei tur chhawp hna te a thawk ta a. A ril a tamin a chau thin ngei mai. Mi hausa tak fapa, thingpui dawra chaw sem a, rethei taka a inhlawh ngai ta mai chu mak a inti hle a ni! Restaurant-a a thawhnaa dawrtu hnuhnung berte an haw hnuah, choka lamah thleng silpui turin a kal a. Bawlhlawh bawm bulah chuan mi chhang ei bang a hmu a. A ril a tam em avangin a’n ban deuh zuau a.

Engatinge tihian ka awm tak le? tiin amah leh amah chu a inhau ta hrep a. Ka pa inah khan chhiahhlawhte tak ngial pawhin an kham khawp ei tur an nei a, an ei sen loh a awm rei rui thin kha a ni si a. Kei, hetah mite ei bang tawp takte pawh ei ka chak ta mai si a!

Thleng sil tur vum thur mai chu enin rei tak chhung a inngaihtuah a.

Ka tihtur ka hre ta tiin a inngaihtuah a. Ka pa hnenah ka kir leh ang a, “Ka pa, Pathian leh i chungah ka lo tisual ta a ni e. I fapaa vuah tlâk ka ni ta lo. I hnêna inhlawhfa pakhat angin mi chhawr ve rawh.” tiin.

A thleng sil lai chu a dah rawk a. Chu thingpui dawr a inhlawhna chu kalsanin a pa in lam pan chuan a kal ta a.

In lamah Hawin

Pratapa chuan in lam a haw kawngah chuan thil tam tak a ngaihtuah a. A pa chuan amah a hmuh hunah engtin tak ngai ang maw? A pa hnena a sawi tur chu a chham chhin mawlh mawlh a, mahse a ngaih a tha thei mawlh lo. A tawpah chuan, zinkawng thui tak a zawh hnuin, hla tak atangin a pa in chu a hmu pha ta a. Zawi zawiin kawngah chuan a kal chho ta hnak hnak a.

Thawklehkhatah, au ri a hre ta. A pa, pa dam tak leh mi zahawm tak mai chu, in atang chuan a rawn tlan chhuak a. Pratap-a lam pan chuan a tlan a, a kuah ta ngawih ngawih a. Pratap-a rilru chu a pa chet dan chuan a chhun tuiral vek a ni.

“Ka pa,” a tih pah chuan a thaw tha thei lo a, “Pathian leh i chungah ka lo tisual ta a ni e. I fapaa vuah tlâk ka ni ta lo a ti a.’’

A pa chuan a thusawi chu a bengkhawnsak duh lo a, hre ang pawhin a awm duh lo. A biangah chuan mittui a luang ngiai ngiai a. Ina chhiahhlawhte chuan thawm an hriatin an rawn tlan chhuak hlawm a.

“Hmanhmawh rawh u!” tiin a pa chuan thupek a pe ta a. “A awmna tur room buatsaih ula! Thuamhnaw thar leh fai rawn la rawh u! Ruai buatsaih rawh u, ropui takin kan lawm ang! Hei hi ka fapa a ni—a thi a, a lo nung leh ta; a bo va, kan hmu leh ta a nih hi!” a ti a.

Ngaihdamna Changin

He thawnthu hian Isua Krista’n tehkhinthu a sawi behchhanin, siamtu Pathian hnen atanga ngaihdamna kan dawn theih dan a rawn sawifiah a ni. He hringnunah hian tihsual kan neih chang te-in sual pawi lian tham tak pawh nise—Pratap-a a Pa hnena inchhira a kir leh ang hian, kan Pa Pathian hnenah chuan kan kir leh thin tur a ni. Halral thilhlan leh thilpek man to kan pek a ngai hran lo. Pathian chuan min kuangkuah duhin min lo nghak reng a. Thinlung inthlak hi a ni a ngaih hlut ber chu. Inngaitlawm taka kan sualte puangin, sual avanga pawi tih tak takna nen, ngaihdam kan dil tur a ni. Pathian ngaihdamna mak ropui chu i chang ve duh em? Vawiin hian i sual lo khawih tawh zawng zawng lak ata tlenfai i ni thei a ni. Hetihian tawngtai ang che:

Aw Lalpa, ka thil sual tihte avangin pawi ka ti tak zet a. Min ngaidam la, Isua Krista inhlanna ropui tak avangin ka bawlhhlawhna zawng zawng lakah min tithianghlim ang che. Chhungrilah min siamthar leh ang che. Amen.

Isua Krista zirtirna i hriat belh zel duh a nih chuan he lehkhabu kawm hnung lam address-ah hian khawngaihin min rawn be dawn nia.