Ki Briew Bakyrpang U Blei

La don ka jingïathuhkhana shaphang uwei u briew uba lumlang bad khot ïa la ki shakri shwa ba un leit jingleit sha ka lynti bajngai. Ha uwei, u ai ka pla pisa baheh; ha uba ar u ai ka pla pisa ba kham pdeng; ha uba lai, ka pla pisa barit—uwei pa uwei katkum ka jinglah jingkot jong ki. U ong ïa ki ba ki dei ban sumar ïa ki jingdon jingem jong u katba u dang leit jingleit. Te u la leit noh bak.

U shakri ba nyngkong u la shim ïa ka pisa bad u la sdang ban khaïi. Kumjuh ruh u shakri uba ar u la shim ïa kata ka pisa ban khaïi. Ki la trei shitom, bad shen ki la lah ban pynmih arshah ban ïa kata kaba la bynshet ha ki. 

Hynrei u sharki uba lai, uba la ïoh ka pisa ba tang khyndiat, u kham pher. U la tih kawei ka thliew bad u la buhrieh ïa kata ka pisa kum ka jingsumar ïa ka—bad u la leh kynjai, leh sngewbha bun snem katba u kynrad jong u, u don sha jngai.

Khadduh ïawai, u kynrad u la wanphai. Kita ki arngut ki shakri shakhmat ki la pyni ha u kynrad kumno ba ki la trei shitom bad ba ki la pynman bun bad pynmih arshah ïa ka jingdon jong u. Bad u la ong, “Bha, phi ki shakri babha! Phi long ki shakri babha bad baïaineh. Phi la minot ha iba khyndiat, ngan buh ïa phi halor kiba bun.” Bad u la ai ka jingai sngewbha ha ki.

U shakri ba lai u la wan da ka jingsheptieng bad jingsngewlehraiñ. “Kynrad,” u la ong, “nga la tip ba me long u briew uba eh, uba ot na kaba mem shym la bet, bad uba lum na kaba mem shym la pynsaphriang symbai. Nga la sheptieng, te nga la buhrieh ïa ka pisa jong me ha ka khyndew. Ha khmih me la ïoh ïa la kajong hi—ym shim don jingduna eiei” Hynrei une u kynrad u la bitar namar u tip ba une u shakri ba jaituh um shym la leh eiei katba u don sha jngai. U la shim ïa ka pisa jong u, bad u ai noh ha kita kiba la trei minot, bad u la pynshitom ïa uta u shakri u bymïaineh.

Ka Hima Bajanai

Ïa kane ka khana la ïathuh da U Trai Jisu Khrist, u nonghikai bad nongïathuhkhana bakhraw. Ka Kot jong u, ka Baibl, ka ïathuh ïa ngi ba ha kawei ka sngi un sa wanphai ha ki lyoh bad un ai ka nong ïa ki briew bakyrpang jong u, ki shakri kiba ïaineh jong u. Hynrei kito ki bym shym la pynkhreh ïa ka jingwan jong u kin long kiba sngewsih eh.

Kaei kata ka nong baphylla ïa ki shakri baïaineh U Blei? U Trai Jisu Khrist u la kular ba un ïalam ïa ngi sha ka jaka ba la khot ka “Ka Hima U Blei.” Kane ka hima ka long ka jaka ha kaba U Blei Nongthaw u shong. Ka long ka jaka bajanai ha kaba baroh kin long kiba kmen bad ha kaba U Blei u shongsah bad u briew. Ki briew jong kane ka hima ki im ha ka jingïadei bad ki hukum U Blei, bad ha ka jingïadei bad kiwei pat ki briew. Yn ym don shuh ki jingkhuslai, ki jingpang ne ka jingïap. Kane ka hima ba phylla kan ym kut shuh! Hynrei tang kiba ïaineh bad bakohnguh ki ban ïoh leit shata. Kito kiba kyntait ïa U Blei lane kiba jaituh bad bymsuidñiew ha kaba shakri ïa U, kin ym ïoh rung satia sha kane ka hima.

Ngin ym lah ban kamai khnang ban ngin ïoh rung sha ka hima U Blei. Kan long kaba kham remdor ban ïa baroh ki kam babha ka jingim jong ngi. Hynrei, U Blei Nongthaw U tyrwa ei ïa ka jingïoh rung jong ngi hangta. Baroh ngi lah ban leit sha kata ka hima U Blei, kampher ki jaitbynriew aïu, ka kyrdan aïu, lane ka mynnor aïu. Watlada ngim lah ban thied ïa ka lyngba ki kam babha jong ngi, ki kam babha jong ngi ki long hi kiba donkam. U Blei u peit sha ki kam jong ngi lada ngin long ki briew kiban kmen ha kata ka jaka bajanai, bad basngewtynnad. 

Ka Baibl ka batai ïa ka kynhun bakyrpang jong ki briew kum kito ki arngut ki shakri ba nyngkong—kiba iaineh ha ki kam jong ki. Kine ki briew bakyrpang, ïa kiba la khot “ki badangsah,” ki dei kito ki briew ha kylleng ka pyrthei kiba kohnguh ïa U Blei bad kiba apkhmih ïa ka jingwanphai U Trai Jisu.

Ka Jingiasoh bad Ki Badangsah

Kumno ngin long shibynta na ka kynhun ba kyrpang U Blei, ka kynhun ki shakri ba ïaineh ki ban sa rung sha ka Hima U Blei ha kawei ka sngi? U Trai Jisu u hikai ïa ngi ban ïaineh ha U Blei. Um shym la ai ka thup bajrong jong ki kyndon bakyllaiñ. U ong ba ngi dei ban ieit ïa U Blei da ka dohnud baroh, da ka mynsiem baroh, da ka jingmut baroh bad ban ieit ïa u paramarjan kumba ïalade (Ka Baibl Khasi, Mathaios 22:37–40). Sngew kumba ka suk eh, hynrei bun na ngi ngim lah ban ieit ïa ki briew kibym ieit kylliang. Hynrei U Trai Jisu u ong ba ngi dei ban ieit wat ïa ki nongshun jong ngi ruh (Mathaios 5:44). Kane ka lah ban long tang namar ba U Blei da ka jingmaïan u pynkylla ïa ki dohnud jong ngi bad ai ha ngi ka jingieit bad ka jingbha ba na sha lyndet. Ka jingim jong ka jingieit ïa U Blei bad ïa kiwei pat ki para briew ka long ka dak ba ngi dei ki shakri baïaineh U Trai Jisu.

Ka Jingim Babymjukut Ha Ka Hima U Blei!

Kum ki arngut ki shakri ba nyngkong, ki nongbud ba shisha U Blei ki dei ban ïaishah bad ïaineh. Haba U Kynrad jong ngi, U Jisu, un wanphai, ka bainong na ka bynta ka jingïaineh jong ngi ka dei ka jingïohrung sha ka hima U Blei sha ki bymjukut. Kane ka hima ka dei na ka bynta kita “kiba sumar ïa ki hukum U Blei, bad ïa ka jingngeit U Jisu” (Ka Baibl Khasi, Jingpynpaw 14:12).

Lada phi kwah ban ïadon bynta lang bad kita kiban im junom ha kata ka hima U Blei, phi lah ban duwai kumne:

Ko Pa baieit, nga kwah ban don bad me ha ka hima jong me. Hikai bad ïarap ba ngan long uba ïaineh haduh ba men wan phai. Khublei shibun ïa ka jingkular jong me ban ïalam ïa nga sha ka jaka ba kham bha! Amen.

Lada phi kwah ban tip shuh shuh shaphang ka hima U Blei, sngewbha phone ne thoh sha ngi lyngba ka jingtip ba la ai hadien jong kane ka kot.