Isolni Dingtangmanchagipa Manderang

Ian saksa mande an·tangni songreangna skang nokkolrangko okamchimongani golpo ong·a. Saksa nokkolna ua mona bongako, sakgipinna mona gniko, aro gittamgipa nokkolna monasako ua on·aha — uamangni bilni krisa on·ahachim. An·tangni gamko name jakkalchina ua uamangna aganaha. Unikode ua re·angaha.

Skanggipa nokkol man·rikgipa tangkachi badingaha. Uandake gnigipa nokkolba badingna jakkalaha. Uamang rake kam ka·aha, aro sakgnian bakbak dunagni lapko man·tokahachim. 

Indiba gittamgipa nokkol, jean monasako man·achim, uni kamde dingtangahachim. Ua a·ako cho·e tangkako gope done, nokgipani re·angmitingo mamungkoba dakgija arate roaiahachim.

Bon·kamao, nokgipa sokbapilaha. Skanggipa aro gnigipa nokkolrangde an·tangtangni lap man·aniko una mesoksoaha. Ua indine inaha, “Namebejok! Na·simang namgipa aro kakketgipa nokolrang ong·a. Chona kamo na·simang kakketaha, dal·arangni kosako anga na·simangko dongen.” Unikode ua uamangna boksisko on·aha.

Gittamgipa nokkolde kratcha·esa mikkang pa·aiaha. “Gitel,” ine ua inaha, “jeo na·a ge·ja unoniko na·a raa, ine anga nang·ni gimin u·ia. Uni gimin, anga nang·ni tangkako jakkalgija donaiaha. Iano, nang·ni tangka—on·tisaba komiatgija anga on·pilenga.” Indiba nokgipa ka·onangbeaha, maina ua mamungkoba dakgija rosoaiahachim. Uoniko tangkako ra·seke ua kam ka·gipa nokkolrangna on·skaaha, aro ua aratgipa nokkolko sasti on·aha.

Chu·sokgipa Songnok

Ia golpoko Gitel Jisu Kristo, dal·gipa skigipa aganahachim. Uni ki·tap, chong·motan, Sastroo, Uni re·bapilani salo kakketgipa nokkolrangna Ua dal·bea boksis gnang re·bagen ine agana. Indiba tarisogijagipa nokkolrang Uni re·bao namen duk man·gen.

Kakketgipa nokkolrangna on·gnigipa boksisara maiachim? Gitel Jisu Kristo an·chingko “Isolni Songnok” ine minggipaona rimangna ku·rachakaha. Ia songnokon Ong·atgipa Isolni dongram biap ong·a. Ian nambatsranggipa biap ong·a jeon pilakan kusi ong·gen aro jeon Isol mande baksa dongrimgipa biap ong·a. Iano donggipa manderanga Isolni niamko manie dongrimgenchim. Uano mamung duk, saknaa aro siani dongjawa. Ia aiao inmangipa songnok bon·changani dongjawa! Indioba kakketgipa manderangsa uno dongna man·aigen. Isolko jegalgipa ba aratgiparang, Una dangdike on·gijagiparang ua songnoko napjawa.

Tangka paisachi ia songnokko man·rikjawa. Janggi tanga gimikni chimongani gamchi uko man·rikna man·jawa. Batesa, uano napna an·chingna Isolni indin on·anisa ong·aigen. Je jat ba ma·kringba, ua Isolni Songnoko napna man·aigen. An·chingni kamrangchi ua songnokko man·na amjaoba, an·chingni kamranga nangchongmotgipa ong·kua. An·chingni kamrangko nie ua chu·sokgipa, nangrimani songnoko napna kragipa ong·genma uko Isol nia. 

Ua skanggipa nokkol sakgni gita dangdike on·na sikgiparangko Isol sandia — uamangni kamo uamang kakketgiparang ong·na nanga. Ia dingtangmanchagipa manderangko “dongpitigipa” manderang ine minga. Uamanga Isolni niamko manigipa aro Gitel Jisuni re·bapilaniko bimchipe nichaksogipa a·gimikni manderangan ong·aigen.

Dongpitigipa Baksa Dongpaani

Isolni dingtangmanchagipa manderang baksa salsao, maikai an·chingara Isolni Songnoko napna man·gen? An·chingni Gitel Jisu Isolna kakket dakchina skia, indiba Ua man·dikgipa niamrangkode an·chingna on·ja. An·chingni ka·tong gimikchi, janggi gimikchi aro gisik gimikchi Isolna ka·sana aro an·tangna gitan mandeskana ka·sachina Ua agana (Sastro, Mati 22:37–40). Altua·e niknaba donga, indiba namgijagipa manderangna ka·sana an·chingoni bang·an man·ja. An·chingni bobilrangnaba ka·sachina an·chingni Gitel Jisude aganaha (Mati 5:44). Aiao inmanpile Isol an·chingni ka·tongrangko dingtangatahaosa an·ching iako dakna amaia. Gitel Jisuna kakket ong·aniko mesokania Isolna ka·saani aro mandeskana ka·sae dakanian ong·aia.

Isolni Songnoko Jringjrotni
Janggiko Man·ani!

Ua skanggipa nokolrang gitan, Isolko ja·rikgiparang chakchikna aro kakketna nanggen. An·chingni skigipa, Jisu re·bapilahaon, bimchipanina aro kakket ong·anina nang·ni man·gnide jringjrotna ua Isolni Songnoko napna man·anian ong·aigen. Ua songnokde “Isolni ge·etaniko rakkigipa aro Jisuko bebe ra·giparang” (Parape·a 14:12) nasan ong·aigen.

Jringjrotna na·aba Isolni Songnoko dongpana skode, ia bi·aniko na·aba indake bi·pana man·gen:

Ka·sara Isol, Nang·ni songnoko angaba dongpana ska. Nang·ni re·bapilkujana kingking Nang·na kakkete dongsona dakchakbo. Nambata biapona angko rimna ku·rachakanina Nang·ko mitela! Amen.

Isolni Songnokni gimin u·ibatna skode, ka·sapae ia lekkani janggilchi sea donggipaona u·iatbo.