ການເອົາຊະນະຄວາມໂມໂຫ

ແມ່ນາຍຂອງດາຣາເວົ້າຂຶ້ນວ່າ “ເກີດຢູ່ບ້ານຄືພວກເຮົາເຄີຍເຮັດຜ່ານມາກໍບໍ່ເປັນຫຍັງດອກ. ພວກເຮົາບໍ່ຕ້ອງການໂຮງໝໍແພງໆ.”

ດາຣາກັງວົນໃຈ. ເມຍຂອງລາວບໍ່ແຂງແຮງ ແລະ ລາວຢາກໃຫ້ເມຍຢູ່ໃກ້ໝໍ. “ຖຽງຄວາມແມ່ນາຍບໍ່ໄດ້ປະໂຫຍດຫຍັງດອກ,” ລາວຈົ່ມພຶມພໍາ.

ເມື່ອທ້ອງເມຍເລີ່ມປັ້ນ ດາຣາຈໍາເປັນໄດ້ຖ້າຢູ່ນອກຕູບ. ສຽງຮ້ອງເຈັບປວດຂອງເມຍດັງຖີ່ຂຶ້ນຖີ່ຂຶ້ນ ແລ້ວກໍມິດລົງ. ໃນທີ່ສຸດແມ່ນາຍຂອງລາວກໍອອກມາ. ເບິ່ງໜ້າບາດດຽວກໍຮູ້ແລ້ວວ່າຊີວິດອັນປະເສີດຂອງເມຍ ແລະ ລູກໄດ້ຈາກໄປແລ້ວ. ພວກເຂົາໄດ້ຕາຍໄປ ພ້ອມກັບຄວາມຝັນ ແລະ ຄວາມສຸກຂອງດາຣາ.

ຄວາມມຶນຊາໄດ້ເຂົ້າມາແທນທີ່ຄວາມໃຈຮ້າຍອັນຟົດເດືອດຢ່າງຊ້າໆ. ສຽງໃຈຂອງດາຣາຮ້ອງໄຫ້ອອກມາວ່າ “ຖ້າໄປໂຮງໝໍ ພວກເຂົາຄືຈະບໍ່ຕາຍ. ຖ້າພຽງແຕ່ແມ່ຂອງນາງຍອມໃຫ້ໄປ!”

ດາຣາຕັດສິນໃຈໜີຈາກຍິງທີ່ທໍາລາຍຊີວິດຂອງຕົນ. ລາວຫໍ່ເອົາເຄື່ອງຂອງ ແລະ ໜີໂດຍບໍ່ຄອບບໍ່ລາ.

ແລ່ນໜີຈາກຄວາມໂມໂຫ

ດາຣາເດີນທາງເຂົ້າເມືອງຫຼວງ ໄປອາໄສຢູ່ນໍາເອື້ອຍຂອງລາວ ຊື່ ມາລີ ແລະ ອ້າຍເຂີຍ ຊື່ ເທຣ. ຄືນນັ້ນລາວນອນບໍໍ່ຫຼັບຢູ່ຄົນດຽວ. ຄວາມໂມໂຫໃຈຮ້າຍປົກຄຸມລາວຄືກັບເຝື້ອດໍາ. ລາວບໍ່ສາມາດຄິດຫາເລື່ອງອື່ນໄດ້. 

ໂຊກດີ ດາຣາຮູ້ສຶກສະຫງົບເປັນບາງຊ່ວງເມື່ອຄອບຄົວຂອງເອື້ອຍຢູ່ຄົບໜ້າຄົບຕາໃນຕອນແລງ. ຫຼັງຈາກກິນເຂົ້າແລງແລ້ວ ທັງໝົດກໍຮ້ອງເພງມ່ວນໆຮ່ວມກັນ ແລະ ເທຣເປັນຜູ້ເລົ່າເລື່ອງສູ່ຟັງ. ເລື່ອງເຫຼົ່ານັ້ນອ່າວແຕກຕ່າງຈາກຕໍານານ ແລະ ນິທານທີ່ດາຣາເຄີຍຟັງຕອນຍັງເປັນເດັກນ້ອຍ; ເປັນເລື່ອງທີ່ມາຈາກປຶ້ມສັກສິດຂອງຄຣິສຕຽນ ຊື່ ພຣະຄໍາພີ. ດາຣາບໍ່ເຄີຍໄດ້ຍິນເລື່ອງລາວກ່ຽວກັບພຣະເຈົ້າທີ່ເຕັມໄປດ້ວຍຄວາມຮັກຜູ້ສ້າງໂລກດັ່ງສວງສະຫວັນທີ່ສະຫງົບ. ລາວໄດ້ຮຽນຮູ້ວ່າ ມະນຸດຄູ່ທໍາອິດໄດ້ກະບົດຕໍ່ພຣະຜູ້ສ້າງຂອງພວກເຂົາ ຫຼົງຄິດວ່າຕົນຈະມີຄວາມສຸກຫຼາຍກວ່າເມື່ອປະຕິບັດຕາມໃຈຕົນເອງ. ການຕັດສິນໃຈຜິດພາດຂອງພວກເຂົາໄດ້ນໍາພາຄວາມບາບ, ຄວາມທຸກທໍລະມານ ແລະ ຄວາມຕາຍເຂົ້າມາສູ່ໂລກທີ່ສົມບູນແບບ.

ຢູ່ມາມື້ໜຶ່ງ ດາຣາໄດ້ເລົ່າໃຫ້ເທຣຟັງກ່ຽວກັບຄວາມໂກດຮ້າຍຂອງຕົນທີ່ມີຕໍ່ແມ່ນາຍ. ລາວອະທິບາຍວ່າ ລາວທໍລະມານ ຂົມຂື່ນ ແລະ ຊຶມເສົ້າ. ເທຣນັ່ງຟັງຢ່າງງຽບໆ. ສຸດທ້າຍ ລາວກໍເວົ້າຂຶ້ນວ່າ “ດາຣາ, ຂ້ອຍເຂົ້າໃຈ. ຂ້ອຍພົບພໍ້ສິ່ງບໍ່ດີຫຼາຍຢ່າງລະຫວ່າງສົງຄາມ. ແຕ່ຂ້ອຍໄດ້ພົບຄວາມສະຫງົບ. ຄວາມໂກດຮ້າຍທີ່ເຈົ້າມີບໍ່ສາມາດເຮັດໃຫ້ຄອບຄົວຂອງເຈົ້າມີຊີວິດຟື້ນຂຶ້ນມາໄດ້. ມັນບໍ່ຕ່າງຫຍັງກັບກອດລະເບີດມືໄວ້ໜ້າເອິກ. ມັນຈະທໍາລາຍເຈົ້າ!”

ດາຣາເອົາມືປິດໜ້າ. “ຂ້ອຍໃຫ້ອະໄພບໍ່ໄດ້,” ລາວຄາງອອກມາ. “ຂ້ອຍເຄີຍຮັກພໍ່ຕາແມ່ນາຍ ແຕ່ຕອນນີ້ຂ້ອຍຊັງພວກເຂົາຫຼາຍ. ຂ້ອຍບໍ່ສາມາດອະໄພພວກເຂົາໄດ້.”

ທົ່ງລະເບີດແຫ່ງຄວາມກຽດຊັງ

ເທຣງຶກຫົວ. “ສໍາລັບມະນຸດແລ້ວເປັນໄປບໍ່ໄດ້. ແຕ່ພຣະຜູ້ສ້າງຂອງພວກເຮົາສາມາດຊ່ວຍໄດ້.”

“ພຣະເຈົ້າບໍ?” ດາຣາຖາມ. “ຂ້ອຍຟັງເລື່ອງເຈົ້າເລົ່າ ແຕ່ຂ້ອຍຈະຮູ້ໄດ້ແນວໃດວ່າເປັນຄວາມຈິງ? ແລ້ວ ພຣະເຈົ້າຈະຊ່ວຍແນວໃດ?”

ເທຣຍິ້ມຂຶ້ນ. “ເຈົ້າໄດ້ຮຽນຈາກພຣະຄໍາພີວ່າມະນຸດໄດ້ທໍາລາຍໂລກອັນສົມບູນນີ້ແນວໃດ. ພຣະເຈົ້າສົມຄວນໂກດຮ້າຍ ແຕ່ພຣະອົງບໍ່ໂກດຮ້າຍ. ກົງກັນຂ້າມ ພຣະອົງຮັກພວກເຂົາ ແລະ ມີແຜນທີ່ຈະໄຖ່ພວກເຂົາ ແລະ ໂລກໃບນີ້. ນອກຈາກນັ້ນ ເມື່ອພວກເຮົາອະທິຖານ ພຣະເຈົ້າກໍຈະຊ່ວຍພວກເຮົາ. ເຮົາຈະຮູ້ໄດ້ແນວໃດ? ຍ້ອນພຣະອົງເຄີຍຊ່ວຍຂ້ອຍ. ຂ້ອຍບໍ່ທໍລະມານຢູ່ໃນຄວາມໂກດຮ້າຍອີກຕໍ່ໄປ.”

ເທຣເວົ້າຕໍ່. “ພຣະເຈົ້າພຣະບຸດ ຄື ພຣະເຢຊູ ໄດ້ລົງມາປະສູດໃນໂລກເພື່ອນໍາພາຈິດໃຈຂອງພວກເຮົາກັບໄປຫາພຣະຜູ້ສ້າງຂອງພວກເຮົາ. ຜູ້ນໍາທາງສາສະໜາອິດສາພຣະເຢຊູຢ່າງໜັກ ຍ້ອນພຣະອົງໂດ່ງດັງຈາກຄໍາສອນ ແລະ ການປິ່ນປົວຮັກສາຂອງພຣະອົງ. ພວກເຂົາໄດ້ວາງອຸບາຍເພື່ອຂ້າພຣະອົງ. ພວກເຂົາໃສ່ຮ້າຍພຣະອົງ, ທຸບຕີພຣະອົງ ແລະ ໃຊ້ເຫຼັກຕະປູຕອກພຣະອົງໃສ່ໄມ້ກາງແຂນ ຈົນພຣະອົງສິ້ນພຣະຊົນ.”

“ຊົ່ວຊ້າຫຼາຍ!” ດາຣາເວົ້າຂັດຈັງຫວະ.

“ແມ່ນ ແຕ່ພຣະເຢຊູບໍ່ໄດ້ຕອບໂຕ້ ຫຼື ສາບແຊ່ງພວກເຂົາ. ກົງກັນຂ້າມ ພຣະອົງເງີຍໜ້າຂຶ້ນຟ້າ ແລະ ອະທິຖານວ່າ ‘ພຣະບິດາເຈົ້າເອີຍ ໂຜດຍົກໂທດໃຫ້ພວກເຂົາດ້ວຍເຖີດ ເພາະພວກເຂົາບໍ່ຮູ້ຈັກວ່າ ພວກເຂົາກໍາລັງເຮັດຫຍັງຢູ່.’”

ດາຣາຮ້ອງຂຶ້ນວ່າ “ວ່າວ.” “ຂ້ອຍຄິດວ່າຂ້ອຍເຮັດແບບນັ້ນບໍ່ໄດ້ດອກ.”

“ຂ້ອຍຄືກັນ,” ເທຣຕອບ, “ຂ້ອຍເຄີຍຄິດແບບນັ້ນຄືກັນ. “ຂ້ອຍເປັນຄົນໃຈຮ້ອນ. ແຕ່ດຽວນີ້, ດາຣາ, ພຣະເຢຊູເວົ້າວ່າ 'ຈົ່ງຮັກສັດຕູຂອງເຈົ້າ ແລະ ພາວັນນາອະທິຖານເພື່ອຜູ້ທີ່ຂົ່ມເຫັງເຈົ້າ' (ມັດທາຍ 5:44). ພຣະເຢຊູບໍ່ພຽງແຕ່ສອນ ພຣະອົງໄດ້ປະຕິບັດເປັນແບບຢ່າງພ້ອມ. ເມື່ອຂ້ອຍຄິດກ່ຽວກັບສິ່ງເຫຼົ່ານີ້ ແລະ ຂໍໃຫ້ພຣະເຈົ້າຊ່ວຍປົວແປງ ຂ້ອຍໄດ້ປ່ຽນ.”

ລິດອໍານາດຂອງການໃຫ້ອະໄພ

ສອງສາມອາທິດຕໍ່ມາ ດາຣາອ່ານກ່ຽວກັບຄວາມຕາຍຂອງພຣະເຢຊູ ແລະ ຄໍາສອນຂອງພຣະອົງທີ່ບອກໃຫ້ຮັກສັດຕູ. ລາວໄດ້ເປີດໃຈໃຫ້ພຣະເຈົ້າ ແລະ ອະທິຖານຕາມແບບຢ່າງຂອງຄອບຄົວ ເອື້ອຍຂອງລາວ. ລາວບອກພຣະເຈົ້າກ່ຽວກັບຄວາມເຈັບປວດ ແລະ ຄວາມໂມໂຫຂອງຕົນ. ພາຍຫຼັງລາວອະທິຖານຂໍໃຫ້ພຣະເຈົ້າປິ່ນປົວຈິດໃຈຂອງລາວ ເມກດໍາກ້ອນນັ້ນກໍຄ່ອຍພັດຜ່ານໄປ. 

ເທຣສັງເກດເຫັນການປ່ຽນແປງນັ້ນ. ເທຣບອກດາຣາວ່າ “ຂ້ອຍເຫັນວ່າພຣະເຈົ້າກໍາລັງປ່ຽນເຈົ້າ.” “ເຈົ້າບໍ່ຢາກຮັບເຊື່ອພຣະເຢຊູບໍ?” 

ດາຣາຍິ້ມ “ຢາກ. ພຣະເຈົ້າກຳລັງປົວຂ້ອຍ. ຂ້ອຍຈະຮັບເຊື່ອພຣະອົງໄດ້ແນວໃດ?”

ເທຣສອນລາວວ່າ ການຮັບເຊື່ອພຣະເຢຊູໝາຍເຖິງການຮ່ວມຜູ້ເຊື່ອຄົນອື່ນ, ໝັ່ນອະທິຖານ ແລະ ຮຽນຮູ້ກ່ຽວກັບພຣະເຈົ້າ ແລະ ຟັງຄໍາສິດສອນຂອງພຣະອົງໃນພຣະຄໍາພີ. ຄົນຂອງພຣະເຈົ້າຍັງບອກຄົນອື່ນວ່າພຣະອົງໄດ້ຊ່ວຍເຫຼືອຕົນແນວໃດ ແລະ ເຊີນຊວນໃຫ້ຄົນອື່ນເຂົ້າມາສໍາຜັດລິດອໍານາດຂອງພຣະອົງ. ສາວົກຂອງພຣະເຢຊູໄດ້ຮັບຄໍາສັນຍາວ່າ ມື້ໜຶ່ງພຣະອົງຈະສ້າງໂລກນີ້ຄືນໃໝ່.

ດາຣາໄດ້ຕັດສິນໃຈຮັບເຊື່ອພຣະເຈົ້າອົງນີ້. ຢູ່ມາມື້ໜຶ່ງ ເທຣສັງເກດເຫັນດາຣາພັບເຄື່ອງຂອງ. ລາວຖາມດ້ວຍຄວາມຢາກຮູ້ວ່າ “ເຈົ້າກໍາລັງຈະໄປໃສ?”

ດາຣາຕອບ “ຂ້ອຍຈະກັບເມືອບ້ານເມຍ.” “ຂ້ອຍຕ້ອງບອກພວກເຂົາວ່າຂ້ອຍໃຫ້ອະໄພພວກເຂົາ! ແລະ ຂ້ອຍຈະແບ່ງປັນຄວາມຫວັງໃໝ່ທີ່ຂ້ອຍມີໃຫ້ຄົນອື່ນຮູ້.”

ຖ້າທ່ານປະສົງຢາກຮຽນຮູ້ວ່າພຣະເຢຊູຈະຊ່ວຍທ່ານເອົາຊະນະຄວາມໂມໂຫ, ຄວາມຂົມຂື່ນ ຫຼື ຄວາມຊຶມເສົ້າແນວໃດ ກະລຸນາຕິດຕໍ່ພວກເຮົາໄດ້ຕາມຂໍ້ມູນຢູ່ດ້ານຫຼັງຂອງແຜ່ນພັບນີ້.