Aiao Inmananirangko Man·ani Sal

Vimal an·tangni auto-rickshawko soroksamona salbaaha. Salgimiko ua manderangko salna man·ahaoba, kusi ong·kujaengachim. Ua an·tangni bia ka·e janggi tangani gimin chanchiengachim. Nokdang be·gruangengahachim!

Ua an·tangni jikgipa Seemana ka·sachim — indiba ua jikgipako dokaoniko an·tangko ra·rikna man·jaengachim. Ua uko namen ka·onangatachim. Doknade sikjachim indiba dokatmanaiahachim. 

Toromni olakkiani salrango, Seema diabolni gisikko man·e chrokdengdenga aro ba·ratangko chitrongachim. Indake skatang dakanganiko Vimal namnikjaengachim. Olakiram biapchina re·jachina uni aganoba, jikgipa manijaengachim. Nokona sokbapilahaon uni mikkango matburungni an·chi nangachim, aro uko niksoe Vimal ka·onange dokrongachim. 

Changgninade Seema bi·sako oko keahachim indiba bi·sarangba uni chrokani gimin ba·galaona sokaiahachim. Jikgipa katta manirorojaha, aro indakana Vimal ka·onangaha, aro basakobade an·tangko dos ong·eba nikpilahachim.

Nambatgipa Chol

Vimal auto-rickshawo asonge nambata cholko man·na ske chanchiengachim. Tanggitik, ua soroksamo donggipa nokningoni ku·rangko knaaha. Dal·gimin manderang aro bi·sarang nokningo dongachim aro uamang saniba golpo aganako knatimengachim. 

Neng·nikaoni jokna katenggipa mandeni gimin ua golpo agangipa mande aganengachim. Ua an·tangni jonja adatangko togiahani gimin an·tangni janggina kene katengachim. Katangmitingo ua bakrao neng·takaha. Kam·e tuna ro·ongna agre uko ka·dimeatgipa darangba dongjaengachim. Nokoni katna nangpile dosko dakahanina ua duk man·pilengachim.

Ua golpoko Vimal gisiko nange knatimaha. Ua mande mairongpile duk man·enggenchim uko ua chanchiataha.

Golpo agangipa aganangkuaha. Ua mande tusion mingsa jumangko nikaha. Salgioni a·aona jang·ke chanako ua nikahachim. Duk man·gipa mandena pattianiko on·na gita, ua jang·keko sa·grerang ong·ona aro gadoa dakengachim. Mikrakahaon ua mande kusi ong·aha. Skoo kam·gipa ro·ongko ra·e ua gisik ra·na uko ua songe donaha. Jumango ua Isolni an·tang baksa dongpaenganiko u·iaha, aro pilakan namkuaigen ine ua u·iahachim.

Ki·tap Gital 

Manderangni re·angani ja·mano, Vimal ua nokona kratcha·a gnang napangaha.

“Katchabegipa Nengtakani Sal,” ine golpo agangipa ua mandena agansoaha. 

“Nengtakani Salara maia?” Vimal u·ina ske sing·aha.

“Dakgipa Rugipa Isolko chingade olakkia,” ine golpo agangipa aganaha. “Nengtakani salo olakkichina Ua an·chingna agana, maina Ua salsnio a·gilsakko ong·ataha. Ua jang·ke maikai a·gilsakko salgi baksa nangrimatahachim, uandake Nengtakani salara an·chingko Isol baksa nangrimata. Ia salo Isolko olakkianiara Dakgipa Isolko olakkiani ong·a aro Uni patianiko man·atani ong·a.”

Jonja adasani golpoko knae Vimalni gisiko nangaha. “Ua golpoko na·a banoniko man·a?” 

“Ua golpode ia Sastrooni ong·a, Gitel Jisu Kristoni ki·tapo donga,” ine ki·tap donramoniko ra·ate uko Vimalna on·aha. “Na·a ua golpoko ianoniko poraie nina man·gen.”

Vimal ua mandeko mitele ua ki·tap gitalko ra·e re·pilangaha. Ua ki·tapko poraie ua katchaaha, aro Sonibar salgipino ua re·bapilaha. Ua jripjrip asonge Isolo bi·ahaon, maiba aiao inmanani uni ka·tongo ong·baaha. 

Dingtanggimin Mande

Salsao Vimal ia ki·tap gitaloniko indine seako nikaha, “Na·simang Isolni torom nokdring ong·a, aro Isolni Gisik na·simango donga ine na·simang u·ijama?” (1 Korinthirangna 3:16). Uni gisiko seng·ani rang·sanan nabaaha. Mande Isolni torom nokdring ong·ode uko darangba saknaatna man·ja, ine ua chanchiaha. Anga angni jikgipako doktaijawaha.

Skangode ua dokna skako ra·rikna man·jachim, indiba ia changode ua dokgija dongna man·aiaha. Neng·takani salko maniania Isol baksa nangrimatani ong·a ine ua u·iaha. Isolsa uni ka·tongko dingtangataha. Rakgipa ka·tongko uni ka·bakoniko ra·gale ka·saani ka·tongko Isol una on·aha gita ua nikahachim. 

Nangrimpilataha!

Bang·a bilsirangna, Vimal Dakgipa Rugipa Isolko Neng·takani salo olakkiangkuaha. Ka·sne, Seema an·tang segipani dingtanganiko u·ibaaha. Ua jikgipako dokjahachim. Ua rinok rinok dakgipa ong·skaahachim.

Ua somoio, Seema neng·e gisik suk ong·gijasa dongengachim. Gitel Jisu Kristoni ki·tapko poraiani ja·mano aro Sonibar salo giljaoni re·bapilani ja·mano Vimalni pangnan gisik tom·tome donganiko ua nikaha. Bon·chotao, giljachi re·pagenma ine sing·on jikgipa re·pana ku·chakaha. 

“Neng·takani salde chingni nokdangna dingtangmanchagipa rongtalgipa sal ong·a,” ine Vimal agana. “Ia salo Isol an·chingko An·tang baksa nangrimchina okama. Indake an·ching Un baksa nangrimon, aiao inmanani obostarang ong·baa. Dakgipa Rugipa Isolko olakkiani giminsa chinga katchagipa nokdang ong·enga, ine anga u·ia. Neng·takani salni pattianisa an·chingko Isolona sepangbate salbaataha.”

Da·alo, Vimal aro Seema kusi ong·gipa nokdang ong·e depante sakgni baksa dongenga. Ua an·tangni pilak noksulrangna Neng·takani salni pattiani gimin agane on·enga.

Neng·takani salni gimin na·a u·ina skode, aro Sastroko man·na skode ia lekkani janggilo donggipa u·iataniko nibo.