Lub Neej Yuav Zoo Dua Lawm Yav Tom Ntej

Lis puag nws ob tug ntxhais tuaj thaum tab tom lem mus los raws hauv lub kiab khw loj. “Ceevfaj nawj!” nws yws ua kev tiv thaiv. “Nyob ze ze Txiv nawj.” Nws tobhau kiv pes lees. Nws tsis txeev mus kav kiab hauv lub khw loj li no dua. Thiab tseeb tiag nws tseem tsis tau swm saib xyuas cov menyuam dua nws ib leeg xwb.

Thaum nws yuav tau mentsis zaub mov thiab tau nce npav nrog cov menyuam, ces nws tshuav quaj lawm xwb. Nws nco nws tus pojniam uas nyuam qhuav tuag ob peb chibso tas los lawm. Nws nco nws tus pojniam lub ntsejmuag luag ntxhi. Nws nco nws tus pojniam tej zaubmov thiab txoj kev tu nkawd cov menyuam. Nws tsis xav tias nkawd lub neej yuav los xaus yam txaus tu siab npau li no.

Vim li cas nws thiaj txomnyem tas npaum? Vim li cas nws cov menyuam yuav txomnyem ua luaj? Nws lub neej es txawm yuav xaus mus li no xwb lov?

Kev vam Yav Tomntej.

Sijhawm dhau mus, Lis xav tias kev ntseeg puas yuav pab tau kom nws lub neej zoo tuaj. Tiamsis nws pom tias txhua yam kev ntseeg, nyias taus nyias muaj kev tawm thiab tsis yog txhua txoj kev ntseeg yuav zoo. Nws yuav nrhiav cov lus teb meej tias ua cas nws lub neej yuav plam ncua li no? Puas muaj ib txoj kev vam uas yuav rov mus ntsib nws tus pojniam dua? Txoj kev txomnyem yam tsis txawj tas no, puas yuav muaj hnub xaus mus?

Ib txhia xav tias lub ntiajteb no tab tom zoo zujzus, tiam sis Lis saib mas tab tom phem zuj zus xwb. Lwmyam kev ntseeg qhia txoj ncauj kev tawm. Lawv pom lub ntiajteb tsis muaj dab tsis pab tau lawm thiab qhia tias Tswvntuj tsuas cawm cov neeg zoo thaum lawv tuag thiab coj lawv mus ntuj ceebtsheej. Ib txhia kuj npaj tias tuag ces tas mus ib txhim, yam li piav qhia tsis tau hais tias yuav nyob mus ib txhiab ib txhim. Saib yam li tsis muaj paus tsis muaj ntsis. Lis thiaj xav tias qhov twg yuav zoo dua.

Cov Ntseeg txoj kev Tawm

Lis pib nrog ib tug ntseeg nyob ze nws tsev sib tham. Tsis ntev nws kawm paub cov ntseeg phau ntawv dawbhuv, hu tias Vajluskub, qhia tias lub ntiajteb no sam sim nyob rau tiam txomnyem vim peb ntxeev siab rau tus TswvTsim (Chivkeeb 6:5). Tiam sis tus TswvTsim tau coglus tias yuav tsim ntiajteb kom rov zoo txhij txhua li qub (Tshwmsim 21:1). Cov uas cia Tswvntuj kho lawv lub siab tsuas xav txog tuskheej yuav raug tos txais mus nyob lub ntiajteb tshiab.

Vajluskub qhia tias Tswvntuj tus Tswvtsim “yuav so txhua teev kua muag ntawm lawv qhov muag; yuav tsis muaj kev tuag, kev tusiab, kev quaj ntsuag ntxiv lawm. Yuav tsis muaj kev mob, vim tej qub twb dhau tag lawm” (Tshwmsim 21:4). Kev txomnyem yuav ploj ntais mus ib txhim!

“Cov neeg dig muag yuav rov pomkev, thiab cov lag ntseg yuav rov hnov lus. Ces cov cegtawv yuav dhia pajpaws. . . . thiab cov uas nplaig ruam yuav hu nkauj” (Yaxaya 35:5–6). Tej cev ntajntsug uas tsis zoo yuav ploj tag!

Lub ntiajteb uas puas lawm yuav rov tsim kom zoo li qub. “Tej hma thiab menyuam yaj noj zaub ua ke, tsov ntxhuav yuav noj quav nyab yam li nyuj” (Yaxaya 65:25).

Tej xwm no yuav tsim tau li cas? Vajluskub qhia tias Vajtswvntuj yuav los thaum neeg tsis ceevfaj (Mathais 24:36–42), tiamsis yuav tsis seem ib tug uas tsis pom li vim “Nws yuav nrog huab nrog cua los, thiab txhua lub qhovmuag yuav pom Nws” (Tshwmsim 1:7). Yuav muaj xoblaim thiab xobnroo, thiab ntiajteb yuav co (Mathai 24:27; Tshwmsim 16:17–21).

Suab raj yuav nrov. Cov neeg ntseeg Tustsim tej lus cogtseg uas tuag lawm yuav sawv rov los muaj sia. Nrog cov uas ntseeg tseem muaj sia nyob, lawv yuav ua kev “raug coj nce . . . lawm saud huabcua mus ntsib Tswvntuj saud ib ntantuj” (1 Thexalaunike 4:17). Yuav zoo siab npaum li cas tau rov sibntsib!

Thaum Tswvntuj xav kom txhualeej tau nyob hauv lub ntiajteb tshiab, cov neeg phem yuav raug rhuavtshem tag mus ib txhim (2 Petaus 3:9–11). Tom qab, Tswvntuj mam rov tsim dua lub ntiajteb thiab tos peb mus nyob lub vajtsev tshiab uas tsis muaj kev puamtsuaj, kev txomnyem, thiab kev ploj kev tuag li lawm.

Sim xav seb lub ntiajteb ntshiab raug tsim dua ntshe yuav zoo heev!

Thaum Lis nyeem Vajluskub, nws xav txog tej duab uas phauntawv piav txog. Nws thiaj xav pom nws nrog nws tus pojniam uas muaj sia rov los taug kev ua ke saum cov hav nyom ntsuab xiab. Lawv mus noj mov ua ke ntawm ntug dej hos tej menyuam ntxhais los mus ua si nrog tej tug tsov loj loj.

Ib lub chib so ib zaug, lawv yuav mus koom nrog coob coob leej hauv lub tuam ceeb nroog uas Tus Tswvtim lub zwmtxwv nyob hauv (Yaxaya 66:22–23). Lawv yuav taug kev saum tej kev xuas kub pua, lawv lub siab qheb xyivfab hlo thiab hlub tus Tswvtsim. Lawv yuav koom ua ke, hu nkauj qhuas Tswvntuj.

Tsis muaj neeg txawj laus, tau mob, lossis tuag li lawm. Kev zoo siab thiab kev hlub yuav muaj puv npo!

Tseem Zoo tshaj qhov yuav ua tau tseeb?

Lis nyiam tej uas nws nyeem nyob hauv cov ntseeg phau ntawm Vajluskub. Qee tsam, saib zoo li zoo tshaj qhov tseeb lawm, thiab yam nws ua tau ces tsuas ua pa thov ua tsaug xwb. Lub neej ua ib leeg txiv xwb tsis yoojyim, tiamsis nws muaj kev thajyeeb thiab kev vam lawm yav tom hauv ntej!

Kev txomnyem muaj rau tibneeg txhua leej. Nws yoojyim nres thiab xav txog tej teebmeem. Tiam sis muaj ib yam xov zoo! Phau Vajluskub tsis yog qhia tias ntiajteb chivkeeb tshwmsim los li cas xwb, tiamsis tseem qhia tias ntiajteb yuav xaus mus li cas— lub neej zoo tshajplaws uas koj thiab kuv yuav muaj feem koom. Thiab nws tsis yog peb xwb tiamsis tag nrho cov uas peb hlub tibsi!

Koj nev?

Koj puas xav nrhiav tej uas Tswvntuj npaj hauv kev zoo zoo rau koj yav tomntej? Koj puas xav paub tias Nws yuav kho koj tej kev nyuaj siab tau li cas? Yoเ  xav, koj thov raws li no:

Tswvntuj tus Tswvtsim, kuv ntseeg tias Koj rov tsim dua lub ntiajteb no kom rov zoo txhij txhua li thaum ub, txawm yuav zoo tshaj qhov yuav ua tau tseeb. Thov pab kom kuv paub tias Koj muaj tseeb thiab paub Koj lub homphiaj rau kuv.

Yog koj xav paub ntxiv, caw tuaj ntsib peb tau raws li cov lus sab nraum daim ntawv no.