Nkag Siab Txog Kev Txomnyem

“Cas ho rov yog ntxhais thiab!” tus txiv nroog yam li dua siab. Nkawm ob niam txiv twb muaj ob tug ntxhais lawm. “Wb xav tau ib tug tub, tsis xav tau ntxhais lawm!” Nws thiaj muab tus me ntxhais Chaimlai uas tseem mos mos rau nws tus kwvtij. Tiam sis yim neej ua Chaimlai mus nyob yog lub neej tsaus ntujnti. “Koj ruam heev mus kawm tsis tau ntawv li,” Nws ob tug niam txiv qhuav cem nws. Ob tug yuam nws ua haujlwm li ib tug qhev. Nkawd niaj hnub tsim txom thiab ntaus, Chaimlai lub neej txomnyem poshuab niab, txajmuag thiab chimsiab. Cuag li tsis muaj ib tug neeg hlub nws li.

Koj puas tau hnov dua tus neeg lub neej zoo li Chaimlai? Tej zaum muaj neeg ua tsis ncaj thiab ua rau yus mob dhau lawm.

Thaum nyiaj tiv tsis taus kev mob lawm, peb yuav khiav kom dhau, tiam sim ntau zaug yim ua rau yus thiab lwm tus raug mob tshaj qub. Zaum puav peb xav tias qee yam phem yav tas los ua rau peb thiaj txomnyem niaj hnub no. Txoj kev xav li ntawd tsis pab yus dab tsi. Tsuas ntxiv kev txhawj thiab ntxhov siab xwb. Puas muaj kev vam qhov twg yuav ua rau tej kev mob thiab hmoov phem ntawd tag mus?

Neeg lab lab tus—nrog rau Chaimlai—Ntsib kev vam los ntawm Yesxus txoj kev khuvleej thiab kev hlub tiag.

Yesxus yog Leejtwg?

Yesxus yog tus xibhwb thaum ub uas los yug rau hauv tsev neeg txomnyem. Tom qab yug Nws tsis ntev, nws tsev neeg tau tsiv khiav ntawm ib tug huabtais nyaum, thiaj mus nyob ua neeg thojnam hauv tebchaws Isziv. Thaum tus huabtais phem tuag lawm, lawv mam tsiv rov los rau Isxayees tebchaws thiab mus nyob hauv lub nroog Naxalev, uas yog lub nroog tau npe tsis zoo. Xws li tus xibhwb tseemceeb no lub neej thaum pib txomnyem kawg.

Lub npe Yesxus txhais tias “Tswvntuj cawm.” Xya pua xyoo ua ntej Yesxus yug, muaj lus tshuajsij qhia tias tus cawm sawvdaws yuav los rau ntiajteb thiab yuav ntsib kev txomnyem ib yam li cov neeg uas Nws los cawm lawv. Nws txoj haujlwm yog pab tus neeg muaj kev tu siab thiab rhuav tshem kev txomnyem thiab kev tuag.

Kev Phoojywg Tseeb Ntawm Yesxus

Cov Ntseeg phau ntawv dawbhuv, Phau Vajluskub, qhia ntau zaj txog qhov Yesxus tau txav ze pab cov neeg txomnyem.

Muaj ib hnub, ib tug txivneej tawv nqaij mob loj heev tuaj cuag thaum Yesxus tabtom qhia. Nws lub cev ua rwj puv nkaus thiab tsw phem ntxiag. Nws tau txajmuag thiab tag kev cia siab vim yog cov neeg tiam ntawm ntseeg tias tus mob no yog raug txim vim nws ua txhaum. Tiamsis Yesxus txav zog ze nws thiab tuav nws. Tamsim ntawd, Nws cia li zoo hlo.

Dua ib zaug, Yesxus ntsib ob tug txiv neej raug dab nyob tom tojntxas thiab muab pobzeb los hlais nkawd. Thaum nkawd pom Yesxus, tus dab phem thov kom Nws khiav mus. Tiam sis Yesxus tau ntiab kom dab tawm. Tus dab kuj mloog lus, thiab ob tug txivneej ntawd cia li xeev tam sim ntawd rov zoo li qub.

Tamqab ntawd, Yesxus ntsib ib tug pojniam uas luag ntxub hauv nws lub nroog vim nws twb yuav txiv los tsib zaug lawm. Nws ceeb thaum Yesxus los nrog nws tham lus zoo zoo. Nws zoo siab heev thiaj rov mus yaum txhualeej tuaj ntsib tus xibfwb loj uas pub kev vam rau nws.

Tus Phoojywg Raug Kev Txomnyem

Koj xav tias tus xibhwb muaj hwjchim loj khomob thiab txawj qhuabqhia yuav ua rau sawvdaws nyiam. Sawvdaws yeej nyiam ntag. Tiamsis cov xibhwb qhia kev ntseeg khib qhov uas Yesxus npe nrov nto moo lug thiaj nrhiav kev los rhuav tshem Nws.

Yesxus qhia Nws cov thwjtim tias Nws yuav raug lawv iab liam tsis tseeb thiab raug tua. Nws qhia rau lawv tias yog Tswvntuj lub homphiaj nkag los tau rau tibneeg thaum lawv raug kev txomnyem thiaj hloov tau neeg lub siab. Nws qhia tseg cia tias Nws yuav rov muaj sia tom qab peb hnub. Tiamsis Nws cov thwjtim tsis ntseeg tias lawv tus xibfwb uas lawv hlub yuav raug tsimtxom loj heev; lawv thiaj npaj siab tiv thaiv Nws.

Tu siab, thaum kawg kuj muaj raws li Yesxus hais cia. Ib tug thwjtim tau ntxeevsiab rau Yesxus vim ntshaw nyiaj, pab cov neeg phem ntes tau Nws thaum ib tag hmo. Lwm tus thwjtim cia li ntshai khiav tag lawm. Muaj cov iabliam cuav hais tias Yesxus npav yuav ntxeev nomtswv. Yesxus raug txiavtxim, raug ntaus sab, thiab ntsia saum tus ntoo khaublig Nws thiaj tuag yam txomnyem heev.

Kev Vam thaum Peb Txomnyem

Yesxus niam thiab cov ntseeg Nws tau quaj thaum lawv muab Nws lub cev coj mus tso rau hauv lub ntxa. Cov tubrog ntaus cim rau ntawm lub ntxa thiab tso tubrog zov sab raum lub ntxa. Tiamsis hnub peb, muaj av qeeg loj qheb lub ntxa, thiab Yesxus sawv rov los muaj sia.

Thaum Yesxus los ntshib Nws cov thwjtim, lawv tsis ntseeg lawv lub qhov muag! Nws zam txim rau lawv uas lubcaij Nws cheemtsum lawv tshajplaws, lawv cia li khiav tag lawm. Nws siv sijhawm qhia lawv hauv Vajluskub, kom paub txog Nws tesnum uas yuav rhuav tshem kev txomnyem thiab kev tuag kom tag mus ib sim. Nws txib kom lawv yuav tsum tawm mus qhia rau txhua leej kom npaj tos hnub Nws rov los, ces Nws txoj kev cawm mam tiav mus ib txhim. Ces Yesxus thiaj rov mus saum ntuj ceebtsheej lawm.

Tus Phoojywg uas Pab Thaum Kuv Mob

Chaimlai, tus ntxhais uas loj hlob tuaj tsis muaj neeg xav yuav, thaum kawg paub txog Yesxus los ntawm cov neeg siab zoo thaum nws khiav rog mus nyob hauv lub Loog Tawgroog. Nws mloog cov xov xwm tseeb hauv Vajluskub thiab kawm paub txog Tswvntuj lub homphiaj npaj uas yuav rhuav tshem txoj kev txomnyem thiab kev ploj kev tuag. Chaimlai paub Tswvntuj muaj hwjchim pab nws kom khiav dhau nws tej kev txajmuag thiab kev txomnyem, nws thiaj thov kom Tus Tswv kho nws lub siab. Tswvntuj tau hloov nws lub siab ntxubntxaug thiab siab dub ua lub siab zam tau txim thiab hlub khuvleej. Hnub no, nws niajhnub qhia lwm tus paub tias Tswvntuj tau ntxuav nws dawb huv lawm thiab hu nws ua Nws ib tug ntxhais.

Koj ne, yuav ua li cas? Koj puas xav ntsib Yesxus thiab? Koj nrog Tswvntuj tham li no nawj:

Tswvntuj e, ua tsaug koj nkagsiab kuv tej kev raug mob uas kuv tau raug los (Piav koj tej kev nyuaj siab ntxiv). Ua tsaug Koj txib Yesxus los cawm peb dhau peb tej kev txomnyem. Thov pab kho kuv lub siab thiab pub kev thajyeeb rau kuv thiab pub lub siab paub zam txim rau kuv. Asmees.

Yog koj xav paub ntxiv txog Yesxus thiab xav paub tias Nws pab tau peb thaum raug kev txomnyem li cas, thov tuaj cuag peb raws li nram qab daim ntawv no.