Pathian Mi Bikte

Hla taka a zin hmaa a chhiahhlawhte ko khawmtu mi pakhat thawnthu chu hetiang hian sawi a ni. A chhiahhlawh pakhatna hnenah chuan, pawisa awmna ip lian tak a pe a, a chhiahhlawh pahnihna hnenah chuan, pawisa awmna ip lian ve tho a pe bawk a, tin, a chhiahhlawh pathumna hnenah chuan, pawisa awmna ip te reuh te a pe thung a, an theihna mil zelin sum hi pek an ni. A kal bo chhungin a neih sumte chu lo enkawlsak theuh turin a hrilh a. Tichuan, a kal bo ta a.

A chhiahhlawh pakhatna chuan a pawisa chu lain a sumdawnpui a. Chutiang bawkin chhiahhlawh pahnihna chuan a sum chu sumdawnna lamah a hmang a. An thawkrim a, tichuan, rei lo teah chuan an hnena kawltira awm sum leh pai chu a let hnihin an tipung ta a. 

Mahse, a chhiahhlawh pathumna, pawisa awmna ip te reuh te neitu chu a danglam a. Lei a lai khuar a, tichuan a sum chu a him zawk nan tiin a phum ta daih a, tichuan hahdam takin a awm ta a, pu ber awm bo chhung chu kum tam tak nuamsa leh hahdam takin a lo awm a ni.

A tawpah chuan, pu ber chu a lo haw ta. Chhiahhlawh pahnihte chuan an thawhrimzia leh a leh hniha a pawisate an lo tihpun dan chu an pu hnenah chuan an tar lang a. Ani chuan, “In ti tha e! Chhiahhlawh, bawih tha leh rinawm in ni e. Thil te tham teah in rinawm tih in tilang tawh a, tunah chuan thil ropui zawk ti turin ka ruat dawn che u,” a ti a. Tichuan, anni chu lawmman a pe a.

Chhiahhlawh pathumna chu a lo kal ve a, zak tak leh inkiltawih tak chungin. “Hotupa, pa rorum tak i ni tih ka hria a, i phun lohnaah pawh i seng thin a, chi i theh lohnaah pawh i seng khawm thin tih ka hria. Ka hlauthawng a, tichuan i sum chu leiah ka thukru ta a ni. Hei heta hi, i ta chu i nei thei ang—engmah a la bo then lo e,” a ti a. Nimahsela, he chhiahhlawh zawm thaw tak hian a kal bo chhungin engmah a ti lo tih a pu chuan a hriat chuan a thinrim ta a. Pu ber chuan a pawisa chu la letin, rinawm taka thawktu chhiahhlawh hnenah chuan a pe a, chhiahhlawh rinawm lo chu hremna hmunah chuan a paih ta a ni.

Lalram Famkim Chu

He thawnthu hi, Lalpa Isua Krista, zirtirtu ropui leh thawnthu sawi thiam tak in a sawi a ni. A lehkhabu, Bible chuan eng tik niah emaw chuan chhum zingah lo let lehin, a tana mi bikte, a chhiahhlawh rinawmte hnenah lawmman ropui tak a la pe dawn tih min hrilh a. Nimahsela, A lo kal lehna atana inbuatsaih lote chu an beidawng dawn hle a ni.

Pathian chhiahhlawh rinawmte tana lawmman ropui dawn tur chu eng nge le? Lalpa Isua Krista chuan “Pathian Lalram” tiha an koh hmunah chuan min hruai dawn tih min tiam si a. He lalram hi Siamtu Pathian chenna hmun chu a ni a. Pathian leh mihringte awm dunna hmun, mi tinten hlimna tluantling an channa hmun famkim a ni. He lalram mite hi Pathian dan mil zelin an nung a, anmahni pawh an inrem a ni. Lungaihna te, natna leh thihna te a awm tawh lo. He lalram ropui tak hian tawp chin reng a nei lo ang! Mahse mi rinawm leh thuawihte chauh he hmunah hian an kal thei dawn a ni. Pathian hnawltute emaw, a rawng an bawlsaknaa mi thatchhia leh fimkhur lote chuan a lalram chu an lut dawn lo a ni.

Pathian Lalram chu thiltiha chan theih rual a ni lo a. Damchhunga thil tha tihna tam takte aia man to daih a ni dawn a. Chutih a hnekin, Siamtu Pathian chuan thilthlawnpek angin luhtheihna min pe zawk a ni. An hnam te, khawtlanga an dinhmun te leh hun kal tawha an awm dante chu eng ang pawh lo ni se, tupawh Pathian Lalramah chuan an kal thei a ni. Chutih rualin, kan thiltih that hmanga Pathian lalram chu thawhchhuah theih a ni lo nain, kan thiltih that te hi an pawimawh hle thung a. Chutiang lalram hmun ralmuang leh famkima, hlim taka awm thei turte kan nih leh nih loh hre turin Pathian chuan kan thiltihte chu an en reng a. 

Bible chuan an thiltih zawng zawnga rinawm thin chhiahhlawh pahnihte ang mi bikte hi a sawifiah a. Heng mi bikte hi “A la bangte,” tia koh an ni a, khawvela ram tina Pathian thuawihtute leh Lalpa Isua lo kal lehna nghakhlel taka lo thlirtute an ni.

A La Bangte chu Zuiin

Heng chhiahhlawh rinawmte, eng tik ni emaw-a Pathian Lalram la luahtu tur, Pathian mi bikte zingah hian engtin nge kan tel ve theih ang le? Lalpa Isua chuan Pathian laka rinawm turin min zirtir tawh a, chutih rualin dan khirh tam tak a siam lem lo a ni. Lalpa Pathian chu kan thinlung zawng zawngin, kan thlarau zawng zawng leh kan rilru zawng zawngin kan hmangaih tur a ni a, tin, keimahni kan inhmangaih ang bawkin kan thenawmte kan hmangaih tur a ni a ti a (Matthaia 22:37-40). Thil awlsam tak niin lang thin mahse, kan zinga tam zawk hi chuan kan vela mi duhawm lo tak takte chunga hmangaihna lantir chu kan harsat hle thin a ni. Chutiang a nih laiin, Lal Isua chuan kan hmelmate meuh pawh hmangaih turin min ti si a (Matthaia 5:44). Heng te hi Pathianin mak tak maia kan thinlung a thlak danglam avang leh chung lam atanga chhuak hmangaihna leh thatna min pek avang chauh a thleng thei a lo ni. Lalpa Isua chhiahhlawh rinawmte kan nihna finfiahna chu Pathian hmangaihna leh midangte hmangaihna nun neih hi a ni.

Pathian Lalrama Chatuana Nunna!

Chhiahhlawh hmasate pahnih ang chiah khan, Pathian zuitu dik takte chu an dawhtheiin an rinawm tur a ni. Kan pu ber Isua a lo kir leh hun chuan, chatuan chatuana Pathian Lalramah lutin, chu chu Pathian tana kan rinawmna leh a lam kan tan tlat avanga kan lawmman chu a ni ang. Chu lalram chu “Pathian thupek zawm a, Isua rinna neitute,” tan a ni (Thupuan 14:12).

Pathian Lalrama kumkhua a nung turte hnung chu i zui ve duh chuan, hetiang hian i tawngtai thei a ni:

Lalpa Duhtak, I lalramah I hnenah ka awm ve duh a. I lo kir leh hma zawng rinawm tlat thei turin min zirtirin, min tanpui fo ang che. Hmun tha zawkah min hruai i tiam avangin ka lawm e! Amen.

Pathian Lalram chungchang i hriat belh zel duh a nih chuan, he lehkha ziak kawm hnung lama address inziakah hian khawngaihin min rawn be dawn nia.